(ສພຊ) ຕອນບ່າຍວັນທີ 31 ພຶດສະພາ 2023 ທີ່ສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມອຳລາ ຂອງທ່ານ ນາງ ລິວ ຊູນ ລິນ (Leow Siu Lin) ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສາທານະລະລັດ ສິງກະໂປ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ໃນໂອກາດທີ່ສຳເລັດການປະຕິບັດໜ້າທີ່ການທູດ ຢູ່ ສປປລາວ.

ໃນໂອກາດດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຊົມເຊີຍຜົນສຳເລັດໃນການປະຕິບັດໜ້າທີ່ການທູດຢູ່ ສປປລາວ ພ້ອມທັງຕີລາຄາສູງຕໍ່ການປະຕິບັດໜ້າທີ່ການທູດ ຂອງທ່ານ ນາງ Leow Siu Lin ທີ່ເຫັນວ່າຕະຫຼອດໄລຍະການປະຕິບັດໜ້າທີ່ຢູ່ລາວ ທ່ານໄດ້ເອົາໃຈໃສ່ຢ່າງຕັ້ງໜ້າໃນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນຮ່ວມມື ລະຫວ່າງ ສອງປະເທດ ລາວ ແລະ ສິງກະໂປ ຕະຫຼອດໄລຍະຜ່ານມາໃຫ້ໄດ້ຮັບການພັດທະນາ ແລະ ຂະຫຍາຍຕົວເປັນກ້າວໆ ພ້ອມທັງຕາງໜ້າພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນສິງກະໂປ ທີ່ໄດ້ໃຫ້ການຊ່ວຍເຫຼືອ ສປປລາວ ໃນການພັດທະນາຊັບພະຍາກອນມະນຸດ ກໍຄືພື້ນຖານໂຄງລ່າງ ການສຶກສາ, ສາທາ ແລະ ອື່ນໆ, ພິເສດ ຢູ່ເຂດຫ່າງໄກ ຢູ່ແຂວງສະຫວັນນະເຂດ ເຊິ່ງເປັນແຂວງທີ່ກວ້າງ, ພົນລະເມືອງຫຼາຍ ທັງເປັນເຂດເລືອກຕັ້ງຂອງທ່ານ ຮອງປະທານສະພາແຫ່ງຊາດ ອີກດ້ວຍ. ພ້ອມນັ້ນ, ທ່ານຮອງປະທານສະພາແຫ່ງຊາດ ຍັງໄດ້ອວຍພອນໃຫ້ ທ່ານທູດ ຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບ ພ້ອມທັງອວຍພອນໃຫ້ທ່ານ ເອກອັກຄະລັດຖະທູດ ຈົ່ງປະສົບຜົນສຳເລັດໃນໜ້າທີ່ວຽກງານໃໝ່ທີ່ໃຫຍ່ກວ່າເກົ່າ.

ທ່ານ ນາງ Leow Siu Lin ກໍໄດ້ສະແດງຄວາມຂອບໃຈ ທ່ານຮອງປະທານສະພາແຫ່ງຊາດລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ຂອບໃຈຕໍ່ລັດຖະບານລາວ ກໍຄືສະພາແຫ່ງຊາດ ທີ່ໄດ້ເອົາໃຈໃສ່ ໃຫ້ການຮ່ວມມືຊ່ວຍເຫຼືອ ໃນການປະຕິບັດໜ້າທີ່ການທູດຂອງຕົນຢູ່ ສປປລາວ ຕະຫຼອດໄລຍະເວລາຜ່ານມາ ໜຶ່ງສະໄໝ ແລະ ສະແດງຄວາມຫວັງວ່າລັດຖະບານ ແລະ ສະພາແຫ່ງຊາດລາວ ຈະສືບຕໍ່ໃຫ້ການຮ່ວມມື ແກ່ທ່ານເອກອັກຄະລັດຖະທູດ ຄົນໃໝ່ ທີ່ຈະມາຮັບໜ້າທີ່ຕໍ່ໄປ ເພື່ອພ້ອມກັນສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດທີ່ດີມີມາແລ້ວນັ້ນ ໃຫ້ສືບຕໍ່ໄດ້ຮັບການຂະຫຍາຍຕົວ ແລະ ເປັນຮູບປະທຳຍິ່ງໆຂຶ້ນ.