ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ (ສພຂ) ຊຸດທີ II ສໍາເລັດຢ່າງຈົບງາມພາຍຫຼັງດໍາເນີນມາເປັນເວລາ 3 ວັນເຕັມ ແຕ່ ວັນ 23-25 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ທອງສີ ເສົາສຸລິພົມ ປະທານ ສະພາປະຊາຊົນແຂວງ; ມີ ທ່ານ ຄໍາຜອຍ ວັນນະສານ ເຈົ້າແຂວງ-ແຂວງຜົ້ງສາລີ, ຮອງເຈົ້າແຂວງ, ກໍາມະການປະຈໍາພັກແຂວງ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ 2 , ສະມາຊິກສະພາປະຊາຊົນແຂວງ (ສສຂ), ອາດິດການນໍາແຂວງ, ອາດິດ ສສຊ ປະຈໍາເຂດເລືອກຕັ້ງ2, ອາດິດ ສສຂ, ມີ ສະມາຊິກອົງການປົກຄອງແຂວງ, ອົງການແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ສະຫະພັນນັກຮົບເກົ່າແຂວງ, ອົງການພັກ-ລັດ, ອົງການລັດທຽບເທົ່າພະແນກຂັ້ນແຂວງ, ວິສາຫະກິດ, ຫົວໜ່ວຍທຸລະກິດທັງພາກລັດ, ພາກເອກະຊົນ ແລະ ພະນັກງານຊ່ວຍວຽກຄະນະ ສສຂ ປະຈໍາເມືອງເຂົ້າຮ່ວມ.
ກອງປະຊຸມຄັ້ງນີ້ດໍາເນີນໄປດ້ວຍບັນຍາກາດຟົດຟື້ນ ຈາກການປະກອບຄວາມຄິດ, ຄວາມເຫັນ ທີ່ມີລັກສະນະສ້າງ, ຮັດກຸມ, ຖືກປະເດັນ ແລະ ມີຄວາມເປັນເອກະພາບສູງ ຂອງສະມາຊິກສະພາປະຊາຊົນແຂວງ ບົນຫຼັກການເສີມຂະຫຍາຍສິດປະຊາທິປະໄຕ ແລະ ການເປັນຕົວແທນໃນການປົກປ້ອງສິດ, ຜົນປະໂຫຍດອັນຊອບທໍາຂອງປະຊາຊົນຊາວແຂວງຜົ້ງສາລີ ແລະ ການປະກອບສ່ວນຂອງອົງການປົກຄອງແຂວງ, ອົງການຕຸລາການ ແລະ ພາກສ່ວນທີ່ກ່ຽວຂ້ອງ ໃນການເປັນເຈົ້າການຂຶ້ນລາຍງານ, ຊີ້ແຈງຕໍ່ກັບບັນຫາຫາງສຽງສັງຄົມທີ່ໃຫ້ສົນໃຈຕໍ່ການຄຸ້ມຄອງເສດຖະກິດ-ສັງຄົມ ຂອງອົງການບໍລິຫານລັດ ແລະ ຄວາມເອົາໃຈໃສ່ຈາກທຸກພາກສ່ວນດັ່ງກ່າວ ເຮັດໃຫ້ສາມາດພິຈານາ ແລະ ຮັບຮອງເອົາບັນຫາສໍາຄັນພື້ນຂອງແຂວງດັ່ງນີ້:
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາການສະເໜີຍົກຍ້າຍ ນາງ ດວງຈັນ ຊາມູນຕີ ສະມາຊິກອົງການປົກຄອງແຂວງ ໄປຮັບໜ້າທີ່ຢູ່ແຂວງວຽງຈັນ;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາການສະເໜີແຕ່ງຕັ້ງ ທ່ານ ສົມຈິດ ສິດທິວົງ ເປັນຫົວໜ້າພະແນກກະສິກຳ ແລະ ປ່າໄມ້ແຂວງຜົ້ງສາລີ;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ເເລະ ແຜນການ 6 ເດືອນທ້າຍປີ 2022;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງຄະນະປະຈໍາສະພາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ໃນໄລະຍະແຕ່ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ຂໍ້ຕົກລົງເຈົ້າແຂວງ ວ່າດ້ວຍການການເພີ່ມທະວິໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ຢູ່ແຂວງຜົ້ງສາລີ;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ຂໍ້ຕົກລົງເຈົ້າແຂວງ ວ່າດ້ວຍການສ້າງກອງທຶນພັດທະນາກິລາກາຍຍະກຳຂອງແຂວງ;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ຂໍ້ຕົກລົງເຈົ້າແຂວງ ວ່າດ້ວຍການກໍານົດ ລາຄາຫົວໜ່ວຍຜົນກະທົບຈາກໂຄງການພັດທະນາພື້ນຖານໂຄງລ່າງຢູ່ແຂວງຜົ້ງສາລີ;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ຂໍ້ຕົກລົງເຈົ້າແຂວງ ວ່າດ້ວຍການຈັດງານບຸນປະເພນີ ຢູ່ແຂວງຜົ້ງສາລີ;
ທີ່ກອງປະຊຸມ ທ່ານ ທອງສີ ເສົາລຸລິພົມ ຕິລາຄາສູງຕໍ່ການດໍາເນີນກອງປະຊຸມໃນຄັ້ງນີ້ ໂດຍສະເພາະຕໍ່ກັບບັນດາເນື້ອໃນທີ່ນໍາເຂົ້າພິຈາລະນາໃນກອງປະຊຸມຄັ້ງນີ້ ມີບາງຕອນທ່ານໄດ້ກ່າວວ່າ: “ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາ 6 ເດືອນຕົ້ນປີ 2022 ແລະ ແຜນການປະຈໍາ 6 ເດືອນທ້າຍປີ 2022 ເຊິ່ງໄດ້ຕີລາຄາສູງຕໍ່ຄວາມພະຍາມຍາມຂອງອົງການປົກຄອງແຂວງ ໃນການສູ້ຊົນເຮັດ ໃຫ້ອັດຕາການເຕີບໂຕທາງດ້ານເສດຖະກິດສາມາດບັນລຸໄດ້ 6,47%, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສາມາດປະຄັບປະຄອງເສດຖະກິດບໍ່ໃຫ້ເຂົ້າສູ່ວິກິດການທີ່ໜັກໜ່ວງໄປກວ່ານີ້, ມີການແຕ່ງຕັ້ງຄະນະຮັບຜິດຊອບເພື່ອແກ້ໄຂບັນການເໜັງຕີງແຮງຂອງລາຄາສິນຄ້າ, ອັດຕາແລກປ່ຽນ, ຄວາມຫຍຸ້ງຍາກທາງດ້ານນ້ໍາມັນເຊື້ອໄຟ. ພ້ອມກັນນັ້ນ, ມີການໂຄສະນາເຜີຍແຜ່, ປຸກລະດົມໃຫ້ປະຊາຊົນລາວບັນດາເຜົ່າ ຊາວແຂວງຜົ້ງສາລີ ເພີ່ມທະວີນ້ໍາໃຈປະຢັດມັດທະຍັດ, ມີຄວາມສາມັກຄີເປັນຈິດໜຶ່ງໃຈດຽວ ພ້ອມກັນແກ້ໄຂບັນຫາໃນເວລາທີ່ປະເທດຊາດປະສົບກັບຄວາມຫຍຸ້ງຍາກ. ກອງປະຊຸມມອບໃຫ້ອົງການປົກຄອງແຂວງ ນໍາເອົາຄວາມຄິດເຫັນຂອງກອງປະຊຸມ ໄປພິຈາລະນາເພື່ອສືບຕໍ່ປັບປຸງ, ແກ້ໄຂບັນດາບັນຫາທີ່ຫຍຸ້ງຍາກທາງດ້ານເສດຖະກິດ-ການເງິນ ໃຫ້ກັບສູ່ສະພາບປົກກະຕິໂດຍໄວ; ພ້ອມກັນນັ້ນ, ທ່ານຍັງໄດ້ຮຽກຮອງໃຫ້ທຸກພາກສ່ວນເອົາໃຈໃສ່ຜັນຂະຫຍາຍເນື້ອໃນກອງປະຊຸມຄັ້ງນີ້ ໃຫ້ທົ່ວເຖິ່ງ ແລະ ກວ້າງຂວາງເພື່ອຮັບປະກັນໃຫ້ການຈັດຕັ້ງປະຕິບັດວຽກງານຕາມພາລະບົດບາດຂອງຕົນໄດບັນລຸຕາມບັນດາຄາດໝາຍທີ່ໄດ້ຮັບຮອງໃນຄັ້ງນີ້”.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ