(ສພຊ) ໃນຕອນເຊົ້າຂອງວັນທີ 24 ກຸມພາ 2023 ທີ່ສະພາແຫ່ງຊາດ ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ເອີນຊີໄຊຄັງ ລົບຊັງດໍຣຈ (L.Ulziisaikhan) ເລຂາທິການ ໃຫຍ່ ສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະ ເນື່ອງໃນໂອກາດທີ່ຢ້ຽມ ຢາມ ແລະ ເຮັດວຽກຢູ່ ສປປລາວ ໃນລະຫວ່າງວັນທີ 23 ກຸມພາ ຫາ 1 ມີນາ 2023.
ໃນໂອກາດດັ່ງກ່າວ ທ່ານ ປອ. ນາງສູນທອນ ໄຊຍະຈັກ ໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ທ່ານ ນາງ ເອີນຊີໄຊຄັງ ລົບຊັງດໍຣຈ ທີ່ມາຢ້ຽມຢາມ ສປປລາວ ຢ່າງເປັນທາງການ, ພ້ອມທັງ ຕີລາຄາສູງຕໍ່ການຢ້ຽມຢາມໃນຄັ້ງນີ້ ເຊິ່ງເປັນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ປະຊາຊົນ ສອງຊາດ ລາວ-ມົງໂກລີ ກໍຄືລະຫວ່າງສອງອົງການນິຕິບັນຍັດ ຂອງສອງປະເທດ ເວົ້າລວມ, ເວົ້າສະເພາະ ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ ແຫ່ງ ມົງໂກລີ ແລະ ພ້ອມກັນນີ້, ທ່ານຮອງປະທານສະພາແຫ່ງຊາດ ໄດ້ສະແດງຄວາມຂອບໃຈຕໍ່ຫ້ອງວ່າການ ກໍຄື ສະພາຄູຣານໃຫຍ່ ມົງໂກລີ ທີ່ໄດ້ຕົກລົງໃຫ້ການຊ່ວຍເຫຼືອຜ້າພົມປູຫ້ອງຮັບແຂກກຽດຕິຍົດຂອງສະພາແຫ່ງຊາດ ແລະ ສະແດງ ຄວາມຊົມເຊີຍຕໍ່ຜົນການພົບປະເຮັດວຽກ ລະຫວ່າງເລຂາທິການສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ມົງໂກລີ ເຊິ່ງສອງຝ່າຍໄດ້ທົບທວນຕີລາຄາຄືນ ການພົວພັນຮ່ວມມືໃນໄລຍະຜ່ານມາ ແລະ ກໍານົດທິດທາງແຜນການຮ່ວມມືໃນຕໍ່ໜ້າ ໂດຍໄດ້ຮ່ວມກັນລົງນາມ ໃນບົດບັນທຶກຊ່ວຍຈໍາ ວ່າດ້ວຍການຮ່ວມມື ລະຫວ່າງຄະນະເລຂາທິການ ສະພາແຫ່ງຊາດລາວ ແລະ ຫ້ອງວ່າການສະພາຄູຣານໃຫຍ່ ມົງໂກລີ ໄລຍະ 2023-2026 ເຊິ່ງເປັນເອກະສານ ທາງດ້ານນິຕິກໍາ ສຳຄັນ ເພື່ອຊຸກຍູ້ ແລະ ສົ່ງເສີມການພົວພັນຮ່ວມມື ລະຫວ່າງ 2 ຫ້ອງວ່າການ ກໍຄື 2 ອົງການນິຕິບັນຍັດ ຂອງ 2 ປະເທດ ສປປລາວ ແລະ ມົງໂກລີ ເພື່ອຍົກສູງການພົວພັນຮ່ວມມື, ທ່ານຮອງປະທານສະພາແຫ່ງຊາດ ໄດ້ສະເໜີ ໃຫ້ສອງຝ່າຍ ຈັດຕັ້ງປະຕິບັດບົດບັນທຶກຊ່ວຍຈໍາວ່າດ້ວຍການຮ່ວມມື ໃຫ້ມີປະສິດທິພາບ ແລະ ປະສິດທິຜົນ ເປັນຕົ້ນແມ່ນການແລກປ່ຽນຄະນະຜູ້ແທນຂັ້ນຕ່າງໆ, ແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດ, ດ້ານຂໍ້ມູນຂ່າວສານ, ການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.
ທ່ານ ນາງ ເອີນຊີໄຊຄັງ ລົບຊັງດໍຣຈ ໄດ້ກ່າວສະແດງຄວາມຂອບໃຈ ຕໍ່ທ່ານ ຮອງປະທານສະພາແຫ່ງຊາດ ແຫ່ງ ສປປລາວ ທີ່ໄດ້ສະຫຼະເວລາອັນມີຄ່າຕ້ອນຮັບຄະນະຢ່າງອົບອຸ່ນ ແລະ ໄດ້ລາຍງານ ຜົນຂອງການພົບປະເຮັດວຽກ ຮ່ວມກັບທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ ແຫ່ງ ສປປ ລາວ ພ້ອມທັງສະເໜີຈຸດປະສົງການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ຂອງຄະນະໃນຄັ້ງນີ້.
ກ່ອນໜ້ານີ້ ໃນຕອນເຊົ້າຂອງວັນດຽວກັນ, ທ່ານ ນາງ ເອີນຊີໄຊຄັງ ລົບຊັງດໍຣຈ ພ້ອມດ້ວຍຄະນະ ໄດ້ພົບປະເຮັດວຽກຮ່ວມກັບທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງ ຊາດລາວ, ສອງຝ່າຍໄດ້ແຈ້ງສະພາບໂດຍຫຍໍ້ ຂອງແຕ່ລະປະເທດ, ສະພາແຫ່ງຊາດ ກໍຄື ກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງ 2 ຫ້ອງວ່າການສະພາແຫ່ງຊາດ ລາວ ແລະ ມົງໂກລີ ແລະ ສົນທະນາແລກປ່ຽນບາງບັນຫາສໍາຄັນທີ່ຕ່າງຝ່າຍຕ່າງ ໃຫ້ຄວາມສົນໃຈ, ພ້ອມທັງໄດ້ຮ່ວມກັນລົງນາມ ໃນບົດບັນ ທຶກຊ່ວຍຈໍາວ່າດ້ວຍການຮ່ວມມື (MOU) ລະຫວ່າງ ຄະນະເລຂາທິການສະພາແຫ່ງຊາດ ແຫ່ງ ສປປລາວ ແລະ ຫ້ອງວ່າການສະພາຄູຣານໃຫຍ່ ແຫ່ງ ມົງໂກລີ ເພື່ອເປັນບ່ອນອີງສຳຄັນທາງດ້ານນິຕິກຳໃນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮວມມືອັນເປັນມູນເຊື້ອ ລະຫວ່າງ ສອງປະເທດ ລາວ-ມົງໂກລີ ໃຫ້ສືບຕໍ່ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ.
ນອກຈາກນີ້, ທ່ານ ນາງ ເອີນຊີໄຊຄັງ ລົບຊັງດໍຣຈ ແລະ ຄະນະ ຍັງຈະໄດ້ສືບຕໍ່ ພົບປະເຮັດວຽກຮ່ວມກັບເລຂາທິການສະພາປະຊາຊົນນະຄອນຫຼວງວຽງຈັນ, ເລຂາທິການ ສະພາປະຊາຊົນແຂວງຫຼວງພະບາງ, ຢ້ຽມຂໍ່ານັບທ່ານປະທານສະພາປະຊາຊົນ ແຂວງຫຼວງພະບາງ ແລະ ຢ້ຽມຊົມສະຖານທີ່ທ່ອງທ່ຽວທາງດ້ານວັດທະນະທໍາ ແລະ ທໍາມະຊາດ ແລະ ສະຖານທີ່ຜະລິດເຄື່ອງຫັດຖະກໍາຈໍານວນໜຶ່ງ ຢູ່ນະຄອນຫຼວງວຽງຈັນ, ແຂວງຫຼວງພະບາງ ແລະ ເມືອງວັງວຽງ, ແຂວງວຽງຈັນອີກດ້ວຍ.
(ພາບ ແລະ ຂ່າວ: ສອນສັກ ວັນວິໄຊ)