ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 18 ຫາ 20 ຕຸລາ 2022 ນີ້, ທ່ານ ນາງ ພູທອນ ແກ້ວພູວົງ ຮອງປະທານຄະນະປະຈໍາສະພາປະຊາຊົນແຂວງ ຮອງປະທານສະພາປະຊາຊົນແຂວງສະຫວັນນະເຂດ  ພ້ອມດ້ວຍບັນດາທ່ານ ສສຊ, ສສຂ, ຮອງເລຂາທິການ ສພຂ, ຫົວໜ້າ-ຮອງຫົວໜ້າຂະແໜງ ແລະ ວິຊາການທີ່ກ່ຽວຂ້ອງພາຍໃນສະພາປະຊາຊົນແຂວງ ໄດ້ລົງຕິດຕາມກວດກາ ຊຸກຍູ້ການຈັດຕັ້ງປະຕິບັດມະຕິກອງປະຊຸມສະໄຫມສາມັນ ເທື່ອທີ 02, 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ຢູ່ 04 ເມືອງ ແລະ 01 ນະຄອນ ຄື:

ເມືອງອຸທຸມພອນ; ເມືອງໄຊບູລີ, ເມືອງອາດສະພັງທອງ; ເມືອງອາດສພອນ ແລະ ນະຄອນໄກສອນພົມວິຫານ ໂດຍມີຄະນະນຳນະຄອນ, ເຈົ້າເມືອງ ພ້ອມຄະນະ ແລະ ທ່ານ ສສຂ ທີ່ປະຈຳຢູ່ ເມືອງ, ນະຄອນ,ພ້ອມດ້ວຍບັນດາຫົວໜ້າຫ້ອງການ ແລະ ພະນັກງານຫຼັກແຫຼ່ງຂອງເມືອງທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ຈຸດປະສົ່ງ ໃນການເຄື່ອນໄຫວໃນຄັ້ງນີ້ ກໍເພື່ອເປັນການຕິດຕາມຕິດຕາມກວດກາ ຊຸກຍູ້ການຈັດຕັ້ງປະຕິບັດມະຕິກອງປະຊຸມສະໄຫມສາມັນ ເທື່ອທີ 02, 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ກ່ຽວກັບການຈັດຕັ້ງປະຕິບັດຜ່ານມາມີຂໍ້ສະດວກ ແລະ ຂໍ້ຫຸ້ຍງຍາກແນວໃດ ເພື່ອເປັນຖານຂໍ້ມູນໃຫ້ແກ່ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 13 ແລະ ສະມາຊິກສະພາປະຊາຊົນແຂວງ ທີ່ຈະເຂົ້າຮ່ວມໃນກອງປະຊຸມສະໄຫມສາມັນ ເທື່ອທີ 04 ຂອງ ສະພາແຫ່ງຊາດ ຊຸດທີ IX ທີ່ຄາດວ່າຈະໄດ້ຈັດຂຶ້ນໃນເດືອນທັນວາ ແລະ ສະພາປະຊາຊົນແຂວງ ຊຸດທີ II ຕື່ມອີກ.

ຊຶ່ງທາງຄະນະກໍໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຕ່ລະເມືອງ ແລະ ນະຄອນ ຈາກການນຳໂດຍສັງເຂບ ຈາກນັ້ນ ປະທານກອງປະຊຸມກໍ່ໄດ້ເປີດໂອກາດໃຫ້ບັນດາທ່ານ ສສຊ, ສສຂ ແຕ່ລະຄະນະກໍາມະການທີ່ຕິດຕາມໃນຄະນະ ໄດ້ແລກປ່ຽນ ແລະ ເຈາະຈິ້ມຂອງແຕ່ລະຂົງເຂດວຽກງານໂດຍກົງເປັນຕົ້ນ:  ຂົງເຂດວຽກງານເສດຖະກິດ,ແຜນການ ແລະ ການເງີນ; ຂົງເຂດວຽກງານວັດທະນະທໍາ-ສັງຄົມ ແລະ ບັນດາເຜົ່າ ແລະ ຂົງເຂດວຽກງານປ້ອງກັນຊາດ-ປ້ອງດັນຄວາມສະຫງົບ ໃນໄລຍະຜ່ານມາເປັນແນວໃດ ຊຶ່ງບັນດາພາກສ່ວນທີ່ກ່ຽວຂ້ອງກໍໄດ້ຊີ້ແຈ້ງ ພ້ອມທັງຕອບຂໍ້ຊັກຖາມໃນແຕ່ລະບັນຫາຢ່າງກົງໄປກົງມາ  ເຮັດການເກັບກຳຂໍ້ມູນ ແລະ ການຕິດຕາມກວດກາໃນຄັ້ງນີ້, ມີປະສິດທິຜົນ, ຮູ້ໄດ້ເຖິງສະພາບລວມ ດ້ານຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດຂອງແຂວງ  ກໍຄືຢູ່ບັນດາ 04 ເມືອງ ແລະ 01 ນະຄອນ.

ໃນຕອນທ້າຍຂອງກອງປະຊຸມ ທ່ານນາງ ພູທອນ ແກ້ວພູວົງ ກໍໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ກັບຄະນະນຳ ກໍຄືບັນດາພາກສ່ວນທີ່ກ່ຽວຂ້ອງ ທີ່ໄດ້ສະໜອງຂໍ້ມູນຮອບດ້ານໃນຄະນະທີມງານ ທີ່ມາເຄືອນໄຫວໃນຄັ້ງນີ້ ຊຶ່ງເປັນຂໍ້ມູນພື້ນຖານທີ່ສຳຄັນ ໃຫ້ແກ່ບັນດາທ່ານ ສສຊ ແລະ ສສຂ ທີ່ຈະກະກຽມເຂົ້າຮ່ວມໃນກອງປະຊຸມສະໄຫມສາມັນ ເທື່ອທີ 04 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ນອກຈາກນີ້, ທ່ານຍັງໄດ້ຮຽກຮຽກໃຫ້ທຸກພາກສ່ວນຈົ່ງພ້ອມພາກັນສືບຕໍ່ຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 02, 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ໄປຈັດຕັ້ງຜັນຂະຫຍາຍໃຫ້ມີຄວາມສອດຄ່ອງ ແລະ ພ້ອມກັນຈັດຕັ້ງປະຕິບັດໃຫ້ເກີດດອກອອກຜົນດີຂື້້ນເລື້ອຍໆບັນລຸໄດ້ຕາມລະດັບຄາດໝາຍທີ່ກຳນົດໄວ້ອີກດ້ວຍ.

ພາບ-ຂ່າວ: ນາງ ຄອນສະຫວັນ ເມກສະຫວັນ.