ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        (ສພຊ) ນັບແຕ່ເລີ່ມຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ແຕ່ເດືອນກັນຍາ 2021 ຫາປັດຈຸບັນ ອົງການໄອຍະການປະຊາຊົນ ໄດ້ຮັບສຳນວນຄະດີຢາເສບຕິດ ຈຳນວນ 2.582 ເລື່ອງ, ໄດ້ພິຈາລະນາແກ້ໄຂແລ້ວ ຈຳນວນ 2.212 ເລື່ອງ ເທົ່າກັບ 85,67%, ໃນນັ້ນ ໄດ້ສັ່ງຟ້ອງສົ່ງສານແລ້ວຈຳນວນ 2.005 ເລື່ອງ, ໄດ້ຊັດມ້ຽນຄະດີຈຳນວນ 11 ເລື່ອງ, ໂຈະການດຳເນີນຄະດີ ຈຳນວນ 3 ເລື່ອງ, ໄດ້ສົ່ງຄືນໃຫ້ເຈົ້າໜ້າທີ່ ທໍາການສືບສວນ-ສອບສວນຄືນໃໝ່ ຈຳນວນ 193 ເລື່ອງ, ກຳລັງຄົ້ນຄວ້າ 370 ເລື່ອງ ເທົ່າກັບ 14,33 %, ຈາກສະຖິຕິດັ່ງກ່າວ ເຫັນວ່າ ການດໍາເນີນຄະດີຢາເສບຕິດ ແມ່ນມີຄວາມເຂັ້ມງວດຂຶ້ນກວ່າເກົ່າ. ອົງການໄອຍະການປະຊາຊົນ ໄດ້ອອກຄຳສັ່ງຈັບຕົວ 3.279 ສະບັບ, ໄດ້ກວດກາຄຳສັ່ງກັກຕົວ ແລະ ອອກຄຳສັ່ງກັກຂັງພາງ 14.714 ສະບັບ, ອອກຄຳສັ່ງຕໍ່ກຳນົດເວລາກັກຂັງພາງ 12.770 ສະບັບ, ອອກຄຳສັ່ງປ່ອຍຕົວພາງ 916 ສະບັບ ແລະ ອອກຄຳແນະນຳກ່ຽວກັບການດຳເນີນຄະດີອາຍາ 2.765 ສະບັບ.
          ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕໍ່ກອງປະຊຸມຍົກສູງຄຸນນະພາບທາງດ້ານເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 8 ມິຖຸນາຜ່ານມາ, ທີ່ໂຮງແຮມເມືອງແທ່ງ ນະຄອນຫຼວງວຽງຈັນ.