(ສພຊ) ວັນທີ 11 ກັນຍາ 2023 ທີ່ສະພາແຫ່ງຊາດ ແຫ່ງ ສປປລາວ, ທ່ານ ບຸນຕາ ເທບພະວົງ ຮອງປະທານກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ໄດ້ຕ້ອນຮັບທ່ານ ແມັກແວວ ດາປາດສ (Maxwell Bruku Dapaah) ຊ່ຽວຊານອາວຸໂສ ຈາກທະນາຄານໂລກ, ພ້ອມດ້ວຍຄະນະ ທີ່ໄດ້ເດີນທາງມາຮ່ວມເຮັດວຽກນຳສະພາແຫ່ງຊາດ ໃນຄັ້ງນີ້.

ໂອກາດດັ່ງກ່າວ, ທ່ານ ບຸນຕາ ເທບພະວົງ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານ ແມັກແວວ ດາປາດສ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເພື່ອປຶກສາຫາລືກ່ຽວກັບວຽກງານການສ້າງແຜນງົບປະມານໄລຍະກາງ ແລະ ການສ້າງບົດສະເໜີງົບປະມານ ທີ່ຄຳນຶງເຖິງບົດບາດຍິງ-ຊາຍ ພ້ອມນີ້, ທັງສອງຝ່າຍໄດ້ມີການແລກປ່ຽນບົດຮຽນ ແລະ ປຶກສາຫາລືຮ່ວມກັນທີ່ທັງສອງຝ່າຍມີຄວາມສົນໃຈຮ່ວມກັນ.

ທ່ານ ແມັກແວວ ດາປາດສ ໄດ້ສະແດງຄວາມຂອບໃຈຢ່າງສູງຕໍ່ ຮອງປະທານກຳມາທິການແຜນການ, ການເງິນ ແລະ ການກວດສອບ ທີ່ໄດ້ສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ໄດ້ຮັບຟັງຫົວຂໍ້ທີ່ທາງຄະນະມີຄວາມສົນໃຈຈາກ ຮອງປະທານ ພ້ອມດ້ວຍ ຄະນະກົມ, ຄະນະພະແນກທີ່ເຮັດວຽກກ່ຽວຂ້ອງ ແລະ ຮັບເອົາບັນດາຂໍ້ສະເໜີຂອງສະພາແຫ່ງຊາດລາວ ແລະ ພ້ອມ ຈະໃຫ້ການຮ່ວມມື ແລະ ຊອກຫາວິທີທາງຕ່າງໆຮ່ວມກັນ.

ຕອນທ້າຍ, ທ່ານ ຮອງປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ສະແດງຄວາມຂອບໃຈຢ່າງຈິງໃຈມາຍັງທ່ານ ແມັກແວວ ດາປາດສ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະ ໃຫ້ການສະໜັບສະໜູນ ສປປລາວ ຕະຫຼອດມາ ອວຍພອນໃຫ້ທ່ານ ພ້ອມດ້ວຍຄະນະ ປະສົບຜົນສຳເລັດ ໃນໜ້າທີ່ວຽກງານອັນມີກຽດ ແລະ ປະສົບຜົນສຳເລັດໃນການເຄື່ອນໄຫວຢ້ຽມຢາມ ແລະ ເຮັດວຽກໃນ ສປປລາວ ຄັ້ງນີ້ ໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ກຳນົດໄວ້.

(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)