ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ລະຫວ່າງວັນທີ 25-26 ກໍລະກົດ 2022 ທີ່ເມືອງວັງວຽງ ແຂວງວຽງຈັນ, ສະພາແຫ່ງຊາດ ແລະ ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມຮຽບຮຽງເນື້ອໃນກົດໝາຍວ່າດ້ວຍຄວາມປອດໄພຂອງເຂື່ອນ ໂດຍການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ, ມີຕາງໜ້າຈາກກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ກະຊວງພະລັງງານ ແລະ ບໍ່ແຮ່, ກະຊວງຍຸຕິທໍາ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ, ແຂກຖືກເຊີນ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອຮັບປະກັນເນື້ອໃນຂອງການຮ່າງກົດໝາຍວ່າດ້ວຍຄວາມປອດໄພຂອງເຂື່ອນ ທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃຫ້ມີເນື້ອໃນຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ. ກຳມາທິການກົດໝາຍ ສົມທົບກັບກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ກະຊວງພະລັງງານ ແລະ ບໍ່ແຮ່ ຈັດກອງປະຊຸມຮຽບຮຽງເນື້ອໃນຂອງຮ່າງກົດໝາຍຂຶ້ນ ເພື່ອຄົ້ນຄວ້າ, ເລືອກເຟັ້ນເອົາບັນດາຄຳຄິດເຫັນຂອງສະມາຊິກສະພາແຫ່ງຊາດ ເພື່ອມາປັບປຸງໃສ່ຮ່າງກົດໝາຍ.
ກອງປະຊຸມ ໄດ້ຮັບຟັງການລາຍງານການປັບປຸງ ຮ່າງ​ກົດໝາຍວ່າດ້ວຍຄວາມປອດໄພຂອງເຂື່ອນ ຈາກຜູ້ຕາງໜ້າ ກະຊວງພະລັງງານ ແລະ ບໍ່ແຮ່ ທີ່ໄດ້ຜ່ານກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນໃນວັນທີ 5 ກໍລະກົດ 2022 ຜ່ານມາ, ຕາມຄຳເຫັນຂອງສະມາຊິກສະພາແຫ່ງຊາດ ໃນວັນທີ 5 ກໍລະກົດ 2022 ເຊິ່ງມີບັນດາທ່ານສະມາຊິກສະພາແຫ່ງຊາດ ປະກອບຄໍາເຫັນທັງໝົດ 38 ທ່ານ ຈາກຈໍານວນ 48 ທ່ານ ທີ່ໄດ້ລົງທະບຽນປະກອບຄໍາເຫັນ ແລະ ສົ່ງເອກະສານປະກອບຄໍາເຫັນໃຫ້ກອງເລຂາ 23 ທ່ານ, ໃນນັ້ນ ກະຊວງພະລັງງານ ແລະ ບໍ່ແຮ່ ແມ່ນເຫັນດີປັບປຸງຈຳນວນໜຶ່ງຕາມການສະເໜີ ແລະ ອີກຈໍານວນໜຶ່ງ ແມ່ນຈະນໍາມາຄົ້ນຄວ້າປຶກສາຫາລືກັນຕື່ມໃນກອງປະຊຸມຄັ້ງນີ້.
​ ​ໂອກາດດັ່ງກ່າວ ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ກໍໄດ້ມີຄໍາເຫັນຕໍ່ກອງປະຊຸມດັ່ງກ່າວ ເຊິ່ງທ່ານໄດ້ມອບໃຫ້ພາກສ່ວນທີ່ກ່ຽວຂ້ອງ, ກໍາມາທິການກົດໝາຍ, ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ກະຊວງພະລັງງານ ແລະ ບໍ່ແຮ່ ສຸມໃສ່ຄົ້ນຄວ້າບັນດາຄຳເຫັນຂອງສະມາຊິກສະພາແຫ່ງຊາດ ທີ່ເຫັນວ່າມີເຫດມີຜົນ ເພື່ອປັບປຸງໃສ່ກົດໝາຍ ແນໃສ່ເຮັດໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້, ຕາມຕາຕະລາງສັງລວມຄຳເຫັນ ເຊິ່ງມີ 16 ມາດຕາ ສາມາດປັບປຸງໄດ້, ຍັງອີກ 11 ມາດຕາ ບໍ່ສາມາດປັບປຸງໄດ້. ສະນັ້ນ, ເພື່ອຮັບປະກັນໃຫ້ບັນດາຄໍາເຫັນຂອງສະມາຊິກສະພາແຫ່ງຊາດ ທີ່ໄດ້ປະກອບໃສ່ ໄດ້ຮັບການຄົ້ນຄວ້າພິຈາລະນາຢ່າງເລິກເຊິ່ງນັ້ນ ຈຶ່ງຂໍສະເໜີໃຫ້ບັນດາທ່ານ ໄດ້ພ້ອມກັນຄົ້ນຄວ້າຕໍ່ຄໍາເຫັນທີ່ສະມາຊິກສະພາແຫ່ງຊາດ ໄດ້ປະກອບໃສ່ກົດໝາຍສະບັບນີ້ ລວມທັງບັນດາມາດຕາທີ່ບໍ່ສາມາດປັບປຸງໄດ້ນັ້ນ ຄະນະຮັບຜິດຊອບໄດ້ໃຫ້ເຫດຜົນພຽງພໍແລ້ວບໍ່ ຫຼື ຕ້ອງໄດ້ປັບປຸງຄືແນວໃດ ເພື່ອເຮັດໃຫ້ເນື້ອໃນຂອງກົດໝາຍສະບັບນີ້ ມີຄວາມຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້.
(ພາບ ແລະ ຂ່າວ: ອານຸສອນ ພູມມີທອນ)