loader image

ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຫາລືແນວຄິດລິເລີ່ມການສ້າງເມືອງອັດສະລິຍະແຫ່ງສຸຂະພາບຂອງປະຊາຄົມອາຊຽນ

​ກ.ກ. 10, 2024 | SlideMobile, ຂ່າວເດັ່ນ

(ສພຊ) – ຕອນບ່າຍວັນທີ 08 ກໍລະກົດຜ່ານມາ ທີ່ສະພາແຫ່ງຊາດ, ທ່ານ ນາງ ທຸມມາລີ ວົງພະຈັນ ປະ ທານກຳມາທິການຍຸຕິທຳ, ຫົວໜ້າຄະນະຮັບຜິດຊອບເນື້ອໃນດ້ານວຽກງານສັງຄົມຂອງອະນຸກຳມະການເນື້ອໃນໄອປາ-45 ພ້ອມດ້ວຍຄະນະ ໄດ້ຕ້ອນຮັບ ແລະ ພົບປະກັບທ່ານ ສຈ. ດຣ. ຢຸນ ຊອນ ຮົງ (Yun-Chul Hong) ປະທານຄະນະກຳມະການປ້ອງກັນພະຍາດ ແຫ່ງ ສ.ເກົາຫຼີ, ປະທານຄະນະບໍລິຫານງານເວທີປາໄສເມືອງສຸຂະພາບໂລກ (World Health Cities Forum – WHCF) ພ້ອມດ້ວຍຄະນະ ໃນໂອກາດທີ່ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປລາວ ລະຫວ່າງວັນທີ 07-08 ກໍລະກົດ 2024.

ທ່ານ ນາງ ທຸມມາລີ ວົງພະຈັນ ໄດ້ສະແດງຄວາມຍິນດີຕ້ອນຮັບ ພ້ອມທັງສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຄວາມເອົາໃຈໃສ່ຂອງຄະນະຊ່ຽວຊານ ສ.ເກົາຫຼີ ທີ່ໄດ້ສະໜັບສະໜູນ ສປປລາວ ໃຫ້ນຳເອົາແນວຄິດລິເລີ່ມກ່ຽວກັບເມືອງອັດສະລິຍະແຫ່ງສຸຂະພາບຂອງປະຊາຄົມອາຊຽນ (ASEAN Smart Health City Initiative) ເຂົ້ານໍາສະເໜີໃນກອງປະຊຸມໄອປາ ຄັ້ງທີ 45 ທີ່ ສປປລາວ ເປັນເຈົ້າພາບ ເຊິ່ງແນວຄວາມຄິດລິເລີ່ມດັ່ງກ່າວ ຈະມີປະໂຫຍດແກ່ ສປປລາວ ກໍຄືປະຊາຄົມອາຊຽນໃນອະນາຄົດ ເນື່ອງຈາກວ່າ: (1) ສປປລາວ ຈະມີມະຕິເປັນຂອງຕົນເອງ ເພື່ອນໍາສະເໜີກອງປະຊຸມສຸດຍອດອາຊຽນ ແລະ ກອງປະຊຸມໄອປາ ຮັບຮອງເອົາຢ່າງເປັນທາງການ; (2) ສປປລາວ ຈະເປັນຕົວແບບໃນການຈັດຕັ້ງປະຕິບັດໂຄງການດັ່ງກ່າວເປັນປະເທດທໍາອິດໃນພາກພື້ນອາຊຽນ ແລະ ຖ້າເປັນຜົນສໍາເລັດ ກໍຈະເປັນປະໂຫຍດຕໍ່ແນວທາງຮັກສາສຸຂະພາບທີ່ດີຂອງປະຊາຊົນລາວ ກໍຄືປະຊາຊົນອາຊຽນ ພ້ອມທັງຈະເປັນການຍົກສູງບົດບາດຂອງ ສປປລາວ ທາງດ້ານຄວາມເປັນຜູ້ນໍາດ້ານດັ່ງກ່າວ.

ທັງສອງຝ່າຍໄດ້ປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບແນວຄິດລິເລີ່ມການສ້າງເມືອງອັດສະລິຍະແຫ່ງສຸຂະພາບຂອງປະຊາຄົມອາຊຽນ ໃນການນຳໃຊ້ເຕັກໂນໂລຊີທີ່ທັນສະໄໝເຂົ້າໃນການຮັກສາ, ຮ່າງມະຕິວ່າດ້ວຍ ‘‘ການສົ່ງເສີມບົດບາດຂອງລັດຖະສະພາກ່ຽວກັບນະວັດຕະກຳການຮັກສາສຸຂະພາບແບບອັດສະລິຍະ’’ ທີ່ຈະນຳເຂົ້າຮັບຮອງໃນກອງປະຊຸມກຳມາທິການສັງຄົມຂອງກອງປະຊຸມໄອປາ ຄັ້ງທີ 45. ສຳລັບທິດທາງການຮ່ວມມືໃນຕໍ່ໜ້າ, ສະເໜີໃຫ້ສືບຕໍ່ສະໜັບສະໜູນ ສປປລາວ ໃນການເປັນເຈົ້າພາບຈັດກອງປະຊຸມສຸດຍອດອາ ຊຽນ ແລະ ກອງປະຊຸມໄອປາ ໃນປີ 2024 ໂດຍສະເພາະແມ່ນການສະໜອງຂໍ້ມູນ, ຮ່າງມະຕິ ແລະ ຮ່າງບົດສະເໜີແນວຄິດລິເລີ່ມດັ່ງກ່າວ; ສືບຕໍ່ຊ່ວຍເຫຼືອທາງດ້ານທຶນຮອນ ແລະ ວິຊາການ ເພື່ອພັດທະນາວຽກງານສາທາລະນະສຸກຂອງ ສປປລາວ.

(ຂ່າວ-ພາບ: ອານຸສອນ ພູມມີທອນ)