ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 9-14 ກຸມພາ 2022 ທີ່ຜານມານີ້ ທ່ານ ສົມມາດ ພົລເສນາ ກໍາມະການສູນກາງພັກ, ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈໍາປາສັກ ສົມທົບກັບບັນດາທ່ານສະມາຊິກສະພາປະຊາຊົນແຂວງ ພ້ອມຄະນະ ໄດ້ລົງພົບປະຜູ້ມີສິດເລືອກຕັ້ງ ແລະ ເຮັດວຽກຢູ່ແຂວງຈໍາປາສັກ ໂດຍປະກອບມີຫຼາຍຈຸດເຄື່ອນໄຫວຄື: ພົບປະພະນັກງານການນໍາ ແລະ ລັດທະກອນຢູ່ສໍານັກງານເມືອງສຸຂຸມາ, ບ້ານຫ້ວຍແຫ່, ບ້ານໂນນຍາງ ແລະ ບ້ານທາດສາມປາງ; ເຂົ້າຮ່ວມເປັນຄະນະປະທານ ພິທີເປີດໂຄງການປັບປຸງສະພາບແວດລ້ອມສີຂຽວຕາມເສັ້ນທາງຫຼວງ ແລະ ສວນສາທາລະນະໃນນະຄອນປາກເຊ; ພົບປະນາຍ-ພົນທະຫານ ກອງບັນຊາການທະຫານແຂວງຈໍາປາສັກ ແລະ ໂຮງຮຽນວຽງໄຊ; ຢ້ຽມຢາມບໍລິສັດດ້າຍຖັງ ແລະ ກຸ່ມຜະລິດພືດສະອາດ ຂອງປະຊາຊົນບ້ານຫ້ວຍເສັດ (ເມືອງປາກຊ່ອງ); ຢ້ຽມຢາມດ່ານຂົນສົ່ງທ່າບົກວັງເຕົ່າ, ເຂົ້າຮ່ວມຄະນະປະທານພິທີເປີດງານປູກຕົ້ນດອກຈໍາປາ(ຢູ່ວັດພູຈໍາປາສັກ) ແລະ ພົບປະພະນັກງານການນໍາ ແລະ ລັດຖະການ ສໍານັກງານປົກຄອງແຂວງຈໍາປາສັກ. ໂດຍມີຈຸດປະສົງເພື່ອຜົນສຳເລັດກອງປະຊຸມສະໄໝວິສາມັນເທື່ອທີ 1, ກອງປະຊຸມສະໄຫມສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະພາປະຊາຊົນແຂວງຈໍາປາສັກ ຊຸດທີ II ພ້ອມທັງຮັບຟັງຄໍາຄິດເຫັນຄໍາສະເໜີຂອງຜູ້ມີສິດເລືອກຕັ້ງ.

ການເຄື່ອນໄຫວໃນແຕ່ລະຈຸດ, ໄດ້ຮັບຟັງການລາຍງານສະພາບຈຸດພິດຂອງການນໍາພາຈັດຕັ້ງປະຕິບັດວຽກງານ ຈາກບັນດາຄະນະນໍາ ແລະ ອໍານາດການປົກຄອງ, ເຊິ່ງເຫັນໄດ້ຜົນງານດ້ານດີ ແລະ ຂໍ້ຄົງຄ້າງບາງດ້ານ ທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດ.

ໂອກາດດັ່ງກ່າວ, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຕີລາຄາສູງຕໍ່ໝາກຜົນຜົນງານຂອງແຕ່ລະພາກສ່ວນຍາດມາໄດ້ ພ້ອມທັງມີຄໍາເຫັນໂອ້ລົມ ໂດຍໄດ້ເຜີຍແຜ່ຜົນເນື້ອໃນສໍາເລັດກອງປະຊຸມສະໄໝວິສາມັນເທື່ອທີ1- ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຈໍາປາສັກ ຊຸດທີ II ທີ່ໄດ້ພິຈາລະນາຮັບຮອງເອົາຫຼາຍບັນຫາສໍາຄັນ ທີ່ເປັນພື້ນຖານຂອງຊາດ ແລະ ຂອງທ້ອງຖິ່ນ ອອກເປັນມະຕິກອງປະຊຸມຈໍານວນຫຼາຍມະຕິ ໂດຍສະເພາະເນື້ອໃນຂອງ 2 ວາລະແຫ່ງຊາດ ທີ່ລັດຖະບານ ແລະ ອົງການປົກຄອງທ້ອງຖິ່ນ ຈະໄດ້ສຸມໃສໃນການຈັດຕັ້ງປະຕິບັດ.

ຕິດພັນກັບການຢ້ຽມຢາມຖາມຂ່າວ, ຮັບຟັງຄໍາຄິດເຫັນ ແລະ ຄໍາສະເໜີ ເຊິ່ງພໍ່ແມ່ປະຊາຊົນໄດ້ສະເໜີຫຼາຍຕໍ່ບັນດາທ່ານຜູ້ແທນ ເຊິ່ງເປັນບັນຫາທີ່ຕິດພັນກັບວຽກງານການສ້າງສາພັດທະນາປະເທດຊາດ ກໍຄືທ້ອງຖິ່ນຂອງຕົນ, ການພັດທະນາທີ່ສົ່ງຜົນກະທົບຕໍ່ສິ່ງແວດລ້ອມ, ການຄຸ້ມຄອງລັດຄຸ້ມຄອງສັງຄົມ, ວຽກງານການສຶກສາທິການ, ວຽກງານກາທ່ອງທ່ຽວ ແລະ ອື່ນໆ. ຕໍ່ກັບຄໍາສະເໜີຂອງຜູ້ມີສິດເລືອກຕັ້ງ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນຊີ້ແຈ້ງອະທິບາຍຕໍ່ບາງຄໍາເໜີກັບທີ່ ພ້ອມທັງຮັບເອົາຄໍາສະເໜີທີ່ບໍ່ສາມາດຊີ້ແຈງໄດ້ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງຂັ້ນຕ່າງໆແກ້ໄຂ.

(ພາບ-ຂ່າວ: ສົມວິຈິດ ໄຊມົນຕີ)