ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           ວັນທີ 4 ມີນາ 2022ນີ້ ທ່ານ ນາງ ຄໍາພອມ ພິມມະຈັນ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 04 ແຂວງອຸດົມໄຊ, ຮອງປະທານສະພາປະຊາຊົນແຂວງ ແລະ ທ່ານ ນາງ ມະນີຈັນ ວິໄລຈິດ  ເຈົ້າເມືອງເມືອງງາ ພ້ອມດ້ວຍສະມາຊິກສະພາປະຊາຊົນແຂວງ ໄດ້ນໍາເອົາໂທລະໂຄ່ງ, ຄອມພິວເຕີ, ເຂົ້າສານໜຽວ, ເຄື່ອງນຸ່ງຮົ່ມ ແລະ ອຸປະກອນການສຶກສາຈໍານວນໜຶ່ງໄປມອບໃຫ້ປະຊາຊົນບ້ານພູສູງນ້ອຍ ແລະ ໂຮງຮຽນມັດທະຍົມຕົ້ນ ບ້ານແກ່ວ.

                    ເຄື່ອງທີ່ນໍາໄປມອບຄັ້ງນີ້ປະກອບມີໂທລະໂຄ່ງ 1 ຊຸດ ມູນຄ່າ 4 ລ້ານ 2 ແສນກີບ, ເຂົ້າສານໜຽວ 200 ກິໂລ ມູນຄ່າ 1 ລ້ານ 9 ແສນກີບ ແລະ ເຄື່ອງນຸ່ງຮົ່ມຈໍານວນໜຶ່ງມອບໃຫ້ປະຊາຊົນ ບ້ານ ພູສູງນ້ອຍ, ຕາງໜ້າຮັບໂດຍອົງການປົກຄອງບ້ານ ພ້ອມດ້ວຍປະຊາຊົນພາຍໃນບ້ານ ພ້ອມນັ້ນວິຊາການ ຫ້ອງການ ຖວທ ເມືອງຍັງໄດ້ຊ່ວຍຕິດຕັ້ງໂທລະໂຄ່ງຢູ່ບ້ານພູສູງນ້ອຍຕື່ມອີກ ແລະ ມອບຄອມພີວເຕີຈໍານວນ 1 ຊຸດ ມູນຄ່າ 4 ລ້ານ 5 ແສນກີບ ແລະ ອຸປະກອນການຮຽນຈໍານວນໜຶ່ງໃຫ້ໂຮງຮຽນມັດທະຍົມຕົ້ນ ບ້ານແກ່ວ, ຮັບໂດຍຕາງໜ້າຄະນະອໍານວຍການ ພ້ອມດ້ວຍນ້ອງນັກຮຽນ.

          ເຄື່ອງຈຳນວນດັ່ງກ່າວແມ່ນໄດ້ມາຈາກການປະກອບສ່ວນຊ່ວຍເຫຼືອຂອງຄອບຄົວ ທ່ານ ຄໍາຫລ້າ ຜິວວັນນາ ເຈົ້າເມືອງເມືອງຫົງສາ, ຈາກພະແນກສາທາລະນະສຸກແຂວງ ແລະ ພາກສ່ວນອື່ນໆຈໍານວນໜຶ່ງ.

ທັງນີ້ກໍ່ເພື່ອເປັນການສະໜອງອຸປະກອນທີ່ຈໍາເປັນຮັບໃຊ້ເຂົ້າໃນວຽກງານຂອງບ້ານ ແລະ ປະກອບສ່ວນເຂົ້າໃນການຮຽນ-ການສອນ ໃຫ້ມີຄວາມວ່ອງໄວ ແລະ ສະດວກສະບາຍຂຶ້ນກວ່າເກົ່າ.

(ພາບ,ຂ່າວ: ແສງພອນ ອິນນະລົງ).