ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ອົງການຈັດຕັ້ງມະຫາຊົນແຂວງຄຳມ່ວນ ເຊື່ອມຊຶມຜົນສໍາເລັດ ກອງປະຊຸມສະໄໝສາມັນ ເທື່ອທີ່ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II.

ກ.ຍ. 28, 2022 | ເຂດ 12 ຄຳມ່ວນ

ວັນທີ 28 ກັນຍາ 2022 ນີ້ ຢູ່ທີ່ສະໂມສອນ ແຂວງຄຳມ່ວນ ໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໂດຍການເປັນປະທານຂອງ ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາແຫ່ງຊາດ ແລະ ສະມາ ຊິກສະພາປະຊາຊົນຂັ້ນແຂວງ, ເຂົ້າຮ່ວມຮັບຟັງຄັ້ງໃນນີ້ແມ່ນຂົງເຂດອົງການຈັດຕັ້ງມະຫາຊົນຄື: ແນວລາວສ້າງຊາດ, ສະຫະພັນນັກຮົບເກົ່າ, ຊາວໜຸ່ມ, ແມ່ຍິງ ແລະ ກຳມະບານແຂວງ.

ໂອກາດດັ່ງກ່າວ ທ່ານ ນາງ ອາລີ ບົວຈູມ  ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 12 ແຂວງຄໍາມ່ວນ ກໍ່ໄດ້ເປັນກຽດ ເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໂດຍໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ, ການປັບປຸງ ແລະ ຮັບຮອງເອົາກົດໝາຍ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ, ທິດທາງແຜນການຕິດຕາມກວດກາໃນຕໍ່ໜ້າ ແລະ ວຽກງານດ້ານບຸກຄະລາກອນ ທີ່ໄດ້ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງການນໍາໃນຄະນະລັດຖະບານ, ພ້ອມດຽວກັນ ຍັງໄດ້ຍົກໃຫ້ເຫັນຄວາມໝາຍຄວາມສໍາຄັນ ກ່ຽວກັບພາລະບົດບາດ, ສິດ ແລະ ໜ້າທີ່ຂອງສະມາຊິກສະພາ, ວຽກງານສະພາ, ທັງນີ້ກໍ່ເພື່ອສ້າງຄວາມຮັບຮູ້ ແລະ ຄວາມເຂົ້າໃຈ ຢ່າງເລິກເຊິ່ງ ໃຫ້ແກ່ບັນດາຂົງເຂດອົງການຈັດຕັ້ງມະຫາຊົນຂອງແຂວງ ສາມາດກໍາໄດ້ແນວທາງນະໂຍບາຍຂອງພັກ – ລັດ ໃນແຕ່ລະໄລຍະ.

ສຳລັບຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ  ແມ່ນໄດ້ຍົກໃຫ້ເຫັນໃນການພິຈາລະນາ ແລະ ຮັບຮອງເອົາບັນຫາເນື້ອໃນສໍາຄັນຕົ້ນຕໍຂອງແຂວງ ກ່ຽວກັບວຽກງານອົງການປົກຄອງແຂວງ, ວຽກງານສະພາປະຊາຊົນແຂວງ ແລະ ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຂອງຄະນະບໍລິຫານງານພັກແຂວງໃນບາງຂະແໜງການ, ນອກຈາກນີ້ຍັງໄດ້ຮັບຟັງການເຜີຍແຜ່ ກົດໝາຍ ແລະ ນິຕິກໍາໃຕ້ກົດໝາຍ ແລະ ຮັບຟັງຄຳຄິດ – ຄຳສະເໜີຂອງພະນັກງານ ແລະ ໃຫ້ຄໍາກະຈ່າງແຈ້ງຕໍ່ຄຳສະເໜີ ຈາກສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງອີກດ້ວຍ.

#https://khammouanenews.com/ #ແຂວງຄຳມ່ວນ