ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

    ໃນ​ລະຫວ່າງວັນ​ທີ 16-18 ມີ​ນາ 2022 ​ທີ່ຜ່ານມາ ທ່ານ ​ນາງ ມະ​ນີວັນ ​ເຢຍ​ປາວ​ເຮີ ສະ​ມາ​ຊິກ​ສະ​ພາ​ແຫ່ງ​ຊາດ(ສ​ສ​ຊ), ຮອງ​ປະ​ທານ​ກຳ​ມາ​ທິ​ການວັດ​ທະ​ນະ​ທຳ-ສັງ​ຄົມ(ກວ​ທ​ສ)ສພຊ ແລະ ທ່ານ ດຣ ນາງ ສິດທິວອນ ຫົງສາຄອນ(ສສຂ)ຮອງ​ປະ​ທານ​ຄະ​ນະ​ກຳ​ມະ​ການ​ວັດ​ທະ​ນະ​ທຳ-ສັງ​ຄົມ ແລະ ບັນ​ດາ​ເຜົ່າ ​ສະ​ພາ​ປະ​ຊາ​ຊົນແຂວງ(ຄວ​ສ​ຜ.ສ​ພ​ຂ) ພ້ອມ​ດ້ວ​ຍຄະນະທິມ​ງານ​ໄດ້ສຳເລັດການລົງ​ເຄື່ອນ​ໄຫວວຽກ​ງານ​ຂົງເຂດສຶກ​ສາທີ່​ແຂວງ​ອຸ​ດົມ​ໄຊ ເຊິ່ງໄດ້ລົງ​ເຄື່ອນ​ໄຫວ​ຕົວຈິງຢູ່ 2 ເມືອງ​ຄື: ເມືອງຫຼາ ແລະ ເມືອງ​ໄຊ(ເທດ​ສະ​ບານ​ແຂວງ)ລວມ​ທັງ​ໝົດໄດ້ 7 ຈຸດ​ຄື: ພະ​ແນກ​ສຶກ​ສາ​ທິ​ການ ແລະ ກິ​ລາແຂວງ, ສະ​ໜາມ​ກິ​ລາແຂວງ, ໂຮງ​ຮຽນ​ເຕັກ​ນິກວິ​ຊາ​ຊີບ​ແບບ​ປະ​ສົມ ແຂວງ​ອຸ​ດົມ​ໄຊ, ວິ​ທະ​ຍາ​ໄລ​ລາວ​ນາໆ​ຊາດ ແລະ ຫ້ອງ​ການ​ສຶກ​ສາ​ທິ​ການ ແລະ ກິ​ລາ​ເມືອງຫຼາ, ໂຮງຮຽນ ມ​ສ ເມືອງຫຼາ ແລະ ໂຮງ​ຮຽນ​ປະ​ຖົ​ມ​ສົມ​ບູນ ບ້ານ​ວຽງ​ຄຳ ເມືອງຫຼາ. ​
          ຈຸດປະສົງຂອງການລົງເຄື່ອນໄຫວໃນຄັ້ງນີ້ກໍ່ເພື່ອຊຸກ​ຍູ້, ຕິດຕາມກວດກາການຈັດຕັ້ງປະຕິບັດບັນດາຄາດໝາຍ ຂົງເຂດສຶກສາທິການ ແລະ ກິລາ, ການປັບປຸງຄຸນນະພາບລະບົບການຮຽນ-ການສອນໃນທຸກຊັ້ນສາຍໃນໄລຍະໃໝ່ ແລະ ການຈັດຕັ້ງປະຕິບັດວຽກງານກິລາ-ກາຍະກຳ, ພ້ອມນັ້ນໄດ້​ຮັບຟັງການລາຍ​ງານ​ຕາມ​ຄຳ​ຖາມ​ເຈາະ​ຈິ້ມ​ທັງ​ໝົດ 19 ຄຳ​ຖາມ, ນອກ​ຈາກບັນດາຄຳ​ຖາມ​ເຈາະ​ຈິ້ມດັ່ງກ່າວ ທ່ານ ນາງ ມະ​ນີ​ວັນ ເຢຍ​ປາວ​ເຮີ ​ສ​ສ​ຊ, ຮອງ​ປະ​ທານ(ກວ​ທ​ສ) ສະ​ພາ​ແຫ່ງ​ຊາດ ຍັງ​ໄດ້​ຊັກ​ຖາມ​ຫຼ​າຍໆ​ບັນ​ຫາເພີ້ມເຕີມຢ່າງ​ກົງ​ໄປ​ກົງ​ມາເຊັ່ນ: ການ​ສືບ​ຕໍ່ໂຄງ​ການ​ອາ​ຫານ​ທ່ຽງ​ໃນ​ໂຮງ​ຮຽນ, ການ​ຈັດ​ສັນ​ງົບ​ປະ​ມານ​ຕາມ​ສາຍ​ຕັ້ງ​ຢູ່ຂັ້ນ​ທ້ອງ​ຖິ່ນ, ​ການ​ແກ້ໄຂ​ບັນ​ຫາ​ຄູ​ເຫຼືອບໍ່​ພໍ,​ສອນບໍ່​ຖືກ​ຊັ້ນ-ສາຍ ແລະ ຄູ​ອາ​ສາ​ສະ​ໝັກ, ການ​ຈັດ​ຕັ້ງ​ປະ​ຕິ​ບັດ​ກິ​ລາ​ກາ​ຍະ​ກຳ​ ​ຕາມກອງ​ທຶນ​ພັດ​ທະ​ນາ ແລະ ອື່ນໆ ຈະ​ມີ​ວິ​ທີ​ແກ້​ໄຂ​ຄື​ແນວ​ໃດ ແລະ ຈະສືບຕໍ່ສະເໜີຕໍ່ລັດຖະບານ ແລະ ກະຊວງກ່ຽວຂ້ອງແນວໃດ.
   
      ນອກ​ຈາກ​ນີ້​ທ່ານ​ຍັງ​ໄດ້​ເນັ້ນ​ໜັກ 2 ວາ​ລະ​ແຫ່ງ​ຊາດ ທີ່​ຕິດ​ພັນ​ກັບ​ການ​ຮຽນ-ການ​ສອນ ​ຄວນ​ມີ​ວິ​ທິຮັບ​ມື ແລະ ​ວິ​ທີແກ້​ໄຂ​ໃນ​ຕໍ່​ໜ້າແນວໃດ.
(ຂ່າວ ສພຂ).