ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນບ່າຍວັນທີ 21 ມິຖຸນາຜ່ານມາ, ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຄວາມຄືບໜ້າໃນການ​ຈັດ​ຕັ້ງ​ປະ​ຕິ​ບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ: ໃນວັນທີ 21 ມິຖຸນາ 2022 ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ດຳເນີນວາລະ ພິຈາລະນາ ບົດລາຍງານຂອງລັດຖະບານ ກ່ຽວກັບຄວາມຄືບໜ້າ ໃນການ​ຈັດ​ຕັ້ງ​ປະ​ຕິ​ບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປີ 2021-2023 ເຊິ່ງວຽກງານດັ່ງກ່າວ ໄດ້ຖືກຮັບຮອງເອົາໃນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ຕາມມະຕິ ສະບັບເລກທີ 04/ສພຊ, ລົງວັນທີ 10 ສິງຫາ 2021.
ພາຍຫຼັງກອງປະຊຸມໄດ້ຮັບຟັງການລາຍງານຂອງລັດຖະບານ ແລະ ການປະກອບຄຳເຫັນຂອງຜູ້ຕາງໜ້າຄະນະປະຈໍາສະພາແຫ່ງຊາດແລ້ວ, ບັນດາສະມາຊິກສະພາແຫ່ງຊາດ ໄດ້ສຸມໃສ່ປະ ກອບຄໍາເຫັນດ້ວຍຄວາມຮັບຜິດຊອບສູງ ຕໍ່ບົດລາຍງານຂອງລັດຖະບານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຕາມ 6 ແຜນວຽກຈຸດສຸມຂອງວາລະແຫ່ງຊາດດັ່ງກ່າວ ແຕ່ປີ 2021-2023. ການປະກອບຄຳເຫັນຂອງບັນດາສະມາຊິກສະພາແຫ່ງຊາດ ລວມທັງໝົດມີ 13 ທ່ານ, ຍິງ 1 ທ່ານ ແລະ ສາມາດສັງລວມບັນດາເນື້ອໃນທີ່ພົ້ນເດັ່ນ ໄດ້ດັ່ງນີ້:

ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະຜ່ານມາ, ບັນດາສະມາຊິກສະພາແຫ່ງຊາດ ໄດ້ປະກອບຄຳເຫັນຊົມເຊີຍລັດຖະບານ ທີ່ມີຄວາມພະຍາ ຍາມໃນການຈັດຕັ້ງຜັນຂະຫຍາຍ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນເງື່ອນ ໄຂທີ່ປະເທດພວກເຮົາພົບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຜົນກະທົບຈາກການແຜ່ລະບາດຂອງພະຍາດໂຄວິດ-19, ແຕ່ກໍສາມາດຈັດຕັ້ງປະຕິບັດຕາມແຜນການໄດ້ຢ່າງມີຄວາມຄືບໜ້າ, ເຊິ່ງຜ່ານການປະຕິບັດຕົວຈິງ ແຕ່ເດືອນກໍລະກົດ 2021 ຫາເດືອນພຶດສະພາ 2022 ສາ​ມາດ​ແກ້​ໄຂ​ມ້າງ​ລາຍຄະ​ດີຢາ​ເສບ​ຕິດໃນຂອບ​ເຂດ​ທົ່ວ​ປະ​ເທດ​ໄດ້ເຖິງ 4.094 ເລື່ອງ, ຈັບ​ຜູ້​ຖືກ​ຫາ​ໄດ້ 5.818 ຄົນ/ຍິງ 618 ຄົນ, ຍຶດຢາເສບຕິດປະເພດຢາ​ບ້າໄດ້ 177.752.115 ເມັດ, ນໍ້າໜັກລວມ 17.887,29 ກິິໂລ, ພ້ອມນີ້ ກຸ່ມ​ເສບ, ຂົນ​ສົ່ງ-ຄ້າຂາຍ ຢາເສບຕິດມີຄວາມຢ້ານກົວ,ຈຳນວນໜຶ່ງໄດ້ຢຸດເຊົາ. ແຕ່ຄຽງຄູ່ກັບຜົນໄດ້ຮັບດັ່ງກ່າວນັ້ນ, ຜ່ານການຈັດຕັ້ງປະຕິບັດ ເຫັນວ່າຍັງພົບຄວາມຫຍຸ້ງຍາກ ແລະ ຍັງມີບັນຫາດ້ານອ່ອນ-ຄົງຄ້າງ, ເປັນຕົ້ນແມ່ນ ການ​ໂຄສະນາ, ສຶກສາ​ອົບຮົມ, ​ເຜີຍ​ແຜ່ແນະນຳບັນດາລະບຽບ​ກົດໝາຍ ​ແລະຜົນ​ຮ້າຍ​ຂອງ​ຢາ​ເສບ​ຕິດໃຫ້ທົ່ວສັງຄົມ ຍັງບໍ່ທັນທົ່ວເຖິງທຸກເປົ້າໝາຍ, ປະຊາຊົນຈຳນວນໜຶ່ງ ຍັງບໍ່ທັນໃຫ້ການຮ່ວມມືໃນການແຈ້ງເບາະແສ ແລະ ໃຫ້ຂໍ້ມູນ ກ່ຽວກັບບັນຫາຢາເສບຕິດໃນທ້ອງຖິ່ນຕົນ; ການບຳບັດ, ປິ່ນປົວ, ຟື້ນຟູສຸຂະພາບ ແລະ ເຝິກສີມື, ເຝິກອາຊີບໃຫ້ຜູ້ຕິດຢາເສບຕິດ ຍັງເຮັດບໍ່ທັນໄດ້ດີ, ເປັນສາເຫດໜຶ່ງທີ່ໃຫ້ຜູ້ຕິດຢາເສບຕິດ ໃນເມື່ອປິ່ນປົວເຊົາແລ້ວ ຍັງກັບໄປເສບ​ຢາເສບຕິດຄືນ​ໃໝ່; ຄະນະພັກ, ອົງການປົກຄອງ ກໍຄືຂະແໜງການຕ່າງໆ ແລະ ພະນັກງານ-ສະມາຊິກພັກຈຳນວນໜຶ່ງຍັງເຂົ້າໃຈວ່າ, ວຽກງານແກ້ໄຂບັນຫາຢາເສບຕິດ ແມ່ນໜ້າທີ່ ແລະ ຄວາມຮັບຜິດຊອບຂອງຂະແໜງການປ້ອງກັນຄວາມສະຫງົບ ຈຶ່ງບໍ່ທັນເອົາໃຈໃສ່ເທົ່າທີ່ຄວນ; ຍັງຂາດງົບປະມານ, ວັດຖຸອຸປະກອນ, ພາຫະນະທີ່ຈຳເປັນ ໃນການຮັບໃຊ້ໃຫ້ແກ່ການຈັດຕັ້ງປະຕິບັດວາລະແຫ່ງຊາດ.

ສ່ວນທິດທາງແຜນການຈຸດສຸມໃນໄລຍະຕໍ່ໄປ, ສະມາຊິກສະພາແຫ່ງຊາດ ໄດ້ສະເໜີ ດັ່ງນີ້:
1. ຕ້ອງໄດ້ເພີ່ມທະວີການຍົກສູງຄວາມສາມາດ ໃນການນຳພາຊີ້ນຳການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ກາຍເປັນຄວາມຮັບຜິດຊອບໂດຍກົງ, ເດັດຂາດຂອງຄະນະພັກ-ຄະນະນຳແຕ່ລະຂັ້ນ, ຖືເອົາການແກ້ໄຂບັນຫາຢາເສບຕິດ ເປັນມາດຕະ ຖານ ເງື່ອນໄຂໜຶ່ງ ເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາ, ສ້າງບ້ານປອດຢາເສບຕິດ, ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອສ້າງໃຫ້ທຸກຄົນມີສະຕິລະວັງຕົວ ແລະ ເຂົ້າຮ່ວມໃນການຕ້ານ, ສະກັດກັ້ນ ບັນຫາຢາເສບຕິດຢ່າງແຂງແຮງ;
2. ສືບຕໍ່ສ້າງ​ຄວາມ​ຮັບ​ຮູ້​​ໃຫ້​​ສັງຄົມຫຼາຍຂຶ້ນ ແລະ ຕໍ່ເນື່ອງ ດ້ວຍການໂຄສະນາເຜີຍ​ແຜ່​ລະບຽບກົດໝາຍ ແລະ ຜົນ​ຮ້າຍຂອງ​ຢາ​ເສບ​ຕິດໃຫ້ເລິກເຊິ່ງ, ເຖິງຖອງ ແລະ ທົ່ວເຖິງທຸກເປົ້າ ໝາຍໃນສັງຄົມ, ສິ່ງສຳຄັນແມ່ນເອົາໃຈໃສ່ສ້າງຄວາມເຂັ້ມແຂງໃຫ້ສະຖາບັນຄອບຄົວ ແລະ ຊຸມຊົນໃນການຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດໃຫ້ແຂງແຮງ, ມີປະສິດທິຜົນ ແລະ ໄດ້ຮັບຜົນດີ;
3. ສືບຕໍ່ປັບປຸງ​, ສ້າງກົດໝາຍ ແລະ ນິຕິ​ກໍາໃຕ້ກົດໝາຍ ທີ່​ກ່ຽວຂ້ອງ​​ກັບບັນຫາ​ຢາ​ເສບຕິດ​ໃຫ້ຮັດກຸມ, ບໍ່ໃຫ້ມີຊ່ອງຫວ່າງ, ກົດໜ່ວງຖ່ວງດຶງ, ຖືກຕ້ອງ ແລະ ສອດຄ່ອງກັບຄວາມຮຽກຮ້ອງຕ້ອງການໃນການເລັ່ງທວງໃຫ້ແກ່ການແກ້ໄຂບັນຫາຢາເສບຕິດ;
4. ສືບ​ຕໍ່ປັບປຸງກົງຈັກການຈັດຕັ້ງ ກໍຄືໜ່ວຍງານ ແລະ ບຸກຄະລາກອນ ທີ່ຮັບຜິດຊອບໂດຍກົງຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ມີຄວາມໜັກແໜ້ນ, ເຂັ້ມແຂງ, ເດັດຂາດ, ໂປ່ງໃສ, ເປັນມືອາຊີບ ແລະ ມີຄວາມສາມາດພຽງພໍ ໃນການເຄື່ອນໄຫວແກ້ໄຂບັນຫາຢາເສບຕິດ. ພ້ອມນີ້, ກໍຕ້ອງເອົາໃຈໃສ່ເພີ່ມຄວາມສາມາດທາງດ້ານພື້ນຖານໂຄງລ່າງ, ເຕັກນິກ-ວິຊາການ, ເຄື່ອງມືທີ່ທັນສະໄໝ, ງົບປະມານຮັບໃຊ້ ຢ່າງເໝາະສົມ ແລະ ເປັນລະບົບຄົບຊຸດ ເພື່ອຮັບໃຊ້ວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ມີປະສິດທິພາບ ແລະ ປະສິດທິຜົນ;
5. ສະເໜີໃຫ້ເອົາໃຈໃສ່ ຕໍ່ການ​​ບຳບັດ-​ປິ່ນປົວ​ຜູ້​ຕິດ​​ຢາ​ເສບ​ຕິດ ເຊິ່ງໃນປັດຈຸບັນ ກໍຄືໃນຊຸມປີຕໍ່ໜ້າ ເຫັນວ່າຍັງມີຄວາມຈຳເປັນຕ້ອງໄດ້ປັບປຸງບັນດາສູນ ກໍຄືສະຖານບຳບັດ-ປິ່ນປົວ ແລະ ເຝິກວິຊາຊີບ ເພື່ອຮັບໃຊ້ໃຫ້ແກ່ວຽກງານດັ່ງກ່າວ, ຄົ້ນຄວ້າປະກອບພາຫະນະ, ອຸປະກອນຮັບໃຊ້ທີ່ຈຳເປັນ ແລະ ບຸກຄະລາກອນແພດໝໍ ກໍຄືວິຊາການດ້ານຕ່າງໆ ໃຫ້ມີຄວາມຮັບປະກັນຢ່າງເໝາະສົມ. ສ່ວນຄາດໝາຍຕໍ່ໄປແມ່ນຕ້ອງໄດ້ພະຍາຍາມເຮັດໃຫ້ຜູ້ຕິດຢາເສບຕິດຫຼຸດລົງເປັນກ້າວໆ ເຊິ່ງນັ້ນແມ່ນຕົວຊີ້ວັດໜຶ່ງ ທີ່ຊີ້ໃຫ້ເຫັນປະສິດທິຜົນໃນການແກ້ໄຂບັນຫາຢາເສບຕິດຢູ່ປະເທດເຮົາ;
6. ສະເໜີໃຫ້ສືບຕໍ່ການຮ່ວມມືກັບສາກົນ ໂດຍສະເພາະແມ່ນກັບບັນດາປະເທດໃກ້ຄຽງໃນອະນຸພາກພື້ນ, ພາກພື້ນໃຫ້ແໜ້ນແຟ້ນ, ເປັນລະບົບ, ຮັດກຸມ ເພື່ອສະກັດກັ້ນ, ປາບປາມຂະ ບວນການຢາເສບຕິດໃຫ້ແຂງແຮງ, ມີຈຸດສຸມ ແລະ ມີປະສິດທິຜົນ. ພ້ອມນີ້, ຍາດແຍ່ງເອົາການສະໜັບສະໜູນ, ຊ່ວຍເຫຼືອທາງດ້ານອຸປະກອນ-ເຕັກນິກ, ວິຊາການ ແລະ ທຶນຮອນ ຈາກປະເທດເພື່ອນມິດໃຫ້ຫຼາຍຂຶ້ນ.

ໃນຕອນທ້າຍ ທ່ານຍັງໄດ້ຮຽກຮ້ອງມາຍັງຄະນະພັກ-ຄະນະນຳທຸກຂັ້ນ, ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ແລະ ທຸກຊັ້ນຄົນໃນສັງຄົມ ຈົ່ງໃຫ້ການຮ່ວມມື ແລະ ເຂົ້າຮ່ວມຢ່າງຕັ້ງໜ້າ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງລັດຖະບານ ເຮັດໃຫ້ສັງຄົມລາວ ປອດໄພຈາກບັນຫາຢາເສບຕິດ ແລະ ກ້າວໄປສູ່ການກຳຈັດປັດເປົ່າໃຫ້ໝົດສິ້ນໄປເປັນກ້າວໆ.