(ສພຊ) ວັນທີ 16 ພະຈິກ 2022, ທີ່ສະພາແຫ່ງຊາດ, ສະຫາຍ ສຈ. ປອ. ຈະເລີນ ເຍຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ ທັງເປັນປະທານຄະນະມິດຕະພາບລັດຖະສະພາລາວ-ກູບາ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເຟນານໂດ ກອງຊາເລສ ໂຢ ປະທານສະຖາບັນກູບາເພື່ອມິດຕະພາບກັບນາໆຊາດ ວິລະຊົນກູບາ ພ້ອມ​ດ້ວຍ​ຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ.
ໂອກາດດັ່ງກ່າວ, ສະຫາຍ ສຈ. ປອ. ຈະເລີນ ເຍຍປາວເຮີ ໄດ້ຕີລາຄາສູງຕໍ່ການມາຢ້ຽມຢາມ ສປປລາວ ຂອງຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດ ໃນໄລຍະຜ່ານມາ ເຫັນວ່າສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ກູບາ ແລະ ກູບາ-ລາວ ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງຂຶ້ນເລື້ອຍໆ ເຊິ່ງສະແດງໃຫ້ເຫັນການນໍາຂັ້ນສູງຂອງສອງປະເທດ ມີການໄປມາຫາສູ່, ພົບປະຢ້ຽມຢາມເຊິ່ງກັນ ແລະ ກັນ ຢ່າງເປັນປົກກະຕິ ສະແດງໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ; ການພົວພັນຮ່ວມມືຂອງບັນດາຂະແໜງການ ເປັນຕົ້ນແມ່ນຂະແໜງການສຶກສາ, ສາທາລະນະສຸກ ແລະ ກິລາ ພວມໄດ້ຮັບການເສີມຂະຫຍາຍຕາມທ່າແຮງຂອງສອງຝ່າຍ ນຳເອົາຜົນປະໂຫຍດມາສູ່ປະຊາຊົນສອງປະເທດຢ່າງແທ້ຈິງ.
ຈາກນັ້ນ, ໄດ້ເຂົ້າຮ່ວມພົບປະສອງຝ່າຍ ເຊິ່ງທັງສອງຝ່າຍໄດ້ແຈ້ງສະພາບການພົ້ນເດັ່ນ ໃຫ້ກັນຊາບ ແລະ ຕີລາຄາການພົວພັນຮ່ວມມືດ້ານການທູດປະຊາຊົນ ກໍຄືການເຄື່ອນໄຫວຈັດກິດຈະກຳສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນໄລຍະຜ່ານມາ, ປືກສາຫາລື ແລະ ວາງທິດທາງແຜນການຮ່ວມມືກັນໃນຕໍ່ໜ້າ. ສອງຝ່າຍເຫັນດີເປັນເອກະພາບກັນໃນການສືບຕໍ່ພົວພັນຮ່ວມມື, ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ.
(ຂ່າວ: ນາງ ສຸພາວັນ ຫອມສະນິດ, ພາບ: ສອນສັກ ວັນວິໄຊ)