ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ທິດດີ
ຜ່ານມາໄດ້ຂຽນເລື່ອງຍຸດທະສາດຫັນປ່ຽນໂດຍສັນຕິ; ມື້ນີ້ມາເວົ້າເລື່ອງ: 1. ການຫັນປ່ຽນດ້ວຍຕົນເອງ..” ເຊິ່ງຜູ້ຂຽນໄດ້ຄົ້ນຄວ້າຈາກເອກະສານພາຍໃນ ແລະ ຈາກປະເທດເພື່ອນມິດຍຸດທະສາດ… ການທີ່ສະເໜີບົດນີ້ ແມ່ນມີຈຸດປະສົງຢາກໃຫ້ກໍາໄດ້ວ່າ ບັນດາປາກົດການຫຍໍ້ທໍ້ຕ່າງໆໃນສັງຄົມ ໂດຍສະເພາະທາງດ້ານແນວຄິດນັ້ນມັນມາຈາກກະໂຕຂອງເຮົາເອງ.
ຫັນປ່ຽນດ້ວຍຕົນເອງ ແມ່ນກະໂຕເຈົ້າກຳເອງ (ອົງການຈັດຕັ້ງ; ບຸກຄົນ) ມີການປະພຶດ; ການກະທໍາທີ່ສ້າງຂຶ້ນດ້ວຍຕົນເອງ ໂດຍໃຊ້ກຳລັງແຮງສົມທົບໃຊ້ຄວາມສາມາດສະເພາະຕົວຂອງການຈັດ ຕັ້ງ ຫຼື ບຸກຄົນແລ້ວສ້າງໃຫ້ມີການປ່ຽນແປງເປັນຮູບແບບ; ຮູບລັກສະນະອື່ນທາງດ້ານແນວຄິດ-ການ ເມືອງ; ສິນລະທຳ; ຄຸນສົມບັດ; ແບບແຜນດຳລົງຊີວິດ ຫຼື ທາງດ້ານຈິດສໍານຶກ ແລະ ຄວາມຮັບຜິດຊອບ.
ການຫັນປ່ຽນດ້ວຍຕົນເອງ ແມ່ນດຳເນີນໄປເປັນຂະບວນວິວັດ ໝາຍຄວາມວ່າມັນເກີດຂຶ້ນກັບແຕ່ລະຄົນ, ແຕ່ລະອົງການຈັດຕັ້ງໃນໄລຍະໃດໜຶ່ງອາດຈະຍາວ ຫຼື ສັ້ນ ຫຼື ດົນປານໃດ ແມ່ນຂຶ້ນກັບຄວາມໜັກແໜ້ນດ້ານການເມືອງ ຂອງສະມາຊິກພັກ ກໍຄືທຸກຊັ້ນຄົນໃນສັງຄົມ ແລະ ລະດັບຄວາມຊື່ສັດທາງດ້ານຄຸນສົມບັດ; ແບບແຜນດໍາລົງຊີວິດຂອງແຕ່ລະຄົນ.
ຂະບວນການວິວັດການ “..ຫັນປ່ຽນດ້ວຍຕົນເອງ..” ສາມາດເກີດຂຶ້ນສາມໄລຍະ ໂດຍໃນໄລຍະເບື້ອງຕົ້ນ; ເປົ້າໝາຍຈະສະແດງຄວາມຄອນແຄນ; ຫວັ່ນໄຫວທາງດ້ານການເມືອງແນວຄິດ; ເກີດຄວາມສົງໄສກ່ຽວກັບການນໍາພາຂອງພັກ ແລະ ລັກສະນະວິທະຍາສາດຂອງລັດທິມາກ-ເລນິນ…ການສະແດງອອກແບບນີ້ຖ້າບໍ່ມີການຕິດຕາມ; ສໍາຫຼວດກວດກາ; ຕໍານິຕິຊົມຈະບໍ່ສາມາດຜ່ານໄລຍະນີ້ໄປໄດ້.. ໄລຍະທີສອງ ເປົ້າໝາຍຈະເລີ່ມເປັນເຈົ້າການໃນການຮັບຂໍ້ມູນທີ່ຜິດພາດ; ບັນດາຖ້ອຍທໍານອງຕໍ່ຕ້ານ ຫຼື ທິດສະດີປໍລະປັກກ້າວໄປເຖີງການເກັບກຳຂໍ້ມູນພາຍໃນ ສົ່ງອອກໄປຕ່າງປະເທດ ໂດຍຜ່ານສື່ອອນລາຍ ຫຼື ຜ່ານບັນດາການເຄື່ອນໄຫວສາກົນເປັນຂົວຕໍ່ໃຫ້ອິດທິກຳລັງປໍລະປັກຈາກພາຍນອກບຸກໂຈມຕີເຂົ້າພາຍໃນພວກເຮົາ, ໄລຍະທີສາມ ແມ່ນໄລຍະສູງຂອງການຫັນປ່ຽນດ້ວຍຕົນເອງ; ເປົ້າໝາຍເຕັມໄປດ້ວຍແນວຄິດປໍລະປັກ ແລະ ຕໍ່ຕ້ານ; ມັນຈະໄປຊອກຫາກຳລັງເພື່ອເຕົ້າໂຮມສ້າງຕັ້ງເປັນຫຼັກແຫຼ່ງແກ່ນສານເປັນການຈັດຕັ້ງເບື້ອງຕົ້ນ. ບາງຄົນກໍໄປຊອກທາງເຂົ້າໄປຫາອົງການພິເສດຢູ່ຕ່າງປະເທດເພື່ອສົມຮູ້ຮ່ວມຄິດ.
ບັນດາປາກົດການທີ່ສະແດງອອກໃຫ້ເຫັນເຖີງການຫັນປ່ຽນດ້ວຍຕົນເອງຂອງພະນັກງານ; ສະມາຊິກພັກຈໍານວນໜຶ່ງພໍສັງລວມໄດ້ດັ່ງນີ້:
• ດຳລົງຊີວິດເຫັນແກ່ຕົວ; ເຫັນແກ່ຜົນປະໂຫຍດສ່ວນຕົວ; ສວຍໂອກາດຈາກຊ່ອງວ່າງ ເພື່ອສ້າງຮັ່ງຄູນມີ; ສໍ້ລາດບັງຫຼວງ ຟຸມເຟືອຍໃນການດໍາລົງຊີວິດ.
• ມັກສ້າງຊື່ສຽງ; ພັກພວກ, ພາກສ່ວນຂາດຄວາມສາມັກຄີ.
• ເປັນອາດຍາສິດ, ຫ່າງເຫີນປະຊາຊົນ; ຂາດຄວາມຮູ້ສຶກຕໍ່ຄວາມຫຍຸ້ງຍາກ; ຄວາມເດືອດຮ້ອນຂອງປະຊາຊົນ.
• ມີແບບແຜນດຳລົງຊີວິດທີ່ຟຸມເຟືອຍ; ສະໜຸກສຸກສະບາຍ; ເສື່ອມຊາມ.
• ຄຳເວົ້າບໍ່ໄປຄຽງຄູ່ກັບການກະທໍາ; ເວົ້າຢ່າງໜຶ່ງເຮັດອີກຢ່າງໜຶ່ງ; ບໍ່ເຂັ້ມງວດຕໍ່ຄຸນສົມບັດສິນທໍາປະຕິວັດ, ຫຼັກສິນທໍາ ແລະ ຈັນຍາບັນອາຊີບ; ບໍ່ເປັນແບບຢ່າງໃນການດໍາລົງຊີວິດຂອງຕົນເອງ ແລະ ຄອບຄົວໃນສັງຄົມ.
ທັງໝົດນັ້ນຄື ບາງຂໍ້ມູນ ທີ່ສຳຄັນຂອງການຫັນປ່ຽນດ້ວຍຕົນເອງທີ່ເປັນຂົວຕໍ່ສຳຄັນຂອງຍຸດທະສາດການຫັນປ່ຽນໂດຍສັນຕິບຸກໂຈມຕີເຂົ້າພວກເຮົາ.