ໃນວັນທີ 5 ກັນຍາ 2024 ຢູ່ທີ່ສະພາປະຊາຊົແຂວງ ອົງການກາແດງແຂວງ ລົງໂຄສະນາເຜີຍແຜ່ວຽກງານກາແດງ ແລະ ປຸກລະດົມຜູ້ບໍລິຈາກເລືອດ ເປັນກຽດເຂົ້າຮ່ວມຂອງທ່ານ ນ. ສົດທິດາ ທິບມູນຕາລີ ຮອງປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ແລະ ທ່ານ ນ. ສົມພອນ ໄຊສຸເທບ ຮອງຫົວໜ້າອົງການກາແດງແຂວງ ມີບັນດາທ່ານ ຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ, ວິຊາການຂອງສະພາປະຊາຊົນແຂວງ ແລະ ທີມງານຂອງອົງການກາແດງ ເຂົ້າຮ່ວມ.

ໃນພິທີໄດ້ຮັບຟັງການເຜີຍແຜ່ກ່ຽວກັບປະຫວັດການເຕີບໃຫຍ່ ຂະຫຍາຍຕົວ ຂອງອົງການກາແດງແຫ່ງຊາດລາວໃນໄລຍະຜ່ານມາ, ສະພາກາແດງແຫ່ງຊາດລາວ ສ້າງຕັ້ງຂຶ້ນ ວັນທີ 1 ມັງກອນ 1955 ຖືກຮັບຮອງຈາກຄະນະກໍາມະການກາແດງສາກົນ ວັນທີ 23 ພຶດສະພາ 1957 ແລະ ເປັນສະມາຊິກຂອງສະຫະພັນກາແດງ ແລະ ຊິກວົງເດືອນແດງສາກົນ ວັນທີ 25 ຕຸລາ 1957; ອົງການກາແດງແຫ່ງຊາດລາວ ມີໜ້າວຽກຕົ້ນຕໍ ໃນການຊ່ວຍເຫຼືອ ບັນເທົາທຸກເບື້ອງຕົ້ນ, ປຸກລະດົມຂົນຂວາຍບໍລິຈາກເລືອດ-ສະໜອງເລືອດປອດໄພ, ການສົງເສີມສຸຂະພາບພື້ນຖານ, ການປະຖົມພະ ຍາບານ ກູ້ໄພສຸກເສີນ ແລະ ຮັບຟັງຄວາມຮູ້ພື້ນຖານກ່ຽວກັບເລືອດ ຊື່ງເລືອດມີຄວາມສຳຄັນຫຼາຍໃນການລໍ່ລ້ຽງຮ່າງກາຍ ໃຫ້ມີຊີວິດຢູ່ໄດ້ ໂດຍນຳເອົາສານອາຫານທີ່ຈຳເປັນ ແລະ ມີຄຸນຄ່າໄປຫາເນື້ອເຫຍື້ອ ແລະ ອະໄວຍະວະຕ່າງໆຂອງຮ່າງກາຍ; ຖ້າຄົນເຮົາຂາດເລືອດ ທຸກສ່ວນຂອງຮ່າງກາຍຈະຕາຍໄປ; ສະນັ້ນການບໍລິຈາກເລືອດ ແມ່ນສາມາດຊ່ວຍເຫຼືອໄດ້ຫຼາຍໆຊີວິດ ທີ່ເພິ່ງພາອາໃສການໃສ່ເລືອດເພື່ອຄວາມຢູ່ລອດ ຈາກສາເຫດຕ່າງໆ. ການລົງໃນເທື່ອນີ້ ມີພະນັກງານຂອງສະພາປະຊາຊົນແຂວງເຂົ້າຮ່ວມກວດສຸຂະພາບ ເພື່ອບໍລິຈາກເລືອດ ແລະ ສາມາດກວດຜ່ານ ເອົາເລືອດອອກໄດ້ຈຳນວນ 4 ທ່ານ ຍິງ 2 ທ່ານ.

  ໃນຕອນທ້າຍ ທ່ານ ນ. ສົດທິດາ ທິບມູນຕາລີ ຍັງໄດ້ມີຄຳເຫັນໂອລົມຕໍ່ກອງປະຊຸມ ເຫັນວ່າວຽກງານຂອງອົງການກາແດງ ເປັນວຽກງານທີສຳຄັນຫຼາຍ ໃນການປຸກລະດົມການບໍລິຈາກເລືອດ ແລະ ຊ່ວຍເຫຼື່ອຜູ້ທີ່ຕ້ອງການໃສ່ເລືອດ ຮຽກຮ້ອງໃຫ້ທຸກພາກສ່ວນໃຫ້ຄວາມສຳຄັນ ໃນການມີສ່ວນຮ່ວມໃນການເຄື່ອນ ໄຫວໂຄສະນາເຜີຍແຜ່ ແລະ ບໍລິຈາກເລືອດໃຫ້ໄດ້ຕາມຄວາມຮຽກຮ້ອງຕ້ອງ ການຂອງສັງຄົມ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ