ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງ ວັນທີ 19-23 ກັນຍາ 2022 ນີ້ ທ່ານ ສິງຕັນ ໄຊລືຊົ່ງ ຄະນະປະຈໍາ, ຮອງປະທານສະພາປະຊາຊົນແຂວງຫຼວງພະບາງ ໄດ້ລົງຈັດຕັ້ງຜັນຂະຫຍາຍຜົນສຳເລັດກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II. ຢູ່ເມືອງ ໂພນທອງ ແຂວງຫຼວງພະບາງ ລວມທັງໝົດ 5 ຈຸດຄື: ສຳນັກເມືອງ ໂພນທອງ, ບ້ານ ຫ້ວຍເຮ້ຍ, ບ້ານ ທອງເໜືອ, ບ້ານ ທອງສີ ແລະ ບ້ານ ກາງ, ມີຜູ້ເຂົ້າຮ່ວມຮັບຟັງທັງໝົດ ສາມຮ້ອຍກວ່າ ຄົນ, ຍິງ ຮ້ອຍກວ່າ ຄົນ.

ການລົງເຄື່ອນໄຫວວຽກງານໃນຄັ້ງນີ້ ແມ່ນນໍາເອົາຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງ ສະພາປະຊາຊົນແຂວງ ຊຸດທີ II ມາເຜີຍແຜ່ໃຫ້ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພາຍໃນເມືອງໄດ້ຮັບຮູ້ ແລະ ເຂົ້າໃຈຕໍ່ບັນຫາສຳຄັນຕ່າງໆ ທີ່ໄດ້ພິຈາລະນາ ແລະ ຮັບຮອງເອົາຢູ່ໃນກອງປະຊຸມ ຂອງສະພາປະຊາຊົນແຂວງ ຊຸດທີ II, ພ້ອມທັງໄດ້ຮັບຟັງຄຳຄິດຄຳເຫັນ, ຄຳສະເໜີຂອງຜູ້ມີສິດເລືອກຕັ້ງ ເຊິ່ງເຫັນໄດ້ຫຼາຍບັນຫາທີ່ຕິດພັນກັບວຽກງານ ແຜນພັດທະນາເສດຖະກິດ-ສັງຄົມ ແລະ ວຽກງານອື່ນໆ ຈຳນວນໜຶ່ງ

ຕອນທ້າຍ ທ່ານ ສິງຕັນ ໄຊລືຊົ່ງ ຄະນະປະຈໍາພັກແຂວງ, ຮອປະທານສະພາປະຊາຊົນແຂວງຫຼວງພະບາງ ກໍ່ໄດ້ອະທິບາຍຊີ້ແຈງຕໍ່ກັບ ຄໍາສະເໜີຕ່າງໆ ໃຫ້ຜູ້ມີສິດເລືອກຕັ້ງເຂົ້າໃຈກັບທີ່ ແລະ ຮັບເອົາບາງ ຄໍາສະເໜີ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງຄົ້ນຄວ້າພິຈາລະນາ ແລະ ແກ້ໄຂໃຫ້ຖືກຕ້ອງຕາມລະບຽບກົດໝາຍ, ພ້ອມດຽວກັນນີ້ ທ່ານ ຍັງໄດ້ຮຽກຮ້ອງໃຫ້ອົງການປົກຄອງເມືອງ, ອົງການປົກຄອງບ້ານ, ແຕ່ລະບ້ານ, ເອົາໃຈໃສ່ຍົກສູງ, ດ້ານຄວາມສາມັກຄີພາຍໃນບ້ານໃຫ້ໜັກແໜ້ນ, ເປັນເຈົ້າການໃນການຈັດຕັ້ງປະຕິບັດ

ລະບຽບກົດໝາຍ,  ໃຫ້ຖືກຕ້ອງ, ຕ້ານ ແລະ ສະກັດກັ້ນການຄ້າ-ຂ້າຍ, ການເສບຢາເສບຕິດພາຍໃນບ້ານ, ເມືອງ ຂອງຕົນໃຫ້ລຸດນ້ອຍຖອຍລົງເທື່ອລະກ້າວ, ເພື່ອເຮັດໃຫ້ບ້ານ-ເມືອງ ມີຄວາມສະຫງົບ ແລະ ປອດໄພຈາກຢາເສບຕິດ ເທື່ອລະກ້າວ. ໃນການລົງເຜີຍແຜ່ໃນຄັ້ງນີ້ທ່ານ ຍັງໄດ້ນໍາເອົາ ຄອມພີວເຕີ ຕັ້ງໂຕະ ຈໍານວນ 1 ຊຸດ ມອບໃຫ້ເມືອງເພື່ອນໍາໃຊ້ເຂົ້າໃນວຽກງານໃຫ້ມີຄວາມສະດວກວ່ອງໄວຂື້ນກວ່າເກົ່າ.

           ຂ່າວ: ຫຸມພັນ ອໍາພອນ