​(ສພຊ) ໃນໂອກາດທີ່ມາເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນລະຫວ່າງຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ຄັ້ງທີ XII ເຊິ່ງຈັດຂຶ້ນຢູ່ແຂວງອຸດົມໄຊ; ວັນພະຫັດທີ 07 ມີນາຜ່ານມາ, ສະຫາຍ ຫວູ ມິ່ງ ຕ໋ວນ ຮອງຫົວໜ້າຫ້ອງວ່າການສະພາແຫ່ງຊາດຫວຽດນາມ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ນຳເອົາຄອມພິວເຕີຕັ້ງໂຕະ ຈຳນວນ 05 ຊຸດ ແລະ ອຸປະກອນການຮຽນຈຳ ນວນໜຶ່ງ ມາມອບໃຫ້ແກ່ໂຮງຮຽນສາມັນກິນນອນຊົນເຜົ່າແຂວງອຸດົມໄຊ ເພື່ອເປັນການສົ່ງເສີມການສຶກສາ ເວົ້າລວມ, ເວົ້າສະເພາະແມ່ນການຮຽນ-ການສອນຂອງຄູອາຈານ ແລະ ນ້ອງນັກຮຽນຢູ່ໂຮງຮຽນດັ່ງກ່າວ ໃຫ້ນັບມື້ດີຂຶ້ນ.
ກ່າວມອບໂດຍສະຫາຍ ຫວູ ມີ່ງ ຕ໋ວນ ແລະ ກ່າວຮັບໂດຍສະຫາຍ ສົມຈັນ ພົນທະສິດ ຜູ້ອຳນວຍການໂຮງຮຽນສາມັນກິນນອນຊົນເຜົ່າແຂວງອຸດົມໄຊ; ມີສະຫາຍ ນາງ ປິ່ງຄໍາ ລາຊະສິມມາ ກຳມະການສູນກາງພັກ, ເລ ຂາທິການສະພາແຫ່ງຊາດ ພ້ອມດ້ວຍຄະນະຜູ້ແທນກອງປະຊຸມສໍາມະນາຄັ້ງນີ້, ຄູອາຈານ ແລະ ນ້ອງນັກຮຽນເຂົ້າຮ່ວມ.
​ໂອກາດດັ່ງກ່າວ, ສະຫາຍ ສົມຈັນ ພົນທະສິດ ໄດ້ສະແດງຄວາມຂອບໃຈຕໍ່ຫ້ອງວ່າການສະພາແຫ່ງຊາດຫວຽດນາມ ທີ່ໄດ້ນຳເອົາເຄື່ອງມາຊ່ວຍເຫຼືອ ເຊິ່ງເປັນການປະກອບສ່ວນສຳຄັນເຂົ້າໃນການຮຽນ-ການສອນ ພ້ອມທັງຈະນຳໃຊ້ເຄື່ອງດັ່ງກ່າວ ໝູນໃຊ້ເຂົ້າໃນວຽກງານຂອງໂຮງຮຽນໃຫ້ໄດ້ຮັບການພັດທະນາດີຂຶ້ນ.
ນອກຈາກນັ້ນ, ຄະນະຜຸ້ແທນທັງສອງຝ່າຍ ຍັງໄດ້ໄປນະມັດສະການພະເຈົ້າສິງຄຳ ແລະ​ ຢ້ຽມຊົມສະຖານທີ່ທ່ອງທ່ຽວນຳ້ກັດຢໍລະປາ ອີກດ້ວຍ.​
(ຂ່າວ-ພາບ: ອານຸສອນ ພູມີທອນ)