ທ່ານ ຄໍາມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ເຄື່ອນໄຫວເຮັດວຽກ ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ໂຄງການເຊົ່າ ແລະ ສໍາປະທານທີ່ດິນຂອງບັນດາໂຄງການພັດທະນາແຮ່ທາດ ແລະ ເຂື່ອນໄຟຟ້າ ໃນລະຫວ່າງວັນທີ 6 ຫາ 8 ພຶດສະພາ 2024. ເຊິ່ງໄດ້ຈັດກອງປະຊຸມຂື້ນ ທີ່ຫ້ອງປະຊຸມສະພາປະຊາຊົນແຂວງ (ສພຂ) ໂດຍການເຂົ້າຮ່ວມຂອງທ່ານ ນາງ ມີນາພອນ ໄຊສົມພູ ປະທານ ສພຂ, ທ່ານ ສຸກສໍາລານ ໄຊຍະແສງ ຮອງປະທານ ສພຂ ປະທານຄະນະກໍາມະການເສດຖະກິດ, ແຜນການ ແລະ ການເງີນ, ມີບັນດາທ່ານຄະນະກໍາມະການ, ຄະນະເລຂາທິການ, ຕາງໜ້າຈາກພະແນກແຜນການ ແລະ ການລົງທຶນ, ພະແນກພະລັງງານ ແລະ ບໍ່ແຮ່, ພະແນກກະສີກໍາ ແລະ ປ່າໄມ້, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ພະແນກອຸດສະຫະກໍາ ແລະ ການຄ້າ, ພະແນກການເງີນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ໂອກາດນີ້, ໄດ້ຮັບຟັງການລາຍງານຈາກບັນດາພະແນກການເປັນຕົ້ນ: ສະພາບການຈັດຕັ້ງປະຕິບັດວຽກງານການລົງທຶນດ້ານພະລັງງານໄຟຟ້າ ແລະ ແຮ່ທາດ, ການຫັນປ່ຽນທີ່ດີນປ່າໄມ້, ການຟື້ນຟູປ່າ ແລະ ປູກປ່າທົນແທນຄືນພື້ນທີ່ປ່າໄມ້ທໍາມະຊາດ, ການເຊົ່າສໍາປະທານທີ່ດີນ ແລະ ຂື້ນທະບຽບອອກໃບຕາດີນ, ຜົນກະທົບຕໍ່ສິ່ງແວດລ້ອມ, ການຟື້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນ, ການນໍາເຂົ້າອຸປະກອນທີ່ຕິດພັນກັບການປຸງແຕ່ງແຮ່ທາດ, ການເກັບລາຍຮັບ ຈາກໂຄງການພັດທະນາໄຟຟ້າ ແລະ ໂຄງການຂຸດຄົ້ນບໍ່ແຮ່ປົກກະຕິ ແລະ ທົດລອງຂຸດຄົ້ນແຮ່ທາດ ແລະ ອື່ນໆ. ພ້ອມນີ້ຜູ້ເຂົ້າຮ່ວມ, ໄດ້ຄົ້ນຄວ້າ ປະກອບຄຳເຫັນ ສົນທະນາ ແລະ ແລກປ່ຽນບົດຮຽນ ເຊິ່ງລ້ວນແຕ່ມີເຫດມີຜົນ ບົນພື້ນຖານຄວາມຮັບຜິດຊອບຕໍ່ໜ້າທີ່ການເມືອງ ຕິດພັນກັບການເຄື່ອນໄຫວວຽກງານຕົວຈິງໃນທ້ອງຖິ່ນຂອງຕົນ ເພື່ອຮັບປະກັນໃຫ້ວຽກງານດັ່ງກ່າວ ມີຄຸນນະພາບ ແລະ ປະຕິບັດຖືກຕ້ອງຕາມກົດໝາຍ ແລະ ສອດຄ່ອງກັບຄວາມເປັນຈິງຂອງປະເທດ ກໍ່ຄືຂອງແຂວງ.
ໃນກອງປະຊຸມ ທ່ານ ຄໍາມ່ວນ ຊົມສີຫາປັນຍາ ຍັງໄດ້ມີຄໍາເຫັນບາງບັນຫາໃຫ້ບັນດາພະແນກການ ເອົາໃຈໃສ່ຄຸ້ມຄອງ ການຊອກຄົ້ນ, ສໍາຫຼວດ ແລະ ຂຸດຄົ້ນແຮ່ທາດ ພາຍໃນແຂວງໃຫ້ມີປະສິດທິພາບ, ປະສິດທິຜົນ, ຍືນຍົງ, ປະຢັດ, ນໍາເອົາຜົນປະໂຫຍດສູງສຸດມາສູ່ປະເທດຊາດ ແລະ ບໍ່ໃຫ້ສົ່ງຜົນກະທົບຕໍ່ສິ່ງແວດລ້ອມສັງຄົມ ແລະ ທໍາມະຊາດ ເກິນກວ່າແຜນກໍານົດໄວ້; ຮີບຮ້ອນປະເມີນຜົນການຈັດປະຕິບັດໂຄງການຊອກຄົ້ນ, ສຳຫຼວດ, ຂຸດຄົ້ນ ແລະ ປຸງແຕ່ງແຮ່ທາດ ໂດຍສະເພາະ ໂຄງການຂຸດຄົ້ນແຮ່ທາດແບບທົດລອງ ທີ່ພວມຈັດຕັ້ງປະຕິບັດຢູ່ພາຍໃນແຂວງວ່າ ມີຜົນໄດ້ ຜົນເສຍ ຄືແນວໃດ ແລະ ມີມາດຕະການຢ່າງເຂັ້ມງວດ ຕໍ່ໂຄງການທີ່ບໍ່ມີປະສິດທິພາບ ປະສິດທິຜົນ,ໂຄງການບໍ່ທີ່ປະຕິບັດຕາມສັນຍາ ແລະ ກົດໝາຍ. ການຄົ້ນຄວ້າອະນຸມັດໂຄງການຂຸດຄົ້ນບໍ່ແຮ່ ໃນຕໍ່ໜ້າ ທີ່ຢູ່ໃນຄວາມຮັບຜິດຊອບ ຕາມຂອບເຂດສິດ ຂອງຕົນນັ້ນ ຕ້ອງໃຫ້ສອດຄ່ອງຕາມຍຸດທະສາດການພັດທະນາແຮ່ທາດ ທີ່ສະພາແຫ່ງຊາດ ໄດ້ຮັບຮອງໃນກອງປະຊຸມສະພາແຫ່ງຊາດເທື່ອທີ 5 ຜ່ານມານີ້; ປະສານສົມທົບກັບຂະແໜງການທີ່ກ່ຽວຂ້ອງການຈັດຕັ້ງປະຕິບັດວຽກງານອຸດສາຫະກໍາຕ່າງໆທີ່ຕິດພັນກັບຂະແໜງການບໍ່ແຮ່ໂດຍຫັນເປັນການປຸງແຕ່ງແຮ່ທາດສໍາເລັດເພື່ອສົ່ງອອກ; ປະສານສົມທົບກັບອົງການປົກເມືອງ ແລະ ຜູ້ພັດທະນາໂຄງການ ພາຍໃນແຂວງ ເອົາໃຈໃສ່ໃນການຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດວຽກງານການຊົດເຊີຍ, ປັບປຸງຊີວິການເປັນຢູ່ຂອງປະຊາຊົນ ແລະ ຮັບປະກັນບໍ່ໃຫ້ມີບັນຫາການຕົກຫຼົ່ນ ຫຼື ການຮ້ອງຟ້ອງ ຮ້ອງຂໍຄວາມເປັນທຳ ໃນອະນາຄາດ ພ້ອມທັງ ເອົາໃຈໃສ່ຢ່າງໃກ້ສິດ ໃນການຕິດຕາມ ການຟື້ນຟູ ຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກໂຄງການ ເຮັດແນວໃດເພື່ອຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂື້ນກວ່າເກົ່າ; ເອົາໃຈໃສ່ໃນການສຳຫຼວດ, ວັດແທກ, ຂື້ນທະບຽນອອກໃບຕາດິນ ໃຫ້ສາມາດບັນລຸຕາມແຜນ ການທີ່ວາງໄວ້ ເພື່ອຮັບປະກັນເຮັດໃຫ້ປະຊາຊົນ ໄດ້ຮັບຜົນປະໂຫຍດສູງສຸດ ຈາກການນຳໃຊ້ສິດນຳໃຊ້ທີ່ດິນ ຕາມກົດໝາຍ ແລະ ສາມາດເກັບລາຍຮັບຈາກການນຳໃຊ້ທີ່ດິນ ເປັນຖານລາຍຮັບໜຶ່ງທີ່ໝັ້ນຄົງ; ຜັນຂະຫຍາຍແຜນແມ່ບົດຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນ, ຄຸ້ມຄອງຊັບພະຍາ ກອນທໍາມະຊາດ ແລະ ສິ່ງແວດລ້ອມຂອງແຂວງ ໃຫ້ລະອຽດ, ຊັດເຈນ ໂດຍຕິດພັນກັບການຊຸກຍູ້ຢ່າງແຂງແຮງໃນການຈັດຕັ້ງຜັນຂະຫຍາຍ ກົດໝາຍທີ່ດິນເຂົ້າໃນຊິວິດຕົວຈິງໃຫ້ທົ່ວເຖິງ ແລະ ມີຜົນສັກສິດ;ຕິດຕາມ ຢ່າງໃກ້ສິດ ຕໍ່ບັນຫາຜົນກະທົບ ທີ່ອາດຈະເກີດຂື້ນຈາກໂຄງການພັດທະນາຕ່າງໆ ເປັນຕົ້ນ ໂຄງການພັດທະນາໄຟຟ້າ, ໂຄງການຂຸດຄົ້ນບໍ່ແຮ່, ໂຄງການພັດທະນາພື້ນຖານໂຄງລ່າງອື່ນໆ ໂດຍສະເພາະ ບັນຫານໍ້າເປື້ອນ, ນໍ້າເສຍຈາກ ຕ້ອງໄດ້ມີການຈຳກັດ ແລະ ບຳບັດ ກ່ອນຈະປ່ອຍອອກສູ່ ຄອງ, ຮ່ອງລະບາຍນໍ້າ ຫຼື ແຫຼ່ງນໍ້າທໍາມະຊາດ; ຄົ້ນຄວ້າ, ປັບປຸງ ນະໂຍບາຍ ແລະ ນິຕິກຳ ກ່ຽວກັບການສົ່ງເສີມວຽກງານການຟື້ນຟູ ແລະ ປູກໄມ້ ໂດຍການມີສ່ວນຮ່ວມ ລະຫວ່າງ ພາກລັດ, ຜູ້ປະກອບການ ແລະ ປະຊາຊົນ ໃຫ້ມີຄວາມຊັດເຈນ ແລະ ຮັດກຸມ ໂດຍສະເພາະ ການແບ່ງປັນຜົນປະໂຫຍດ ຈາກວຽກງານດັ່ງກ່າວ; ສ້າງແຜນການຟື້ນຟູປ່າ, ປູກໄມ້ທົດແທນ ແລະ ປົກປັກຮັກສາ ໃນແຕ່ລະຂົງເຂດ ໃຫ້ລະອຽດຈະແຈ້ງ, ແບ່ງຄວາມຮັບຜິດຊອບໃນການຈັດຕັ້ງປະຕິບັດ ແຕ່ລະຂັ້ນ ໃຫ້ລະອຽດຊັດເຈນ ໂດຍການມີສ່ວນຮ່ວມຂອງປະຊາຊົນໃນແຕ່ລະທ້ອງຖິ່ນ ພ້ອມທັງ ມີລະບຽບການຄຸ້ມຄອງ ແລະ ຕິດຕາມກວດກາ ຢ່າງເປັນລະບົບ ແລະ ຕໍ່ເນື່ອງ; ສຸມໃສ່ ຕິດຕາມ, ກວດກາ ແລະ ສັງລວມ ການປະຕິບັດ ພັນທະຕ່າງໆ ກ່ຽວກັບວຽກງານຟື້ນຟູປ່າໄມ້ ແລະ ປູກໄມ້ທົດແທນ ຕາມສັນຍາສຳປະທານ, ກົດໝາຍ, ມະຕິສະພາແຫ່ງຊາດ ແລະ ນິຕິກຳອື່ນທີ່ກ່ຽວຂ້ອງ ຂອງບັນດາໂຄງການກໍ່ສ້າງເຂື່ອນໄຟຟ້າ, ບໍ່ແຮ່, ໂຄງລ່າງພື້ນຖານ ທີ່ໄດ້ຮັບອະນຸຍາດຈາກລັດຖະບານຜ່ານມາ; ຄົ້ນຄວ້າອອກນິຕິກຳສະເພາະ ກ່ຽວກັບການຄຸ້ມຄອງປະຊາຊົນ ທີ່ດຳລົງຊີວິດຢູ່ໃນເຂດ 03 ປະເພດປ່າ ພ້ອມທັງ ຈັດຝຶກອົບຮົມໃຫ້ຄວາມຮູ້ດ້ານວິຊາການແກ່ເຂົາເຈົ້າ ເພື່ອເຂົ້າຮ່ວມເປັນຜູ້ຄຸ້ມຄອງ, ປົກປັກຮັກສາພັດທະນາປ່າໄມ້ ແລະ ຊີວະນາໆພັນ ແບບຍືນຍົງ ໂດຍໄດ້ຮັບຜົນຕອບແທນທີ່ເໝາະສົມ ຮັບປະກັນການຈັດສັນອາຊີບຄົງທີ່ ແລະ ການດຳລົງຊີວິດທີ່ໝັ້ນຄົງຖາວອນ; ໂຄສະນາ, ເຜີຍແຜ່ ແນວທາງນະໂຍບາຍ, ກົດໝາຍ ແລະ ນິຕິກຳໃຕ້ກົດໝາຍ ທີ່ກ່ຽວຂ້ອງກັບວຽກງານປ່າໄມ້, ການສ້າງສິນເຊື່ອກາກບອນ ແລະ ການເຂົ້າເຖິງກອງທຶນກາກບອນ ເພື່ອປູກຈິດສຳນຶກ ໃຫ້ທົ່ວປວງຊົນ ໄດ້ຮັບຮູ້, ເຂົ້າໃຈ ແລະ ເຫັນໄດ້ຄວາມສຳຄັນຂອງຊັບພະຍາກອນປ່າໄມ້ ຕໍ່ກັບການພັດທະນາເສດຖະກິດ-ສັງຄົມ ແລະ ເຫັນໄດ້ຜົນຮ້າຍຈາກການທຳລາຍປ່າໄມ້ ຊຶ່ງອາດພາໃຫ້ເກີດການປ່ຽນຂອງສະພາບດິນຟ້າອາກາດ ຢ່າງຮ້າຍແຮງ; ຄຸ້ມຄອງໂຄງການລົງທຶນ ແລະ ຄັດຈອນເອົາບໍລິສັດທີ່ມີທ່າແຮງທາດດ້ານເສດຖະກິດ, ເປັນມືອາຊີບເຂົ້້າມາລົງທຶນ ເພື່ອສ້າງຜົນປະໂຫຍມາສູ່ປະເທດຊາດ; ກໍ່ຄືແຂວງຂອງຕົນ ແລະ ເອົາໃຈໃສ່ຄຸ້ມຄອງ, ຕິດຕາມ, ກວດກາການມອບເງິນພັນທະຕ່າງໆ ຂອງຜູ້ພັດທະນາໂຄງການ ໂດຍໃຫ້ສອດຄ່ອງກັບສັນຍາຂອງໂຄງການ ແລະ ລະບຽບການທີ່ກ່ຽວຂ້ອງ ເພື່ອຮັບປະກັນໃຫ້ລັດໄດ້ຮັບຜົນປະໂຫຍດສູງສຸດ.
ນອກຈາກນີ້, ທ່ານ ຄໍາມ່ວນ ຊົມສີຫາປັນຍາ ແລະ ທ່ານ ນາງ ມີນາພອນ ໄຊສົມພູ ພ້ອມດ້ວຍຄະນະ ແລະ ພະແນກພະລັງງານ ແລະ ບໍ່ແຮ່ ໄດ້ເຄື່ອນໄຫວຢ້ຽມຢາມ ແລະ ເຮັດວຽກກັັບ ບໍລິສັດ ບໍ່ເຫຼັກວັງຕັດ ຈໍາກັດຜູ້ດ່ຽວ, ບໍລິສັດ ພັດທະນາແຮ່ບົກສິດລາວຈໍາກັດຜູ້ດ່ຽວ ຢູ່ເມືອງຊານໄຊ ແລະ ບໍລິສັດ ຂຸດຄົ້ນ ແລະ ປຸງແຕ່ງແຮ່ຄໍາພາກໃຕ້ ຈໍາກັດຢູ່ເມືອງພູວົງ ເຊິ່ງໄດ້ຮັບຟັງການລາຍງານໃນການຈັດຕັ້ງປະຕິບັດຂອງບັນດາໂຄງການ ແລະ ດ້ານຜົນກະທົບທາງດ້ານສິ່ງແລດລ້ອມ-ສັງຄົມ ແລະ ທໍາມະຊາດ ໂອກາດນີ້, ທ່ານ ຄໍາມ່ວນ ຊົມສີຫາປັນຍາ ກໍໄດ້ມີຄໍາເຫັນ
ສະແດງຄວາມຊົມເຊີຍຕໍ່ບັນດາບໍລິສັດ ທີ່ໄດ້ເອົາໃຈໃສ່ໃນການແກ້ໄຂບັນດາຜົນກະທົບຕ່າງໆ ໂດຍສະເພາະຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ ຮຽກຮ້ອງໃຫ້ບັນດາບໍລິສັດທີ່ມາລົງທຶນພັດທະນາດໍາເນີນໄປດ້ວຍຄວາມຖືກຕ້ອງ ຕາມຂັ້ນຕອນ ຕາມການອະນຸຍາດຂອງລັດຖະບານ ບົນຖື້ນຖານລະບຽບກົດໝາຍ. ພ້ອມກັນນັ້ນ, ຊ່ວຍເປັນທ່າແຮງໃນການພັດທະນາທ້ອງຖິ່ນໃຫ້ດີຂຶ້ນເປັນກ້າວໆ ຄຽງຄູ່ກັບການປົກປັກຮັກສາສິ່ງແວດລ້ອມ, ປົກປັກຮັກສາປ່າໄມ້, ເຂດນໍ້າແດນດິນ, ຟື້ນຟູປ່າ ແລະ ປູກປ່າທົດແທນຄືນໃນພື້ນທີ່ປ່າໄມ້ທໍາມະຊາດ ແລະ ປະຕິບັດພັນທະຕ່າງໆທາງດ້ານທີ່ດິນ ແລະ ປ່າໄມ້ຕາມກົດໝາຍສັນຍາສໍາປະທານ.
(ວິນັດ ສີສຸລາດ)