ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 15 ກຸມພາ 2022ຢູ່ທີ່ຫ້ອງປະຊຸມສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມຕິດຕາມກວດກາການຈັດຕັ້ງປະຕິບັດກົດໝາຍ ແລະ ມະຕິກອງປະຊຸມສະພາແຫ່ງຊາດໃນຂົງເຂດຍຸຕິທໍາ ປີ 2021 ຢູ່ສະພາປະຊາຊົນແຂວງຊຽງຂວາງ ໂດຍການເປັນປະທານຮ່ວມຂອງ ທ່ານ ສີສຸທອນ ສ.ຜາບມີໄຊຍ໌ ຮອງປະທານຄະນະກໍາມການຍຸຕິທໍາສະພາແຫ່ງຊາດ ແລະ ທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ, ມີບັນດາຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ບັນດາຫົວໜ້າພະແນກການ, ກົມກອງທີ່ຢູ່ໃນຂົງເຂດຍຸຕິທໍາ, ທິມງານທີ່ມາຈາກສະພາແຫ່ງຊາດ, ຫົວໜ້າ-ຮອງຫົວໜ້າຂະແໜງ ແລະ ພະນັກງານສະພາປະຊາຊົນແຂວງເຂົ້າຮ່ວມ

ເພື່ອຕິດຕາມກວດກາການຈັດຕັ້ງຜັນຂະຫຍາຍມະຕິຂອງກອງປະຊຸມສະພາແຫ່ງຊາດ, ​ເປັນ​ການຊຸກຍູ້ການຈັດຕັ້ງຜັນຂະຫຍາຍມະຕິຂອງຄະນະບໍລິຫານງານສູນກາງພັກ ແລະ ຕິດຕາມກວດກາຜົນກະທົບການແຜ່ລະບາດຂອງພະຍາດໂຄວິດ19 ຕໍ່ການປະຕິບັດໜ້າທີ່ວຽກງານໃນຂົງເຂດວຽກງານຍຸຕິທໍາ. ໃນທີ່ປະຊຸມ ທ່ານ ວຽງໄຊ ສີວິໄລ ໄດ້ກ່າວຕ້ອນຮັບ ແລະ ໄດ້ລາຍງານສະພາບການຕິດຕາມກວດກາ ແລະ ການຈັດຕັ້ງຜັນຂະຫຍາຍ 2ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ບັນຫາຢາເສບຕິດ, ໄດ້ຮັບຟັງການລາຍງານຂອງອົງການໄອຍະການແຂວງກ່ຽວກັບການຈັດຕັ້ງປະຕິບັດພາລະບົດບາດ, ບົດບາດ, ສິດ ແລະ ໜ້າທີ່ໃນການຮ້ອງຟ້ອງຜູ້ຖືກຫາຂຶ້ນສານ, ການຕິດຕາມກວດກາການປະຕິບັດໜ້າທີ່​ຂ​ອງ​ໄອ​ຍະ​ການ​, ອົງການ​ສືບສວນ​-ສອບ​ສວນ, ຮັບ​ຟັງ​ການ​ລາຍ​ງານ​ຂອງ​ສານ​ປະຊາຊົນ​ແ​ຂວງ​ກ່ຽວກັບ​ການ​ປະຕິບັດ​ພາລະ​ບົດບາດ, ສິດ ​ແລະ ໜ້າທີ່ ​ໃນ​ການ​ຍົກ​ສູງ​ຄຸນ​ນະພາ​ບການ​ດໍາ​ເນີນ​ຄະດີ​ຂອງ​ສານ, ການ​ປະຕິບັດໜ້າທີ່ຂອງ​ຜູ້​ພິພາກສາ, ຮັບ​ຟັງ​ການ​ລາຍ​ງານ​ຂອງ​ອົງການ​ສືບສວນ-​ສອບ​ສວນ​ໃນ​ການຈັດ​ຕັ້ງ​ປະຕິບັດວາລະ​ແຫ່ງ​ຊາດກ່ຽວກັບ​ການ​ແກ້​ໄຂ​ບັນຫາ​ຢາ​ເສບ​ຕິດ ​ແລະ ການ​ດໍາ​ເນີນ​ຄະດີ​ຂອງ​ເຈົ້າໜ້າທີ່​ສືບສວນ-​ສອບ​ສວນ ​ແລະ ສະພາບ​ການຈັດ​ຕັ້ງ​ປະຕິບັດ​ກົດໝາຍຢູ່​ຄ້າຍ​ຄຸ້ມ​ຂັງ​ດັດ​ສ້າງ ​ໃນ​ປີ 2021, ຮັບ​ຟັງ​ການ​ລາຍ​ງານ​ຂອງ​ອົງການ​ກວດກາ​ລັດ​ແຂວງ ກ່ຽວກັບ​ການປະຕິບັດໜ້າທີ່​ໃນ​ການ​ຕ້ານສະກັດ​ກັ້ນ, ການ​ສໍ້​ລາດ​ບັງຫຼວງ ​ແລະ ການກວດ​ສອບ​ບັນດາ​ໂຄງການ​ລົງທຶນ​ຂອງ​ລັດປະ​ຈໍາປີ 2021 ​ແລະ ທິດ​ທາງ​ແຜນການ​ປີ 2022, ຮັບ​ຟັງ​ການ​ລາຍ​ງານ​ຂອງ​ພະ​ແນ​ກຍຸຕິ​ທໍາ​ແຂວງ ກ່ຽວກັບ​ສະພາບ​ການ​ຈັດ​ຕັ້ງ​ປະຕິບັດ​ບັນດາ​ຄໍາ​ຕັດສິນ​ຂອງ​ສານ ​ໃນ​ປີ 2021. ນ​ອກ​ນັ້ນ​ຍັງ​ຍົກ​ໃຫ້​ເຫັນ​ບັນດາ​ຜົນງານ​ການ​ເຄື່ອນ​ໄຫວວຽກ​ງານຂອງ​ຂົງ​ເຂດ​ຍຸຕິ​ທໍາ ​ເຊິ່ງ​ເຫັນ​ໄດ້ຂໍ້​ສະດວກ, ຂໍ້​ຫຍຸ້ງຍາກ ​ໃນ​ການຈັດ​ຕັ້ງ​ປະຕິບັດ​ພາລະ​ບົດບາດ​ຂອງ​ຕົນ​​ໃນ​ໄລຍະ​ຜ່ານ​ມາ ​ໃຫ້​ທີ່​ປະຊຸມ​ໄດ້​ຮັບ​ຟັງ, ພ້ອມ​ທັງ​ປະກອບ​ຄໍາ​ເຫັນ ​ແລະ ​ແລກ​ປ່ຽນ​ເຊິ່ງກັນ ​ແລະ ກັນ ​ເພື່ອ​ເປັນ​ທິດ​ທາງ​ແກ້​ໄຂ ​ໃນ​ຕໍ່ໜ້າ ​ເພື່ອ​ໃຫ້​ການ​ເຄື່ອນ​ໄຫວ​ວຽກ​ງານ​ຂອງ​ຂົງ​ເຂດ​ຍຸຕິ​ທໍາ ມີ​ປະສິດທິພາບ ​ແລະ ປະສິດທິ​ຜົນ​ດີກ​ວ່າ​ເກົ່າ.

ສະພາ​ປະຊາຊົນ​ແຂວງ​ຊຽງຂວາງ

ຂ່າວ​​ໂດ​​ຍ: ນາງ ສຸກ​ສະຫວັນ ​ອິນທະ​​​ແສງ