ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນເວລາບໍ່ດົນມານີ້ ພະແນກສຶກສາທິການ ແລະ ກິລາແຂວງຫຼວງພະບາງໄດ້ຈັດຕັ້ງກອງປະຊຸມຜູ້ບໍ່ລິຫານການສຶກສາ ແລະ ກິລາ ທົ່ວແຂວງຫຼວງພະບາງ ສົກຮຽນ 2021-2022 ທີ່ຫ້ອງປະຊຸມຂອງພະແນກສຶກສາທິການ ແລະ ກິລາແຂວງ, ໂດຍການເປັນປະທານຮ່ວມມີ: ທ່ານ ປອ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ສຸວິລັດ ພັນສຸເດດ ຮອງປະທານ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ ມີຜູ້ນຕາງໜ້າ, ຜູ້ບໍລິຫານການສຶກສາ ແລະ ກິລາ ຢູ່ບັນດາເມືອງ, ໂຮງຮຽນ, ສະຖາບັນການສຶກສາອ້ອມຂ້າງແຂວງ ແລະ ວິຊາການເຂົ້າຮ່ວມ.

ກອງປະຊຸມ ກໍໄດ້ຮັບຟັງມະຕິກອງປະຊຸມຜູ້ບໍລິຫານການສຶກສາ ແລະ ກິລາທົ່ວແຂວງຫຼວງພະບາງ,ລາຍງານຜົນການຈັດຕັ້ງປະຕິບັດ 15 ຄາດໝາຍ, ໃນນີ້ ຍັງໄດ້ຍົກໃຫ້ເຫັນ ສົກ 2021-2022 ທົ່ວແຂວງຫຼວງະບາງ ໄດ້ຈັດຕັ້ງປະຕິບັດຍຸດທະສາດ, ວຽກຈຸດສຸມ ແລະ ກິລາ ໃນ 15 ຄາດໝາຍ ທີ່ສະພາປະຊາຊົນແຂວງຮັບຮອງເອົາມີ 4 ຄາດໝາຍ ທີ່ບັນລຸໄດ້ ຄື: ດັດສະນີຄວາມສະເໝີພາຍຍິງ-ຊາຍ ອັດຕາການເລື່ອນຊັ້ນ ປ.5 ຫາ ມ.1, 3 ຄາດໝາຍ ພວມຈັດຕັ້ງປະຕິບັດ ແລະ 8 ຄາດໝາຍມີລັກຊະນະຖົດຖອຍ, ພ້ອມດຽວກັນນີ້ ຍັງໄດ້ຮັບຟັງຜົນສຳເລັດການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ສົກຮຽນ 2021-2022, ວຽກງານຈຸດສຸມ ສົກຮຽນ 2022-2023 ແລະ ແຜນຍຸດທະສາດການພັດທະນາຊັບພະຍາກອນມະນຸດແຕ່ນີ້ຮອດປີ 2025,ລາຍງານຜົນການຈັດຕັ້ງປະຕິບັດມະຕິກອງປະຊຸມຜູ້ບໍລິຫານທົ່ວແຂວງສົກຮຽນ 2021-2022, ລາຍງານການສອບເສັງນັກຮຽນເກັ່ງ, ການສອບເສັງ ຈົບຊັ້ນ ປ5, 4, 7 ແລະ ການສ້າງຕັ້ງກຸ່ມໂຮງຮຽນມັດທະຍົມ. ລາຍງານວຽກງານກິລາ-ກາຍຍະກຳ, ການຄຸ້ມຄອງການສຶກສາພາກເອກະຊົນ, ສະເໜີແນວຄວາມຄິດກ່ຽວກັບລະບົບ Lao edu and U-office. ນອກນີ້, ຍັງໄດ້ຮັບຟັງລາຍການຈັດຕັ້ງ ຮຽນການເມືອງໃຫ້ຄູຢູ່ເມືອງໂພນໄຊ, ເມືອງວຽງຄໍາ ແລະການຈັດຕັ້ງປະຕິບັດລັດຖະບັນຍັດ ເລກທີ 002/ປປທ, ຢູ່ນະຄອນຫຼວງພະບາງ ແລະ ເມືອງພູຄູນຕື່ມອີກ.

ຈາກນັ້ນ ຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນຄົ້ນຄວ້າ, ພິຈາລະນາ ແລະ ປະກອບຄໍາເຫັນຢ່າງກວ້າງຂວາງ ເລິກເຊິງ ໂດຍເລັ່ງໃສ່ແກ້ໄຂບັນຫາ ແລະ ປະກົດການຕ່າງໆ ທີ່ເກີດຂຶ້ນໃນວົງການສຶກສາ ແລະ ກິລາ ແລະໄດ້ມີຄວາມເປັນເອກະພາບກັນ ແລະ ຮັບຮອງເອົາບາງບັນຫາມາເປັນປະຊາມະຕິເຊັ່ນ: ຮັບຮອງເອົາບົດລາຍງານຜົນສຳເລັດການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ, ສົກຮຽນ 2021-2022, ຄາດໝາຍ ແລະ ວຽກຈຸດສຸມ ສົກຮຽນ 2022-2023; ຮັບຮອງເອົາບົດລາຍງານການຈັດຕັ້ງປະຕິບັດ ມະຕິກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳສົກຮຽນ 2021-2022.

ຂ່າວ: ເພັດສະໝອນ ທໍາມຸງຄຸນ