ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ໃນລະຫວ່າງວັນທີ 6-8 ທັນວາ 2021, ສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຂອງສະພາແຫ່ງຊາດ ແຫ່ງ ສປປລາວ ໄດ້ສໍາເລັດການຢ້ຽມຢາມສັນຖະວະໄມຕີ ແລະເຮັດວຽກ ຢູ່ ສສ. ຫວຽດນາມ ຢ່າງເປັນທາງການ.

ໃນການຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ຄັ້ງນີ້, ສະຫາຍປະທານສະພາແຫ່ງຊາດລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບບັນດາການນໍາຂັ້ນສູງພັກ-ລັດ ຂອງ ສສ.ຫວຽດນາມ ເປັນຕົ້ນການເຂົ້າຢ້ຽມຂໍ່ານັບສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ; ຢ້ຽມຂໍ່ານັບ ສະຫາຍ ຫງວຽນ ຊວນ ຟຸກກຳມະການກົມການເມືອງສູນກາງພັກ, ປະທານປະເທດ ແຫ່ງ ສສ.ຫວຽດນາມ; ້ຽຢາມພົບປະ ສະຫາຍ ຟາມ ມິງ ຈິງ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສສ. ຫວຽດນາມ; ພ້ອມນັ້ນ, ຍັງໄດ້ມີການພົບປະສອງຝ່າຍ ລະຫວ່າງສອງປະທານສະພາແຫ່ງຊາດໂດຍມີສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ແລະ ສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽນາມ ດ້ວຍບັນຍາກາດແຫ່ງໄມຕີຈິດມິດຕະພາບອັນອົບອຸ່ນ, ສະໜິດສະໜົມຖານສະຫາຍອ້າຍນ້ອງ ເຊິ່ງການພົບປະຄັ້ງນີ້, ສອງຝ່າຍໄດ້ພ້ອມກັນຕີລາຄາຄືນການພົວພັນຮ່ວມມື ລະຫວ່າງສອງອົງການນິຕິບັນຍັດຂອງສອງປະເທດ ໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການໃນຕໍ່ໜ້າ ເປັນຕົ້ນແມ່ນການປັບປຸງບົດບັນທຶກການຮ່ວມມື ລະຫວ່າງສອງອົງການນິຕິບັນຍັດ ເຊິ່ງຈະໝົດອາຍຸໃນປີ 2022, ການສ້າງກິດຈະກໍາສະເຫລີມສະຫລອງສອງວັນປະຫວັດສາດ ແລະ ປີສາມັກຄີມິດຕະພາບລາວ-ຫວຽດນາມ ໃນປີ 2022; ທັງສອງຝ່າຍໄດ້ເອກະພາບສືບຕໍ່ການພົວພັນຮວມມື ລະຫວ່າງສອງອົງການນິຕິບັນຍັດ ເປັນຕົ້ນການປັບປຸງບົດບັນທຶກສອງຝ່າຍ, ການແລກປ່ຽນຄະນະຜູ້ແທນ, ແລກປ່ຽນຄະນະມິດຕະພາບ, ແລກປ່ຽນສະມາຊິກສະພາແຫ່ງຊາດ (ສສຊ) ໜຸ່ມ, ແລກປ່ຽນ ສສຊ ເພດຍິງ, ແລກປ່ຽນຈັດຕັ້ງກອງປະຊຸມສໍາມະນາໃນຫົວຂໍ້ວິທະຍາສາດຮ່ວມກັນ, ຊຸກຍູ້ການພົວພັນຮ່ວມມືລະຫວ່າງສອງລັດຖະບານ, ປະສານສົມທົບຮ່ວມກັນຕິດຕາມກວດກາບັນດາໂຄງການຮ່ວມມືຕ່າງໆ, ປະ ສານສົມທົບໃນການພົວພັນຮ່ວມມືໃນເວທີພາກພື້ນ ແລະ ສາກົນ ປັນຕົ້ນ AIPA, IPU, APPF, ASEP, CLV ແລະ ອື່ນໆ; ຮ່ວມກັນຈັດຕັ້ງບັນດາກິດຈະກໍາສະເຫລີມສະຫລອງປີສາມັກຄີມິດຕະພາບ; ສືບຕໍ່ການຄົ້ນຄວ້າຍ້ອງຍໍບັນດາກົມກອງ ແລະ ບຸກຄົນຝ່າຍຫວຽດນາມ ທີ່ມີຜົນງານດີເດັ່ນໃນການປຸກສ້າງຫໍສະພາແຫ່ງຊາດລາວ ຫລັງໃໝ່; ພ້ອມດຽວກັນນັ້ນ,ສສ.ຫວຽດນາມ ຈະສືບຕໍ່ໃຫ້ການຮ່ວມມືໃນການຄຸ້ມຄອງ ແລະ ນໍາໃຊ້ຫໍສະພາແຫ່ງຊາດລາວ ພ້ອມທັງສືບຕໍ່ແລກປ່ຽນບົດຮຽນກ່ຽວກັບວຽກງານອົງຄະນະພັກສະພາແຫ່ງຊາດ.

ສະຫາຍປະທານສະພາແຫ່ງຊາດລາວ ຍັງໄດ້ນໍາພາຄະນະ ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນ ຮ່ວມກັນ ລະຫວ່າງສອງສະພາແຫ່ງຊາດ ກ່ຽວກັບການຊັກຖາມໃນກອງປະຊຸມຂອງສະພາແຫ່ງຊາດ,ການນໍາໃຊ້ບັນດາຂໍ້ກໍານົດຂອງກົດໝາຍເຂົ້າໃນການຜັນຂະຫຍາຍບັນດາໂຄງການພັດທະນາເສດຖະກິດ-ສັງຄົມ, ໂຄງການລົງທຶນພາຍໃນ ແລະຕ່າງປະເທດ; ໄດ້ຕ້ອນຮັບ ແລະ ຢ້ຽມພົບປະກັບສະຫາຍ ນົງ ດຶກ ແມັງ ແລະ ສະຫາຍ ຫງວຽນ ວັນ ອານ ອາດີດປະທານສະພາແຫ່ງຊາດ ແຫ່ງ ສສ.ຫວຽດນາມ; ສະຫາຍ ເຈິນ ວັນ ຕຸ່ຍ ອາດີດກໍາມະການສູນກາງພັກກອມມູນິດຫວຽດນາມ, ອາດີດຫົວໜ້າຄະນະກຳມະການວຽກງານສະມາຊິກສະພາແຫ່ງຊາດ, ປະທານສະມາຄົມມິດຕະພາບຫວຽດນາມ-ລາວ ຂັ້ນສູນກາງ; ສະຫາຍ ນາງ ຫງວຽນ ທິ ກິມ ເງິນ ອະດີດປະທານສະພາແຫ່ງຊາດ ແຫ່ງ ສສ.ຫວຽດນາມ; ແລະ ສະຫາຍ ໂດ ວັນ ຈ້ຽນປະທານສູນກາງແນວໂຮມປະເທດຊາດ ແຫ່ງ ສສ.ຫວຽດນາມ

ນອກຈາກນັ້ນ, ຍັງໄດ້ເດີນທາງໄປແຂວງວິ້ງຟຸກ ເພື່ອຢ້ຽມຢາມກຸ່ມບໍລິສັດເກ້ວເລີມ ເຊິ່ງເປັນກຸ່ມບໍລິສັດທີ່ໄດ້ຮັບຜົນສໍາເລັດດ້ານກະສິກໍາ ໂດຍສະເພາະແມ່ນການຜະລິດຝຸ່ນຊີວະພາບດ້ວຍເຕັກໂນໂລຊີທີ່ທັນສະໄໝແລະ ຍັງໄດ້ຢ້ຽມຢາມ ແລະ ມີຄໍາເຫັນໂອ້ລົມພະນັກງານສະຖານເອກອັກຄະລັດຖະທູດ ແຫ່ງ ສປປລາວ ປະຈໍາ ສສ.ຫວຽດ ນາມ.

ການຢ້ຽມຢາມສັນຖະວະໄມຕີ ຢູ່ ສສ.ຫວຽດນາມ ຢ່າງເປັນທາງການໃນຄັ້ງນີ້ ຍັງເປັນການຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມກໍຄືສອງສະພາແຫ່ງຊາດລາວ ແລະ ຫວຽດນາມ ໃຫ້ ແໜ້ນແຟ້ນ ແລະເກີດດອກອອກຜົນງົດງາມຍິ່ງໆຂຶ້ນ.

(ພາບ ແລະ ຂ່າວ: ບຸນເກີດ ວົງໄຊຍາ)