ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 15-17 ກັນຍາ 2022 ຜ່ານມານີ້, ທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 04, ປະທານ ສພຂ ແລະ ທ່ານ ນາງ ຄຳພອນ ພິມມະຈັນ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 04, ຮອງປະທານ ສພຂ, ມີບັນດາທ່ານປະທານຄະນະກຳມະການ, ຮອງປະທານຄະນະກຳມະການ ແລະ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງປາກແບງ ໄດ້ລົງເຄື່ອນໄຫວຕິດຕາມກວດກາ ໂຄງການຂຸດຄົ້ນແຮ່ຄຳ ຂອງບໍລິສັດລາວຊິນຫຼົງ ບຸກເບີກອຸດສາຫະກຳບໍ່ແຮ່ຈຳກັດ ຢູ່ເມືອງປາກແບງ, ແຂວງອຸດົມໄຊ ແລະ ພ້ອມທັງໄດ້ເຄື່ອນໄຫວພົບປະ ພໍ່ແມ່-ປະຊາຊົນ ຢູ່ບັນດາບ້ານທີ່ໄດ້ຮັບຜົນກະທົບຈາກໂຄງການດັ່ງກ່າວຄື: ບ້ານພູຫຸງ, ມົກແຫວນ, ມົກກ່າ, ງອນ, ຄໍາ, ສຸກໄຊ, ຕອງ, ລອງຍອງ, ພູຫຼວງ, ຈອມຊ້າງນໍ້າເຢັນ ແລະ ບ້ານ ພູຊາງ ມີຄະນະຮັບຜິດຊອບ, ອົງການປົກຄອງບ້ານ, ຄູ-ອາຈານ ແລະ ພໍ່ແມ່ນປະຊາຊົນບັນດາເຜົ່າພາຍໃນບ້ານເຂົ້າຮ່ວມທັງໝົດ 489 ຄົນ, ຍິງ 236 ຄົນ.
 
ຈຸດປະສົງຂອງການລົງເຄື່ອນໄຫວຕິດຕາມກວດກາ ໃນຄັ້ງນີ້, ເພື່ອເປັນການຫັນລົງຮາກຖານ, ເກັບກໍາສະພາບການ, ຮັບຟັງຄຳຄິດ, ຄຳເຫັນ, ຄຳສະເໜີຂອງປະຊາຊົນບັນດາເຜົ່າ ຕິດພັນກັບການຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ, ແຜນພັດທະນາເສດຖະກິດ-ສັງຄົມ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມສະພາປະຊາຊົນແຂວງ, ບັນດານິຕິກຳຂອງອົງການອຳນາດລັດຂັ້ນຕ່າງໆ.
ຜ່ານການຮັບຟັງການລາຍງານຂອງພາກສ່ວນທີ່ກ່ຽວຂ້ອງຂັ້ນເມືອງ-ຂັ້ນແຂວງ, ສົມທົບກັບບໍລິສັດ ແລະ ອົງການຈັດຕັ້ງບ້ານ ເຊິ່ງໃນໄລຍະຜ່ານມາ ບໍລິສັດໄດ້ແກ້ໄຂຫລາຍບັນຫາຜົນກະທົບຈາກການຂຸດຄົ້ນແຮ່ຄໍາ ເປັນຕົ້ນແມ່ນໄດ້ຊົດເຊີຍຕ່າງ ແລະ ກໍ່ສ້າງພື້ນຖານໂຄງລ່າງ ໄດ້ສ້າງເຮືອນຈຳນວນ 24 ຫລັງໃຫ້ຈຳນວນຄອບຄົວທີ່ໄດ້ຮັບຜົນກະທົບຈາກເຂດສຳປະທານ, ກໍ່ສ້າງຕະຫລາດຊຸມຊົນ, ໂຮງຮຽນ, ສະໂມສອນບ້ານ ແລະ ສີ່ງອຳນວຍຄວາມສະດວກອື່ນໆ ເປັນຕົ້ນແມ່ນໄຟຟ້າ, ນ້ຳລິນສະອາດ, ນອກນີ້ ຍັງມີວຽກງານຫັນປ່ຽນອາຊີບຂອງປະຊາຊົນທີ່ໄດ້ຮັບຜົນກະທົບຈາກໂຄງການ, ວຽກງານຍົກຍ້າຍ ແລະ ຈັດສັນທີ່ດິນທີ່ຢູ່ອາໃສຂອງປະຊາຊົນ, ວຽກງານປ້ອງກັນເວນຍາມ ແລະ ສຶກສາອົບຮົມໄກ່ເກ່ຍ ແລະ ແກ້ໄຂບັນຫາສິ່ງຫຍໍ້ທໍ້ຕ່າງໆ ແມ່ນໄດ້ຮັບການແກ້ໄຂໃນລະດັບໜຶ່ງ.
ໂອກາດດັ່ງກ່າວ ບັນດາທ່ານສະມາຊິກສະພາແຫ່ງຊາດ, ສະພາປະຊາຊົນແຂວງ ກໍ່ໄດ້ມີຄຳຖາມເຈາະຈີ້ມ ໂດຍສະເພາະແມ່ນວຽກງານການຄຸ້ມຄອງບໍລິສັດໃຫ້ຢູ່ໃນລະບຽບກົດໝາຍເຊັ່ນ: ວຽກງານການຄຸ້ມຄອງບຸກຄະລາກອນ, ສິ່ງແວດລ້ອມ, ກະສິກຳ ແລະ ປ່າໄມ້, ສຶກສາທິການ ແລະ ກິລາ, ສາທາລະນະສຸກ, ການຈັດສັນອາຊີບໃຫ້ແກ່ປະຊາຊົນທີ່ໄດ້ຮັບຜົນກະທົບ, ນອກຈາກນັ້ນ ທາງທິມງານໄດ້ຮັບຟັງຄໍາຄິດເຫັນ, ຄໍາສະເໜີຂອງປະຊາຊົນ ແລະ ແລກປ່ຽນກັນ ຢ່າງກົງໄປກົງມາ.
ຈາກບັນຫາດັ່ງກ່າວ ຍິ່ງມີຄວາມຈໍາເປັນໃນການຕິດຕາມກວດກາຂອງສະພາປະຊາຊົນແຂວງ ໃນການສ້າງເງື່ອນໄຂໃຫ້ປະຊາຊົນໄດ້ເຂົ້າຮ່ວມ ໃນການຕິດຕາມກວດກາການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ເພື່ອໃຫ້ອຳນາດລັດ, ກົດໝາຍ ມີຄວາມສັກສິດ ສະກັດກັ້ນການລະເມີດລະບຽບກົດໝາຍ, ແກ້ໄຂປະກົດການຫຍໍ້ທໍ້ໃນສັງຄົມ, ພ້ອມທັງສ້າງທັກສະການປະກອບຄຳເຫັນ ແລະ ການຕິດຕາມກວດກາ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃຫ້ມີຄວາມຊຳນານ ແລະ ເຂົ້າໃຈຕໍ່ພາລະບົດບາດຂອງຕົນຫຼາຍຂຶ້ນ.
   ພາບ/ຂ່າວ: ແສງພອນ ອິນນະລົງ.
ສະໜັບສະໜູນໂດຍ: ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານປົກຄອງທີ່ດີ ແລະ ການສ້າງລັດປົກຄອງດ້ວຍກົດໝາຍ(ແຜນງານເຊກາ-CEGGA).