ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​​ເນື່ອງ​ໃນ​​ໂອກາດ​ສົ່ງ​ທ້າຍ​ປີ​ເກົ່າ​ຕອນ​ຮັບ​ປີ​ໃໝ່ລາວ ຄສ 2565​ໃກ້ຊິ​ມາ​ມູນ​ວຽນບັນຈົບ​ຄົບຮອບ​ອີກ​ຄັ້ງໜຶ່ງ, ສະ​ນັ້ນ​ມາ ​ໃນ​ວັນ​ທີ 6  ​ເມສາ 2022 ຢູ່​ທີ່​ຫ້ອງ​ປະຊຸມ​ສະພາ​ປະຊາຊົນ​ແຂວງ ຄະນະ​ສະມາຊິກ​ສະພາ​ປະຊາຊົນ​ແຂວງ​ເຫ​ງະ​ອານ ສສ ຫວຽດນາມ ນໍາ​​ໂດຍທ່ານ ຫງວຽນ ນາມ ດິ່ງ ຄະນະ​ປະ​ຈໍາ​ພັກ​ແຂວງ, ຮອງ​ປະທານ​ສະພາ​ປະຊາຊົນ​ແຂວງ​ເຫ​ງະ​ອານ ພ້ອມ​ດ້ວຍ​ຄະນະ ​ໄດ້​ເຂົ້າ​ອວຍພອນປະທານ​ສະພາ​ປະຊາຊົນ​ແຂວງ​ຊຽງຂວາງ ​ເຊິ່ງ​ໃຫ້ກຽດຕ້ອນຮັບ​​ໂດຍ ທ່ານ ບຸນ​​ໂຮມ ​ເທດ​ທານີ ຮອງ​ເລຂາ​ພັກ​ແຂວງ ປະທານ​ສະພາ​ປະຊາຊົນ​ແຂວງ​ຊຽງຂວາງ, ມີ​ບັນດາ​ທ່ານ​ຄະນະ​ປະ​ຈໍາ​ສະພາ​ປະຊາຊົນ​ແຂວງ, ​ເລຂາທິການ, ຫົວໜ້າ-ຮອງ​ຫົວໜ້າຂະ​ແໜງຕະຫຼອດຮອດພະນັກງານ​ສະພາ​ປະຊາຊົນ​ແຂວງ ​ເຂົ້າ​ຮ່ວມ​ໃນ​ການ​ຕ້ອນຮັບ​ໃນ​ຄັ້ງ​ນີ້.

ເພື່ອ​ເປັນ​ການ​ປະ​ກອບສ່ວນ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ ​ແລະ ການ​ຮ່ວມ​ມື​ຮອບດ້ານ​ລະ​ຫວ່າງສະພາ​ປະຊາຊົນ​ແຂວງ​ເຫ​ງະ​ອານ ສສ ຫວຽດນາມ ​ແລະ   ສະພາ​ປະຊາຊົນ​ແຂວງ​ຊຽງຂວາງ, ​ເນື່ອງ​ໃນ​​ໂອກ​າດທີ່​ມາ​ຢ້ຽມຢາມ​ໃນ​ຄັ້ງ​ນີ້ ​ເປັນ​​ໂອກາດ​ອັນ​ດີ​ໃຫ້​ແກ່ຄະນະ​ຜູ້​ແທນ​ທັງ​ສອງ​ຝ່າຍ ​ເຊິ່ງ​ໄດ້ມີຄໍາ​​ເຫັນ​ ​ແລກປ່ຽນບົດຮຽນ​ເຊິ່ງກັນ ​ແລະ ກັນ ​ໃນ​ການ​ປະຕິບັດໜ້າທີ່​ວຽກງານ​ກໍ່​ຄື​ການ​ປະຕິບັດ​ພາລະ​ບາດ​ບົດ​ໃນ​ການ​ເປັນ​ຕົວ​ແທນ​ໃຫ້​ແກ່​ປະຊາຊົນ ​ເປັນ​ຕົ້ນ​ແມ່ນ​ໄດ້​​ແລກປ່ຽນສົນທະນາ​ກັນ​ກ່ຽວກັບ​​ໂຄງ​ປະກອບກົງຈັກ​ການຈັດ​ຕັ້ງ, ການ​ປະຕິບັດ​ພາລະ​ບົດ, ການ​ປ້ອງ​ກັນ​ການ​ແຜ່​ລະບາດ​ຂອງ​ພະຍາດ ​ໂຄ​ວິດ-19 ​.

​            ໃນ​​ໂອກາດ​ດັ່ງກ່າວ, ທ່ານ ບຸນ​ໂຮມ ​ເທດ​ທານີ ກໍ​​ໄດ້​ສະ​ແດງ​ການ​ຕ້ອນຮັບ​ຢ່າງ​ອົບ​ອຸ່ນ​ພ້ອມ​ຕີ​ລາຄາ​ສູງ​ໃນ​ການ​ຢ້ຽມຢາມ​ຂອງ​ສະພາ​ປະຊາຊົນ​ແຂວງ​ເຫ​ງະ​ອານ ສສ ຫວຽດນາມ ​ເຊິ່ງ​ເປັນ​ການ​ເສີມ​ຂະຫຍາຍ​ການ​ຮ່ວມ​ມື​ຮອບ​ດ້ານ​ໃນ​ການ​ປະຕິບັດໜ້າທີ່​ວຽກງານ ລະຫວ່າງ​ສະພາ​ປະຊາຊົນ​ແຂວງ​ເຫ​ງະ​ອານ ສສ ຫວຽດນາມ ກັບ​ສະພາ​ປະຊາຊົນ​ແຂວງ​ຊຽງຂວາງ ທີ່​ມີ​ມາ​ແຕ່​ດົນ​ນານ ​ໃຫ້​ນັບ​ມື້​ນັບ​ແໜ້ນ​ແຟ້ນກວ່າ​ເກົ່າ.

​                 ຕອນ​ທ້າຍ ທ່ານ ຫງວຽນ ນາມ ດິ່ງ ​ໄດ້​ອວຍພ​ອນປີ​ໃໝ່​ໃຫ້​ປະທານ​ສະພາ​ປະຊາຊົນ​ແຂວງ​ຕະຫຼອດຮອດ​ພະນັກງານ​ສະພາ​ປະຊາຊົນ​ແຂວງຈົ່ງ​ມີ​ສຸພາ​ບ​ແຂງ​ແຮງ, ມີ​ພາລາ​ນາ​ໄມ​ສົມບູນ ​ແລະ ສາມາດ​ຈັດ​ຕັ້ງ​ປະຕິບັດ​ວຽກງານ​ໃຫ້​​ໄດ້​ຕາມ​​ແຜນການ​ທີ່​ວາງ​ໄວ້.

ສະພາປະຊາຊົນແຂວງຊຽງຂວາງ

ຂ່າວໂດຍນາງ ສຸກສະຫວັນ ອິນທະແສງ