(ສພຊ) ວັນທີ 21 ສິງຫາ 2023 ທີ່ສະພາແຫ່ງຊາດ ແຫ່ງ ສປປລາວ, ສະຫາຍ ມະນີໂສ ຊາມຸນຕີ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ຕ້ອນຮັບສະຫາຍ ຫວໍ ຕວັນ ເຍິນ (Vo Tuan Nhan) ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຂົ້າຮ່ວມ ກອງປະຊຸມລັດຖະມົນຕີ ສິ່ງແວດລ້ອມອາຊຽນ ຄັ້ງທີ 17, ກອງປະຊຸມ ລັດຖະມົນຕີ ໝອກຄວັນຂ້າມຊາຍແດນ ຄັ້ງທີ 18 ແລະ ກອງປະຊຸມ ລັດຖະມົນຕີ ສິ່ງແວດລ້ອມອາຊຽນ ບວກ 3, ອາຊຽນ-ຍີ່ປຸ່ນ ແລະ ອາຊຽນ-ອາເມລິກາ, ການສະເຫຼີມສະຫຼອງ ວັນສັບປະດາ ອາຊຽນ-ຍີ່ປຸ່ນ, ພິທີມອບລາງວັນ ໂຮງຮຽນສິ່ງແວດລ້ອມສີຂຽວ ແລະ ໄວໜຸ່ມສິ່ງແວດລ້ອມ ເຊິ່ງ ສປປລາວ ເປັນເຈົ້າພາບ.

ໂອກາດດັ່ງກ່າວ ສະຫາຍ ມະນີໂສ ຊາມຸນຕີ ໄດ້ກ່າວສະແດງຄວາມຍິນດີຕ້ອນຮັບ ສະຫາຍ ຫວໍ ຕວັນ ເຍິນ ພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປລາວ, ຕີລາຄາສູງຕໍ່ການຢ້ຽມຢາມໃນຄັ້ງນີ້ ເພາະເປັນ ການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການ ຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ໄດ້ຮັບການເສີມຂະ ຫຍາຍ ແລະ ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ. ພ້ອມນັ້ນ ໄດ້ມີການແຈ້ງສະພາບຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ແລກປ່ຽນຂໍ້ມູນ-ຂ່າວສານ ເຊິ່ງກັນ ແລະ ກັນ.

ຈາກນັ້ນ, ສະຫາຍ ຫວໍ ຕວັນ ເຍິນ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ມະນີໂຊ ຊາມຸນຕີ ທີ່ໄດ້ເສຍ ສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງ ຂອງການເຂົ້າຮ່ວມ ບັນດາກອງປະຊຸມຕ່າງໆ ໃຫ້ຊາບອີກດ້ວຍ.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)