ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

       (ສພຊ) ອົງຄະ​ນະ​ພັກ​ສະພາ​ແຫ່ງ​ຊາດ ໄດ້ເຊື່ອມຊຶມເອກະສານສໍາຄັນຕ່າງໆ ໃນວັນ​ທີ 30 ​ພຶດສະພາ 2022, ທີ່​ຫ້ອງ​ປະ​ຊຸມຊັ້ນ 4 ຫໍສະພາແຫ່ງຊາດຫລັງໃໝ່ ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ຮອງເລ ຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ເຂົ້າຮ່ວມມີບັນດາຄະນະປະຈຳ, ກຳມະ ການຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານ ພ້ອມດ້ວຍບັນດາສະມາຊິກພັກພາຍໃນສະພາແຫ່ງຊາດ.

ໃນກອງປະຊຸມ ໄດ້ຮັບຟັງການເຜີຍແຜ່ມະຕິວ່າດ້ວຍການຈັດຕັ້ງແລະ ການເຄື່ອນໄຫວຂອງຄະນະບໍລິຫານງານພັກສະພາແຫ່ງຊາດ ສະໄໝທີ IV ສະບັບເລກທີ 14/ຄພ.ສພຊ,​ ລົງວັນທີ 16 ພຶດສະພາ 2022; ເຜີຍແຜ່ແຜນ​ພັດ ທະນາ​ຂອງສະພາ​ແຫ່ງ​ຊາດ ​ໄລຍະ 5 ປີ 2021-2025 ສະບັບ​ເລກທີ 07/ຄພ.ສພຊ, ລົງ​ວັນ​ທີ 16 ພຶດສະພາ 2022; ຜ່ານ​ມະຕິ ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ​ວ່າດ້ວຍການ​ອະນຸມັດ​ໃຫ້​ພະນັກງານ​ອອກ​ຮັບ​ອຸດ​ໜູນ​ບໍານານ; ຜ່ານມະຕິ ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ວ່າ​ດ້ວຍ​ການ​ແຕ່ງ​ຕັ້ງຕໍາ​ແໜ່​ງບໍລິຫານ​ປະ​ເພດ 2 ຂັ້ນ​ຫົວໜ້າກົມ; ​ຜ່ານ​ມະຕິ ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ວ່າ​ດ້ວຍ​ການ​ສັບ​ປ່ຽນ​ໜ້າ​ທີ່ ​ແລະ ບ່ອນ​ປະ​ຈໍາ​ການ ຂອງ​ພະນັກງານ​ພາຍ​ໃນ​ສະພາ​ແຫ່ງ​ຊາດ; ຜ່ານ​ຂໍ້​ຕົກລົງ​ວ່າ​ດ້ວຍ​ການ​ແຕ່ງ​ຕັ້ງຕໍາ​ແໜ່​ງບໍລິຫານ​ປະ​ເພດ 4 ຂັ້ນ​ຫົວໜ້າພະ​ແນ​ກ; ຜ່ານຂໍ້​ຕົກລົງ​ວ່າ​ດ້ວຍ​ການ​ແຕ່ງ​ຕັ້ງ​ຕໍາ​ແໜ່​ງ ບໍລິຫານປະ​ເພດ 5 ຂັ້ນ​ຮອງ​ຫົວໜ້າ​ພະ​ແນ​ກ; ຜ່ານບົດສະຫລຸບການເຄື່ອນໄຫວວຽກງານຂະບວນການແຂ່ງຂັນຮັກຊາດ ແລະ ພັດທະນາ ປະຈຳປີ 2021 ແລະ ທິດທາງແຜນການ ປະຈຳປີ 2022 ຢູ່ພາຍໃນສະພາແຫ່ງຊາດ; ຜ່ານມະຕິ​ ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ວ່າ​ດ້ວຍ​ການ​ຍ້ອງຍໍ​ກົມ​ກອງ ​ແລະ ບຸກຄົນ ປະ​ຈໍາປີ 2021; ຜ່ານຂໍ້​ຕົກລົງ​ຂອງ​ຄະນະ​ເລຂາທິການ​ສະພາ​ແຫ່​ງຊາດ ວ່າ​ດ້ວຍ​ການ​ຍ້ອງຍໍ​ກົມ​ກອງ ​ແລະ ບຸກຄົນ ປະ​ຈໍາປີ 2021; ມອບ​ໃບ​ຍ້ອງຍໍ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ໃຫ້​ກົມ​ກອງ ທີ່​ໄດ້​ຮັບ​ໃບ​ຍ້ອງຍໍ​ຂອງ ຄະນະປະຈຳ.

ສະຫາຍ ນາງ ສູນທອນ ໄຊຍະຈັກ ໄດ້ມີຄຳເຫັນເນັ້ນບາງບັນຫາສໍາຄັນ ຕໍ່ກອງປະຊຸມວ່າ: ໃຫ້ຄະນະບໍລິຫານງານພັກ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ, ອົງການຈັດຕັ້ງມະຫາຊົນ ແລະ ສະມາຊິກພັກທຸກສະຫາຍ ຕ້ອງໄດ້ສືບຕໍ່ຄົ້ນຄວ້າ ເຊື່ອມຊຶມ ກໍາແໜ້ນບັນດາເນື້ອໃນຈິດໃຈຂອງມະຕິສະບັບນີ້ຢ່າງເລິກເຊິ່ງຕື່ມ ເພື່ອພ້ອມກັນຈັດຕັ້ງປະຕິບັດໃຫ້ຖືກຕ້ອງ ແລະ ເຂັ້ມງວດ; ເອົາໃຈໃສ່ປະຕິບັດວຽກງານການກໍ່ສ້າງພັກໃຫ້ປອດໃສ ເຂັ້ມແຂງ ແລະ ໜັກແໜ້ນ, ການສ້າງ ແລະ ຂະຫຍາຍພັກ ໃຫ້ມີຄຸນນະພາບ ແລະ ໃຫ້ຖືກຕ້ອງຕາມກົດລະບຽບຢ່າງເຂັ້ມງວດ, ເພີ່ມທະວີໃນການປະຕິບັດລະບອບແບບແຜນວິທີເຮັດວຽກ ແລະ ກົນໄກການປະສານງານ ວຽກພັກ-ວຽກລັດ ໃຫ້ມີຄວາມໂລ່ງລ່ຽນ, ກົມກຽວກັນ; ແຜນພັດທະນາຂອງສະພາແຫ່ງຊາດ ໄລຍະປີ 2021-2025 ແມ່ນໄດ້ອີງໃສ່ສະພາບຄວາມເປັນຈິງ ທີ່ໄດ້ຕີລາຄາຜົນສໍາເລັດ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງລວມ ທີ່ໄດ້ລະບຸໄວ້ໃນບົດລາຍງານການເມືອງຂອງອົງຄະນະພັກສະພາແຫ່ງຊາດ ຕໍ່ກອງປະຊຸມໃຫຍ່ຜູ້ແທນ ຄັ້ງທີ IV ແລະ ທິດທາງແຜນການເຄື່ອນໄຫວ 5 ປີ (2021-2025) ຂອງສະພາແຫ່ງຊາດ ຊຸດທີ IX, ແຜນພັດທະນາຂອງສະພາແຫ່ງຊາດດັ່ງກ່າວ ໄດ້ກໍານົດ 6 ທິດທາງລວມ, 6 ຄາດໝາຍສູ້ຊົນ, 5 ແຜນງານ 29 ໂຄງການ ແລະ 4 ມາດຕະການຈັດຕັ້ງປະຕິບັດ. ບັນດາຮາກຖານພັກ, ບັນດາກໍາມາທິການ ແລະ ອົງການຈັດຕັ້ງມະຫາຊົນ ຕ້ອງໄດ້ເຊື່ອມຊຶມບັນດາເນື້ອໃນຈິດໃຈຂອງແຜນດັ່ງກ່າວ ໃຫ້ມີຄວາມເຂົ້າໃຈເລິກເຊິ່ງ ແລະ ເປັນເອກະພາບ; ຫັນບັນດາຄາດໝາຍ, ທິດທາງໜ້າທີ່ລວມ, ແຜນງານ, ໂຄງການຈຸດສຸມ ຂອງແຜນພັດທະນາຂອງສະພາແຫ່ງຊາດ ໄລຍະປີ 2021-2025 ໃຫ້ເປັນອັນລະອຽດ, ແທດເໝາະກັບພາລະບົດບາດ, ສິດ ແລະ ໜ້າທີ່ ແລະ ສະພາບຄວາມເປັນຈິງຂອງແຕ່ລະວຽກງານ, ສອດຄ່ອງລະຫວ່າງແຜນວຽກ, ແຜນເງິນ ແລະ ແຜນຄົນ ເພື່ອໃຫ້ສາມາດຈັດຕັ້ງປະຕິບັດໃຫ້ມີຜົນສໍາເລັດ ແລະ ມີປະສິດທິຜົນສູງ; ພ້ອມກັນນັ້ນ ກໍຕ້ອງເປັນເຈົ້າການຕິດຕາມ, ກວດກາ, ສະຫລຸບຕີລາຄາ ແລະ ຖອດຖອນບົດຮຽນເປັນປົກກະຕິ ເພື່ອສົ່ງເສີມດ້ານດີ ແລະ ປະຕິບັດນະໂຍບາຍຍ້ອງຍໍສັນລະເສີນຜູ້ທີ່ມີຜົນງານດີເດັ່ນ ໃຫ້ວ່ອງໄວ ແລະ ທັນການ, ພ້ອມນີ້ ກໍຈໍາກັດ ແລະ ແກ້ໄຂປາກົດການຫຍໍ້ທໍ້ໃຫ້ທັນການ ແລະ ປະຕິບັດວິໄນຕໍ່ຜູ້ກະທໍາຜິດໃຫ້ຖືກຕ້ອງ ແລະ ເດັດຂາດ.

ສະຫາຍຮອງເລຂາຄະນະບໍລິຫານງານພັກສະພາແຫ່ງຊາດ ໄດ້ກ່າວຕື່ມວ່າ: ຄະນະນຳ ແລະ ພະນັກງານ-ລັດຖະ ກອນພາຍໃນສະພາແຫ່ງຊາດ ໄດ້ເປັນເຈົ້າການປະຕິບັດຕາມພາລະບົດບາດ, ໜ້າທີ່ ຄວາມຮັບຜິດຊອບຂອງຕົນ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດ, ປະກອບສ່ວນເຮັດໃຫ້ສະພາແຫ່ງຊາດ ສາມາດປະຕິບັດພາລະບົດບາດ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍວ່າດ້ວຍສະພາແຫ່ງຊາດ ມີຜົນສໍາເລັດເປັນຢ່າງດີ. ນອກຈາກນັ້ນ, ສະຫາຍ ຍັງໄດ້ສະແດງຄວາມຍ້ອງຍໍຊົມເຊີຍບັນດາກົມກອງ ແລະ ບຸກຄົນ ທີ່ໄດ້ຮັບການຍ້ອງຍໍສັນລະເສີນໃນຄັ້ງນີ້. ສຳລັບກົມກອງ ແລະ ຜູ້ທີ່ໄດ້ຮັບການຍ້ອງຍໍຄັ້ງນີ້ ກໍຕ້ອງສືບຕໍ່ຮັກສາມູນເຊື້ອ, ເສີມຂະຫຍາຍຜົນງານດ້ານດີຂອງຕົນ, ກົມກອງ ແລະ ຜູ້ທີ່ໄດ້ຮັບໃບຊົມເຊີຍ ຫລື ຍັງບໍ່ທັນໄດ້ຮັບການຍ້ອງຍໍ ກໍສືບຕໍ່ເຝິກຝົນຫລໍ່ຫລອມ, ຮໍ່າຮຽນນຳເພື່ອນສະຫາຍ, ພັດທະນາຕົນເອງຂຶ້ນຕື່ມ ເພື່ອໃຫ້ກາຍເປັນກົມກອງ ແລະ ບຸກຄົນດີເດັ່ນ ໄດ້ຮັບໃບຍ້ອງຍໍໃນປີຕໍ່ໄປ.

(ພາບ ແລະ ຂ່າວ: ກົງທະນູຄຳ ພິພັດເສລີ)