(ສພຊ) ໃນຕອນບ່າຍຂອງວັນທີ 21 ເມສາ 2023 ທີ່ສະພາແຫ່ງຊາດ, ສະຫາຍ ຄໍາໃບ ດໍາລັດ ຮອງປະ ທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ນາງ ຟຸງ ທິ ຫົງ ຮ່າ ກໍາມະການ ປະຈໍາພັກນະຄອນຫຼວງຮ່າໂນ້ຍ, ຮອງປະທານສະພານະຄອນຫຼວງຮ່າໂນ້ຍ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ເຮັດວຽກຮ່ວມກັບສະພາປະຊາຊົນນະຄອນຫຼວງວຽງຈັນ ໃນລະຫວ່າງວັນ ທີ 20-23 ເມສາ 2023.
​ ໂອກາດດັ່ງກ່າວ ສະຫາຍ ຄໍາໃບ ດໍາລັດ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສະ ຫາຍ ນາງ ຟຸງ ທິ ຫົງ ຮ່າ ໃນການມາຢ້ຽມຢາມ ສປປລາວ ໃນຄັ້ງນີ້ ເປັນການນໍາເອົາໄມຕີຈິດມິດຕະພາບທີ່ສະໜິດ ສະໜົມຂອງລັດຖະບານ, ສະພາແຫ່ງຊາດ, ສະພາປະຊາຊົນຂັ້ນທ້ອງຖິ່ນ ກໍຄືປະຊາຊົນຫວຽດນາມອ້າຍນ້ອງມາສູ່ ລັດຖະບານ, ສະພາແຫ່ງຊາດ ກໍຄືປະຊາຊົນລາວບັນດາເຜົ່າ ເຊິ່ງເປັນການຮັດແໜ້ນສາຍພົວພັນລະຫວ່າງ ສະພາປະ ຊາຊົນນະຄອນຫຼວງວຽງຈັນ ກັບ ສະພາປະຊາຊົນນະຄອນຫຼວງຮ່າໂນ້ຍ ກໍຄືສະພາແຫ່ງຊາດລາວ ແລະ ສະພາແຫ່ງ ຊາດຫວຽດນາມ ທັງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງ ໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ກໍຄື ລະຫວ່າງສອງສະພາແຫ່ງຊາດ ລາວ ແລະ ຫວຽດນາມ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ ພ້ອມທັງແຈ້ງໃຫ້ຮູ້ກ່ຽວກັບການສະເຫຼີມສະຫຼອງປີສາ ມັກຄີມິດຕະພາບ (ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວ ພັນການທູດ ຄົບຮອບ 60 ປີ) ຢ່າງເປັນຂະບວນຟົດຟື້ນ ໃນປີ 2022 ຜ່ານມາ ແຈ້ງໃຫ້ຮູ້ກ່ຽວກັບຜົນງານການ ເຄື່ອນໄຫວໃນໄລຍະຜ່ານມາ ແລະ ແຜນການເຄື່ອນໄຫວຂອງສະພາແຫ່ງຊາດລາວ ໃນຕໍ່ໜ້າ ເປັນຕົ້ນແມ່ນໄດ້ໄປ ຖອດຖອນບົດຮຽນກັບ ສສ.ຫວຽດນາມ ເຊິ່ງລົງເລິກຂົງເຂດລະບົບກົງຈັກ-ການຈັດຕັ້ງຂອງສະພາປະຊາຊົນຂັ້ນ ທ້ອງຖິ່ນ ຢູ່ນະຄອນດານັງ ແຂວງກວາງນາມ ແລະ ນະຄອນຫຼວງຮ່າໂນ້ຍ ໃນເດືອນກຸມພາທີ່ຜ່ານມາ ແລະ ຄາດ ຄະເນໃນເດືອນທັນວາ ປີ 2023 ນີ້ ສະພາແຫ່ງຊາດລາວ ຈະໄດ້ຮັບກຽດເປັນເຈົ້າພາບຈັດກອງປະຊຸມລັດຖະສະພາ 3 ປະເທດ (ກໍາປູເຈຍ-ລາວ-ຫວຽດນາມ CLV) ແລະ ໃນເດືອນສິງຫາ ປີ 2024 ຈະເປັນເຈົ້າພາບຈັດກອງປະຊຸມ ລັດຖະສະພາອາຊຽນ (ໄອປາ AIPA).
​ ສະຫາຍ ນາງ ຟຸງ ທິ ຫົງ ຮ່າ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ຄໍາໃບ ດໍາລັດ ທີ່ໄດ້ເສຍສະຫຼະ ເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ພ້ອມທັງລາຍງານໃຫ້ຮູ້ກ່ຽວກັບຈຸດປະສົງຂອງການຢ້ຽມຢາມເຮັດ ວຽກຢູ່ ສປປລາວ ໃນຄັ້ງນີ້ ໃຫ້ສະຫາຍ ຮອງປະທານສະພາແຫ່ງຊາດ ແຫ່ງ ສປປລາວ ຮັບຮູ້.
(ພາບ ແລະ ຂ່າວ: ສອນສັກ ວັນວິໄຊ)