(ສພຊ) ກອງປະຊຸມຄະນະປະຈຳສະພາແຫ່ງຊາດປະຈຳເດືອນສິງຫາ 2022 ໄດ້ໄຂຂຶ້ນໃນລະຫວ່າງວັນທີ 25-26 ສິງຫາຜ່ານມາ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ; ເຂົ້າຮ່ວມມີບັນດາທ່ານຮອງປະທານຄະນະປະຈໍາສະພາແຫ່ງຊາດ, ບັນດາທ່ານກຳມະການຄະນະປະຈໍາສະພາແຫ່ງຊາດ ແລະ ແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນສິງຫາ 2022 ດໍາເນີນໃນທ່າມກາງທີ່ບັນດາກົງຈັກເສນາທິການຂອງສະພາແຫ່ງຊາດ ກໍາລັງຈັດຕັ້ງຜັນຂະຫຍາຍຜົນສໍາເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ເຊິ່ງໄດ້ພິຈາລະນາເນື້ອໃນສໍາຄັນຕ່າງໆ ເປັນຕົ້ນ ບົດລາຍງານການຮຽບຮຽງກົດໝາຍ ຈໍານວນ 4 ສະບັບ ຄື: ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ); ກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ (ສ້າງໃໝ່); ກົດໝາຍວ່າດ້ວຍການປັບປຸງກົດໝາຍວ່າດ້ວຍສານປະຊາຊົນ; ກົດໝາຍວ່າດ້ວຍການແກ້ໄຂຄໍຮ້ອງທຸກ (ສະບັບປັບປຸງ); ບົດລາຍງານການກະກຽມບັນດາຮ່າງກົດໝາຍ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ທົບທວນຄືນແຜນການສ້າງ ແລະ ປັບປຸງກົດໝາຍແຕ່ປີ 2023-2025; ບົດລາຍງານການຈັດຕັ້ງທາບທາມຄຳເຫັນຕໍ່ຮ່າງກົດໝາຍຂອງ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ;
ບົດລາຍງານຂໍທິດຊີ້ນຳກ່ຽວກັບ ກົນໄກວິທີແກ້ໄຂຄຳຮ້ອງຂໍຄວາມເປັນທຳ ລວມທັງການພິຈາລະນາຄຳຮ້ອງຂໍຄວາມເປັນທຳຈໍານວນໜຶ່ງ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຫັນປ່ຽນເນື້ອທີ່ດິນປ່າໄມ້ທຳມະຊາດ ໄປເປັນທີ່ດິນອຸດສາຫະກຳ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຍົກເວັ້ນພາສີ ແລະ ອາກອນມູນຄ່າເພີ່ມ ສໍາລັບການນໍາເຂົ້າວັດຖຸດິບ ແລະ ຊີ້ນສ່ວນປະກອບ ເພື່ອຮັບໃຊ້ໃນວຽກງານການຜະລິດ ແລະ ການປະກອບລົດ ຈໍາໜ່າຍພາຍໃນປະເທດ ຂອງບໍລິສັດໂອໂຕ້ເວີນ ຈໍາກັດຜູ້ດຽວ; ບົດລາຍງານການຕິດຕາມກວດກາ ແລະ ເກັບກຳຂໍ້ມູນກ່ຽວກັບ ການຈັດຕັ້ງປະຕິບັດວຽກງານທ່າບົກ 3 ແຫຼ່ງທີ່ໄດ້ເປີດບໍລິການ (ທ່າບົກເຊໂນສະຫວັນນະເຂດ, ທ່າບົກວັງເຕົ່າ ແລະ ທ່າບົກທ່ານາແລ້ງ);
ແຜນການຕິດຕາມກວດກາໂຄງການພັດທະນາເສດຖະກິດ-ສັງຄົມ ທີ່ສົ່ງຜົນກະທົບຕໍ່ການເປັນຢູ່ຂອງປະຊາຊົນ ແລະ ສິ່ງແວດລ້ອມ ໄລຍະ 6 ເດືອນທ້າຍປີ 2022 ຂອງຄະນະປະຈໍາສະພາແຫ່ງຊາດ; ຮັບຟັງບົດລາຍງານການຕິດຕາມກວດກາ ກ່ຽວກັບການຄວບຄຸມການແຜ່ລະບາດຂອງພະຍາດໄຂ້ຍຸງລາຍ ແລະ ພະຍາດໂຄວິດ-19 ຈາກກະຊວງສາທາລະນະສຸກ ແລະ ກຳມາທິການວັດທະນະທຳ-ສັງຄົມ; ບົດລາຍງານການຕິດຕາມກວດກາການຈັດຕັ້ງຜັນຂະຫຍາຍມະຕິກອງປະຊຸມສະພາແຫ່ງຊາດ ສະບັບເລກທີ 59/ສພຊ, ລົງວັນທີ 8 ກໍລະກົດ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດຕິດພັນກັບການປ້ອງກັນ ແລະ ຮັບມືກັບການແຜ່ລະບາດຂອງພະຍາດໂຄວິດ-19; 
ຮ່າງແຜນການຕິດຕາມກວດກາ ກ່ຽວກັບການສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທຳຂອງປະຊາຊົນ ແກ້ໄຂບັນຫາການວ່າງງານ ເພື່ອກະກຽມລາຍງານຕໍ່ ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX; ຮ່າງມະຕິຂອງຄະນະປະຈຳສະພາແຫ່ງຊາດວ່າດ້ວຍການແຕ່ງຕັ້ງກຸ່ມສະມາຊິກສະພາແຫ່ງຊາດ ເພດຍິງ ຊຸດທີ IX ຈາກກຳມາທິການວັດທະນະທຳ-ສັງຄົມ; ການກະກຽມການຕ້ອນຮັບຄະນະຜູ້ແທນຂັ້ນສູງກຳປູເຈຍ ນຳໂດຍສົມເດັດ ເຮັງ ຊຳ ຣິນ ປະທານສະພາແຫ່ງຊາດ ແຫ່ງຣາຊະອານາຈັກກຳປູເຈຍ ພ້ອມດ້ວຍພັນລະຍາ ແລະ ຄະນະ ທີ່ຈະເດີນທາງມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ; ສະເໜີພິຈາລະນາແຕ່ງຕັ້ງຄະນະຊີ້ນຳລະດັບຊາດ ເພື່ອກະກຽມເປັນເຈົ້າພາບຈັດກອງປະຊຸມທີ່ ສປປລາວ ຄື: ກອງປະຊຸມຮ່ວມລະຫວ່າງ 3 ສະພາແຫ່ງຊາດ ກຳປູເຈຍ, ລາວ ແລະ ຫວຽດນາມ (CLV) ຄັ້ງທີ 1 ໃນເດືອນມີນາ 2023; 
ກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃນທ້າຍເດືອນກັນຍາ 2024; ລາຍງານແຜນການຮ່ວມມື ລະຫວ່າງຄະນະສະມັດຊາລັດຖະສະພາຝຣັ່ງໂກໂຟນີ ຂອງສະພາແຫ່ງຊາດລາວ ແລະ ອົງການສະມັດຊາລັດຖະສະພາທີ່ໃຊ້ພາສາຝຣັ່ງ (APF); ແຜນກິດຈະກຳສ້າງຂະບວນການ ສະເຫຼີມສສະຫຼອງປີສາມັກຄີມິດຕະພາບ ລາວ-ຫວຽດນາມ ຄົບຮອບ 60 ປີ; ພ້ອມກັນນັ້ນ, ຜູ້ແທນກອງປະຊຸມ ກໍໄດ້ຜັດປ່ຽນກັນປະກອບຄຳຄິດຄຳເຫັນໃສ່ບົດລາຍງານ ແລະ ແຜນການຕ່າງໆທີ່ໄດ້ນຳມາສະເໜີໃນຄັ້ງນີ້.(ພາບ ແລະ ຂ່າວ: ສອນສັກ ວັນວິໄຊ)