ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ໃນຕອນບ່າຍວັນທີ 7 ກໍລະກົດຜ່ານມາ, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນການພິຈາລະນາ ແລະ ຮັບຮອງເອົາກົດໝາຍ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ: ມີຄວາມປື້ມປິຕິຍິນດີ ແລະ ເປັນກຽດຢ່າງຍິ່ງ ທີ່ໄດ້ຮັບມອບໝາຍຈາກທ່ານປະທານຄະນະປະຈຳສະພາແຫ່ງຊາດ ໃຫ້ມາຖະແຫຼງຂ່າວຕໍ່ສື່ມວນຊົນ ກ່ຽວກັບຜົນການພິຈາລະນາ ແລະ ຮັບ ຮອງເອົາກົດໝາຍ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ເພື່ອໃຫ້ປະຊາຊົນລາວບັນດາເຜົ່າໃນທົ່ວປະເທດ ໄດ້ຮັບຊາບຢ່າງທົ່ວເຖິງກັນ.

ຄືດັ່ງບັນດາທ່ານຜູ້ຊົມ ແລະ ຜູ້ຟັງໄດ້ຮັບຊາບແລ້ວວ່າ: ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ດໍາເນີນມາແຕ່ວັນທີ 13 ມິຖຸນາ 2022 ເປັນເວລາ 19 ວັນ ເຊິ່ງກອງປະຊຸມໄດ້ພິຈາລະນາຕົກລົງເນື້ອໃນສຳຄັນຫຼາຍບັນຫາ ແລະ ເລີ່ມແຕ່ວັນທີ 27 ມິຖຸນາ ຫາ ວັນທີ 7 ກໍລະກົດ 2022 ນີ້, ກອງປະຊຸມໄດ້ສຸມໃສ່ພິຈາລະນາເນື້ອໃນແຕ່ລະກົດໝາຍຢ່າງລະອຽດຖີ່ຖ້ວນ ແລະ ໃນວັນທີ 7 ກໍລະກົດ 2022 ນີ້ ບັນດາທ່ານສະມາຊິກສະພາແຫ່ງຊາດ ໄດ້ພ້ອມກັນລົງຄະແນນສຽງປິດລັບຮັບ ຮອງເອົາແຕ່ລະກົດໝາຍ ດ້ວຍການເຫັນດີເປັນສຽງສ່ວນຫຼາຍ. ໃນນີ້ ມີກົດໝາຍສ້າງໃໝ່ 3 ສະບັບ ແລະ ກົດໝາຍປັບປຸງ 6 ສະບັບ, ຊຶ່ງມີລາຍລະອຽດດັ່ງນີ້:

 

• ກົດໝາຍສ້າງໃໝ່ 3 ສະບັບ ມີ:
1. ກົດໝາຍ​ວ່າ​ດ້ວຍ​ວິຈິດ​ສິນ ຊຶ່ງແມ່ນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 94,19%;
2. ກົ​ດໝາຍວ່າ​ດ້ວຍ​ການ​ຄຸ້ມ​ຄອງ​ອາວຸດ ​ແລະ ວັດຖຸ​ລະ​ເບີດ ຊຶ່ງແມ່ນກະຊວງປ້ອງກັນຄວາມສະຫງົບ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 97,36%;
3. ກົດໝາຍ​ວ່າ​ດ້ວຍ​ຄວາມ​ປອດ​ໄພ​ຂອງ​ເຂື່ອນ ຊຶ່ງແມ່ນກະຊວງພະລັງງານ ແລະ ບໍ່ແຮ່ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 78,7%.
• ກົດໝາຍປັບປຸງ 6 ສະບັບ ມີ:
1. ກົດໝາຍ​ວ່າ​ດ້ວຍການ​ສົ່ງ​ເສີມ​ຈຸນ​ລະວິ​ສາ​ຫະກິດ, ວິ​ສາ​ຫະກິ​ດຂະໜາດ​ນ້ອຍ ​ແລະ ​ກາງ ຊຶ່ງແມ່ນກະຊວງອຸດສາຫະກຳ ແລະ ການຄ້າ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 94,77%;
2. ກົດໝາຍ​ວ່າ​ດ້ວຍ​ການ​ຄຸ້ມ​ຄອງ​ເງິນ​ຕາ​ຕ່າງປະ​ເທດ ຊຶ່ງແມ່ນທະນາຄານແຫ່ງ ສປປ ລາວ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 97,36%;
3. ກົດໝາຍ​ວ່າ​ດ້ວຍ​ຊັບ​ສິນ​ຂອງ​ລັດ ຊຶ່ງແມ່ນກະຊວງການເງິນ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 89,03%;
4. ກົດໝາຍ​ວ່າ​ດ້ວຍ​ການ​ແກ້​ໄຂ​ຄຳ​ຮ້ອງທຸກ ຊຶ່ງແມ່ນກຳມາທິການຍຸຕິທຳ ສະພາແຫ່ງຊາດ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 97,35%;
5. ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນ ຊຶ່ງແມ່ນສານປະຊາຊົນສູງສຸດ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 96,12%;
6. ກົດໝາຍວ່າດ້ວຍການປັບປຸງບາງມາດຕາຂອງກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ຊຶ່ງແມ່ນກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເປັນຜູ້ສະເໜີ; ໄດ້ຮັບຄະແນນສຽງເຫັນດີ 85,62%.

 

ການພິຈາລະນາ ແລະ ຮັບຮອງເອົາກົດໝາຍ ຈຳນວນ 9 ສະບັບດັ່ງກ່າວ ເຖິງວ່າເວລາສັ້ນ, ເນື້ອໃນຂອງກົດໝາຍແມ່ນກວ້າງຂວາງ, ເລິກເຊິ່ງ ແລະ ມີການພົວພັນກັບກົດໝາຍໃນຫຼາຍຂົງເຂດ. ໃນດ້ານ ອື່ນ, ກອງປະຊຸມໄດ້ດຳເນີນມາເປັນເວລາຫຼາຍວັນ, ຜູ້ແທນມີຄວາມອິດເມື່ອຍ ແລະ ຢູ່ໃນທ່າມກາງບັນຍາກາດທີ່ສະພາບການຢູ່ພາຍໃນ ແລະ ຕ່າງປະເທດ ມີຄວາມເຄັ່ງຮ້ອນຫຼາຍປະການ, ແຕ່ຍ້ອນບັນດາທ່ານສະມາຊິກສະພາແຫ່ງຊາດ ໄດ້ມີຄວາມຮັບຜິດຊອບສູງ ໃນຖານະທີ່ເປັນຕົວແທນແຫ່ງສິດອຳນາດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ບວກໃສ່ຄວາມເປັນເຈົ້າການຂອງຄະນະຮັບຜິດຊອບສ້າງ ແລະ ປັບປຸງກົດໝາຍ ກໍຄືພະນັກງານ-ລັດຖະກອນ ທີ່ກ່ຽວຂ້ອງທຸກທ່ານ ພາຍໃຕ້ການນຳພາ-ຊີ້ນຳຢ່າງໃກ້ຊິດຂອງຄະນະພັກ ແລະ ຄະນະປະຈຳສະພາແຫ່ງຊາດ ຈຶ່ງເຮັດໃຫ້ການພິຈາລະນາ ແລະ ຮັບຮອງເອົາບັນດາກົດໝາຍເຫຼົ່ານັ້ນ ສຳເລັດຜົນຢ່າງຈົບງາມຕາມແຜນການທີ່ໄດ້ກຳນົດໄວ້, ທັງຮັບປະກັນປະສິດ ທິພາບ ແລະ ປະສິດທິຜົນເປັນຢ່າງດີ.

 

ສິ່ງສຳຄັນແມ່ນບັນດາທ່ານສະມາຊິກສະພາແຫ່ງຊາດ ໄດ້ມີຄວາມຫ້າວຫັນສະໝັກໃຈລົງທະບຽນປະກອບຄວາມເຫັນຕໍ່ແຕ່ລະກົດໝາຍເປັນຈຳນວນຫຼວງຫຼາຍ, ທັງມີຄວາມມານະອົດທົນສູງ, ຢຶດໝັ້ນຕໍ່ສິດອຳນາດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ຕັ້ງໜ້າຄົ້ນຄວ້າ, ຄິດຫງ່ຳ, ວິເຄາະວິໄຈເນື້ອໃນແຕ່ລະກົດໝາຍ ຢ່າງມີເຫດຜົນ, ເລິກເຊິ່ງ, ຮອບດ້ານ, ແທດຕົວຈິງ ເຮັດໃຫ້ການລົງຄະແນນສຽງຮັບຮອງເອົາກົດໝາຍເຫຼົ່ານັ້ນ ບໍ່ສະເພາະແຕ່ໄດ້ບັນລຸຕາມຄາດໝາຍທີ່ວາງໄວ້ ແຕ່ຫາກຍັງມີຄວາມໝາຍຢ່າງເລິກເຊິ່ງ ເຖິງການເສີມຂະຫຍາຍສິດປະຊາທິປະໄຕຂອງບັນດາທ່ານສະມາຊິກສະພາແຫ່ງຊາດ ທີ່ເປັນຕົວແທນຂອງປະຊາຊົນລາວບັນດາເຜົ່າອີກດ້ວຍ.

 

ການພິຈາລະນາ ແລະ ລົງຄະແນນສຽງຮັບຮອງເອົາກົດໝາຍ 9 ສະບັບນີ້ ແມ່ນຜົນສໍາເລັດທີ່ສຳຄັນໃນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີ ທີ່ກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ໄດ້ຮັບຮອງເອົາ, ທັງເປັນການປະກອບສ່ວນສຳຄັນໃນການປັບປຸງ ແລະ ເພີ່ມທະວີພາຫະນະ, ເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງປະເທດເຮົາໃຫ້ເປັນລະບົບຄົບຊຸດຂຶ້ນຕື່ມ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງຊາດ, ຂອງລັດ, ລວມໝູ່, ບຸກຄົນ, ນິຕິບຸກຄົນ ແລະ ປະຊາຊົນລາວບັນດາເຜົ່າ, ສະກັດກັ້ນ ແລະ ຕ້ານບັນດາປະກົດການຫຍໍ້ທໍ້ ທີ່ເປັນການປະພຶດລະເມີດກົດໝາຍ ຢູ່ໃນສັງຄົມ ແລະ ແນວຄິດອິດສະລະເສລີຕາມໃຈຊອບ ທີ່ຢູ່ເໜືອກົດໝາຍ. ພ້ອມກັນນັ້ນ, ກໍ່ເປັນປັດໄຈຮັບປະກັນໃຫ້ແກ່ການສ້າງລັດ ປະຊາທິປະໄຕປະຊາຊົນລາວ ໃຫ້ເປັນລັດທີ່ປົກຄອງດ້ວຍກົດໝາຍຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນເທື່ອລະກ້າວ, ທັງຮັບປະກັນໃຫ້ແກ່ການເຊື່ອມຈອດ, ເຊື່ອມໂຍງເຂົ້າສູ່ພາກພື້ນ ແລະ ສາກົນຂອງປະເທດເຮົາ.
ບັນດາກົດໝາຍເຫຼົ່ານັ້ນ ເຖິງວ່າສະພາແຫ່ງຊາດ ໄດ້ຮັບຮອງເອົາແລ້ວກໍ່ຕາມ, ກຳມາທິການກົດ ໝາຍ ຍັງຈະໄດ້ສືບຕໍ່ສົມທົບກັບບັນດາກຳມາທິການ ສະພາແຫ່ງຊາດ, ຄະນະຮັບຜິດຊອບແຕ່ລະກົດ ໝາຍ ແລະ ພາກສ່ວນທີ່ກ່ຽວຂ້ອງ ປັບປຸງຮຽບຮຽງໃຫ້ສຳເລັດສົມບູນ ແລ້ວລາຍງານຂໍທິດຊີ້ນຳຈາກຄະນະປະຈຳສະພາແຫ່ງຊາດ ກ່ອນຈະສະເໜີຫາທ່ານປະທານປະເທດ ແຫ່ງ ສປປ ລາວ ພິຈາລະນາອອກລັດຖະດຳລັດ ປະກາດໃຊ້ຢ່າງເປັນທາງການ ຕາມຂັ້ນຕອນຂອງກົດໝາຍ ແລະ ລະບຽບການທີ່ກ່ຽວຂ້ອງ.

 

ການພິຈາລະນາ ແລະ ຮັບຮອງເອົາກົດໝາຍ 9 ສະບັບນີ້ ເປັນພຽງແຕ່ຜົນສໍາເລັດສ່ວນໜຶ່ງໃນການປະຕິບັດແຜນການສ້າງ ແລະ ປັບປຸງກົດໝາຍ ປະຈຳປີ 2022 ແລະ 5 ປີເທົ່ານັ້ນ; ໃນກອງປະຊຸມສະ ໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນທ້າຍປີ 2022 ນີ້ ຍັງຈະສືບຕໍ່ພິຈາລະ ນາການສ້າງ ແລະ ປັບປຸງກົດໝາຍ ຈຳນວນ 19 ສະບັບອີກ ແລະ ຍັງຈະສືບຕໍ່ສ້າງ ແລະ ປັບປຸງກົດໝາຍ ແຕ່ນີ້ຫາປີ 2025, ຊຶ່ງລາຍລະອຽດ ພາຍຫຼັງສຳເລັດກອງປະຊຸມສະໄໝສາມັນ ເທື່ອທີ 3 ນີ້ແລ້ວ ກຳມາທິການກົດໝາຍ ຈະສືບຕໍ່ສົມທົບກັບ ບັນດາກຳມາທິການຂອງສະພາແຫ່ງຊາດ ແລະ ບັນດາກະຊວງ, ອົງ ການ ທີ່ມີສິດສ້າງ ແລະ ປັບປຸງກົດໝາຍ ຄົ້ນຄວ້າເບິ່ງຄືນແຜນການການສ້າງ ແລະ ປັບປຸງກົດໝາຍ ແຕ່ນີ້ຫາປີ 2025 ແລ້ວລາຍງານໃຫ້ຄະນະປະຈຳສະພາແຫ່ງຊາດ ເພື່ອພິຈາລະນາຊີ້ນຳ ໃນກໍລະນີຫາກມີຄວາມຈຳເປັນຕ້ອງປັບປຸງແຜນການສ້າງ ແລະ ປັບປຸງກົດໝາຍ 5 ປີນັ້ນ ຈະໄດ້ລາຍງານຕໍ່ກອງປະຊຸມສະ ໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ພິຈາລະນາຮັບຮອງ.

 

ການສ້າງ ແລະ ປະກາດໃຊ້ກົດໝາຍ ເປັນວຽກງານທີ່ສຳຄັນ ແລະ ມີຄວາມຫຍຸ້ງຍາກບໍ່ໜ້ອຍຢູ່ແລ້ວ, ແຕ່ບັນຫາສຳຄັນ ແລະ ຫຍຸ້ງຍາກຍິ່ງກວ່ານັ້ນ ແມ່ນບັນຫານຳເອົາກົດໝາຍທີ່ໄດ້ປະກາດໃຊ້ແລ້ວນັ້ນ ເຂົ້າສູ່ຊີວິດຕົວຈິງຂອງສັງຄົມ ເຮັດໃຫ້ການເຄົາລົບ ແລະ ປະຕິບັດກົດໝາຍກາຍເປັນສະຕິຕື່ນຕົວ, ແບບແຜນດຳລົງຊີວິດ, ຄວາມຊິນເຄີຍ ແລະ ການປະພຶດຕົວຈິງ ຂອງສະມາຊິກພັກ, ພະນັກງານ-ລັດຖະ ກອນ, ທະຫານ, ຕຳຫຼວດ, ກຳມະກອນ, ກະສິກອນ, ນັກຮຽນຮູ້ປັນຍາຊົນ, ນັກທຸລະກິດທັງພາກລັດ ແລະ ເອກະຊົນ, ພະສົງອົງຂະເຈົ້າ, ນັກບວດ ແລະ ພົນລະເມືອງລາວທຸກຄົນ ລວມທັງຜູ້ບໍ່ມີສັນຊາດ ແລະ ຊາວຕ່າງດ້າວ ທີ່ດຳລົງຊີວິດຢູ່ ສປປ ລາວ. ບັນຫານີ້ເປັນເລື່ອງໃຫຍ່ ແລະ ເປັນປັດໄຈສຳຄັນຮັບປະ ກັນຄຸນນະພາບຂອງການສ້າງລັດທີ່ປົກຄອງດ້ວຍກົດໝາຍຂອງພວກເຮົາ.
ໃນໂອກາດນີ້, ຂໍສະເໜີໄປຍັງບັນດາກະຊວງ, ອົງການ ທີ່ມີກົດໝາຍໃນຄວາມຮັບຜິດ ຊອບຂອງຕົນ ຈົ່ງເອົາໃຈໃສ່ໂຄສະນາ, ເຜີຍແຜ່ກົດໝາຍ ໃຫ້ພົນລະເມືອງທຸກຄົນ, ທຸກຊັ້ນຄົນ, ເຜົ່າຊົນ,ສາສະໜາ ແລະ ທຸກການຈັດຕັ້ງໃນທົ່ວສັງຄົມ ຮັບຮູ້ເຂົ້າໃຈຢ່າງເລິກເຊິ່ງ ແລະ ທົ່ວເຖິງ ເພື່ອພ້ອມກັນເປັນເຈົ້າການຕື່ນຕົວເຄົາລົບ ແລະ ປະຕິບັດຢ່າງເຂັ້ມງວດ. ພ້ອມກັນນີ້, ສະເໜີໃຫ້ທຸກກະຊວງ, ອົງ ການ ໃຫ້ຮີບຮ້ອນສືບຕໍ່ຄົ້ນຄວ້າສ້າງ ແລະ ປັບປຸງກົດໝາຍ ທີ່ຈະນຳສະເໜີຜ່ານກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ໃຫ້ຮັບປະກັນຄຸນນະພາບ ແລະ ທັນຕາມກຳນົດເວລາ.
ໃນຕອນທ້າຍນີ້, ຂໍຮຽກຮ້ອງໄປຍັງປະຊາຊົນລາວບັນດາເຜົ່າທຸກທົ່ວໜ້າ ຈົ່ງຍົກສູງນ້ຳໃຈຮັກຊາດ, ນ້ຳໃຈເປັນເຈົ້າຂອງປະເທດຊາດ, ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ, ເພີ່ມທະວີຄວາມສາມັກຄີເປັນປຶກແຜ່ນພາຍໃນຊາດ ເພື່ອພ້ອມກັນສືບຕໍ່ປະກອບສ່ວນຢ່າງສົມກຽດ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດຂອງພວກເຮົາ ໃຫ້ບັນລຸຈຸດໝາຍວັດ ທະນະຖາວອນ, ເຮັດໃຫ້ປະຊາຊົນລາວບັນດາເຜົ່າ ມີຄວາມສະເໝີພາບ, ຍຸຕິທຳ ແລະ ຢູ່ເຢັນເປັນສຸກ.