ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນທີ 25 ເມສາ 2022 ທີ່ສະໂມສອນເມືອງຂວາ, ແຂວງຜົ້ງສາລີ ທ່ານ ຫຸມເພັງ ຈອມວິສານ ຮອງປະທານສະພາປະຊາຊົນແຂວງ ພ້ອມດ້ວຍທີມງານ ໄດ້ລົງເຄື່ອນໄຫວຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນກັບວຽກງານເຊົ່າ-ສໍາປະທານທີ່ດິນຂອງລັດ ແລະ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ, ເຂົ້າຮ່ວມມີບັນດາທ່ານ ສະມາຊິກສະພາປະຊາຊົນແຂວງ ປະຈໍາເມືອງ, ບັນດາທ່ານຮອງເລຂາພັກເມືອງ, ຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການທຽບເທົ່າຫ້ອງການຂັ້ນເມືອງ, ກອງບັນຊາການ ປກຊ-ປກສ ເມືອງ  ອົງການແນວລາວສ້າງຊາດເມືອງ, ສະຫາພັນນັກຮົບເກົ່າເມືອງ, ອົງການຈັດຕັ້ງມະຫາຊົນຂັ້ນເມືອງ ເຂົ້າຮ່ວມ.

ເພື່ອເປັນການຈັດຕັ້ງປະຕິບັດສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບເລກທີ 12/ສພຊ, ລົງວັນທີ 15 ພະຈິກ 2016 ໄດ້ກໍານົດ; ໂດຍສະເພາະແມ່ນການປະຕິບັດຕາມ ມະຕິຂອງສະພາແຫ່ງຊາດສະບັບເລກທີ 25/ສພຊ, ລົງວັນທີ 19 ພະຈິກ 2019 ແລະ ມະຕິກອງປະຊຸມຂອງສະພາປະຊາຊົນແຂວງ ວ່າດ້ວຍການຮັບ ຮອງເອົາການສະເໜີປົດ (ລຶບ) ບັນຊີຄ້າງຂອງບັນດາໂຄງການສ້າງສັນຍາເຊົ່າ-ສຳປະທານທີ່ດິນຂອງລັດ ສະບັບເລກທີ 69/ສພຂ.ຜລ, ລົງວັນທີ 24 ທັນວາ 2020; ກ່ຽວກັບ ການຕິດຕາມ, ກວດກາ ການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍທີ່ພົວພັນກັບວຽກງານເຊົ່າ ແລະ ສໍາປະທານທີ່ດິນຂອງລັດ ໃນການດໍາເນີນກິດຈະການຕ່າງໆ ຢູ່ພາຍໃນແຂວງຜົ້ງສາລີ ເພື່ອຮັບປະກັນໃນການຄຸ້ມຄອງ, ນໍາໃຊ້ທີ່ດິນໃຫ້ມີປະສິດທິພາບ, ປະສິດທິຜົນສູງ.

ທີ່ກອງປະຊຸມ ໄດ້ຮັບຟັງ ທ່ານ ວົງເດືອນ ພູມມີທຳ ກໍາມະການປະຈໍາພັກເມືອງ, ຮອງເຈົ້າເມືອງ ຜູ້ຊີ້ນຳຂົງເຂດເສດຖະກິດ ຂຶ້ນລາຍງານການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ ແລະ ວຽກງານສໍາປະທານທີ່ດິນຂອງລັດ ໃນໄລຍະຜ່ານມາ, ຮັບຟັງ ທ່ານ ພົມມີ ອິນມະສອນ ຮອງເລຂາພັກເມືອງ, ປະທານກວດກາພັກ-ລັດເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງໃໝ່ ຂຶ້ນລາຍງານ ການຈັດຕັ້ງປະຕິບັດໜ້າທີ່ວຽກງານຂອງ ຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ, ຮັບຟັງ ທ່ານ ຈອມແສງ ສີວົງສາ ວິຊາການຂະແໜງຈັດຕັ້ງ-ກວດກາ ຂຶ້ນແນະນໍາການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ ແລະ ບຸກຄະລາກອນເສນາທິການຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ.

ຕອນທ້າຍຂອງກອງປະຊຸມ ທ່ານ ຫຸມເພັງ ຈອມວິສານ ໃນນາມປະທານກອງປະຊຸມ ຍັງໄດ້ເໜັ້ນບາງບັນຫາຕໍ່ກອງປະຊຸມ ໂດຍສະເພາະແມ່ນ ໃຫ້ອົງການປົກຄອງເມືອງຕ້ອງເອົາໃຈໃສ່ ກ່ຽວກັບວຽກງານການເຊົ່າ, ສໍາປະທານທີ່ດິນຂອງລັດ ໂດຍສະເພາະກວດກາຄືນລະອຽດສັນຍາ ເຊົ່າ, ສໍາປະທານບັນດາກິດຈະການທີ່ຂັ້ນເມືອງຄຸ້ມຄອງ ໃຫ້ຄົບຖ້ວນຕາມກົດໝາຍກຳນົດ, ຮຽກຮ້ອງຂະແໜງການກ່ຽວຂ້ອງຂັ້ນເມືອງ ໃຫ້ການປະສານງານທີ່ດີກັບຄະນະສະມາຊິກສະພາປະຊາຊົນແຂວງ ປະຈໍາເມືອງ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ກໍ່ຕ້ອງເອົາໃຈໃສ່ປະຕິບັດໜ້າທີ່ຕາມຂອບເຂດສິດ ແລະ ໜ້າທີ່ຂອງຕົນຢ່າງເຂັ່ມງວດ.

ຕອນບ່າຍຂອງວັນດຽວກັນ ທາງຄະນະທິມງານສະພາປະຊາຊົນແຂວງ ໂດຍສົມທົບທີມງານເມືອງ ໄດ້ລົງຕິດຕາມ, ກວດກາ ການຊົດເຊີຍຜົນກະທົບຈາກໂຄງການກໍ່ສ້າງ ເຂື່ອນໄຟຟ້ານໍ້າອູ 4 ແລະ ການຈັດສັນອາຊີບຄົງທີ່ໃຫ້ກັບປະຊາຊົນທີ່ຖືກຜົນກະທົບຈາກເຂື່ອນດັ່ງກ່າວ ຢູ່ຈຸດກຸ່ມຫ້ວຍແອ່ນ ເຊິ່ງທ່ານ ຫຸ່ມເພັງ ຈອມວິສານ ໄດ້ສະ  ເໜີຈຸດປະສົງຂອງການລົງເຮັດວຽກໃນຄັ້ງນີ້ ແລະ ໄດ້ຮັບຟັງ ທ່ານ ວັນດີ ຈັນທະບູສອນ ກຳມະການພັກເມືອງ ເລຂາພັກ ກຸ່ມຫ້ວຍແອ່ນ ລາຍງານກ່ຽວກັບ ສະພາບການລວມຂອງກຸ່ມໂດຍຫຍໍ້, ເຊິ່ງໃນໄລຍະຜ່ານມາແມ່ນໄດ້ສຶກສາອົບຮົມການເມືອງແນວຄິດໃຫ້ພະນັກງານ, ອຳນາດການປົກຄອງບ້ານ ແລະ ພໍ່ແມ່ປະຊາຊົນພາຍໃນກຸ່ມໃຫ້ຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ – ລັດ, ໄດ້ແກ້ໄຂປະກົດການຫຍໍ້ທໍ້ໃນສັງຄົມໂດຍຕິດພັນກັບວາລະແຫ່ງຊາດ ເປັນຕົ້ນບັນຫາຢາເສບຕິດ ໃຫ້ຫຼຸດໜ້ອຍຖອຍລົງເທື່ອລະກ້າວ ແລະ ໃນການລົງເຄື່ອນໄຫວດັ່ງກ່າວ ໄດ້ຮັບຟັງຄໍາສະເໜີ, ຂໍ້ຂ້ອງໃຈຂອງປະຊາຊົນຜູ້ທີ່ຖືກຜົນກະທົບຈາກການກໍ່ສ້າງເຂື່ອນໄຟຟ້ານໍ້າອູ 4, ເຊິ່ງ ທ່ານ ຮອງເຈົ້າເມືອງ ຜູ້ຊີ້ນຳຂົງເຂດເສດຖະກິດ ໄດ້ຊີ້ແຈງຕໍ່ກັບຂໍ້ສະເໜີ ແລະ ຂໍ້ຂ້ອງໃຈດັ່ງກ່າວ.

ໃນໂອກາດດຽວກັນນີ້ ທ່ານ ຫຸມເພັງ ຈອມວິສານ ໄດ້ສັງລວມຄືນບາງບັນຫາ ຕໍ່ກັບບັນດາຄໍາສະເໜີ ແລະ ຂໍ້ຂ້ອງໃຈຂອງພໍ່ແມ່ປະຊາຊົນ ພ້ອມທັງເໜັ້ນໜັກ ແລະ ມອບໃຫ້ອົງການປົກຄອງເມືອງ ເປັນເຈົ້າການ ປະສານກັບໜ່ວຍງານທີ່ກ່ຽວຂ້ອງ ໃນການແກ້ໄຂ ຄໍາສະເໜີດັ່ງກ່າວ.

ພາບ-ຂ່າວ: ພຸດສະດີ ແສງຈອມຄູນ.