ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

        ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ເຊກອງ ຊຸດທີ II ໄດ້ອັດລົງດ້ວຍຜົນສໍາເລັດອັນຈົບງາມໃນຕອນບ່າຍວັນທີ 18 ສິງຫາ 2022 ພາຍຫຼັງທີ່ດຳເນີນມາເປັນເວລາ 3 ວັນເຕັມ ເລີ່ມແຕ່ວັນທີ 16 ຫາ ຕອນບ່າຍວັນທີ 18 ສິງຫາ 2022 ທີ່ສະໂມສອນສະພາປະຊາຊົນ ແຂວງ ເຊກອງ ໂດຍການເປັນປະທານຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ແລະໃຫ້ກຽດເຂົ້າຮ່ວມຂອງ ທ່ານ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ, ມີທ່ານການນໍາພັກ-ລັດຂັ້ນແຂວງ, ອະດີດການນໍາພັກ-ລັດແຂວງ, ອະດີດສະມາຊິກສະພາແຫ່ງຊາດ, ສະມາຊິກສະພາແຫ່ງຊາດເຂດເລືອກຕັ້ງທີ 16, ສະມາຊິກສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມ 100 ກວ່າທ່ານ.
            ໂອກາດນີ້, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ ໄດ້ກ່າວສູນທອນພົດປິດກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ຢ່າງເປັນທາງການວ່າ: ກອງປະຊຸມໄດ້ດຳເນີນມາແຕ່ວັນທີ 16 ຫາ 18 ສິງຫາ 2022 ເຊິ່ງລວມເປັນເວລາ 3 ວັນເຕັມ ໃນທ່າມກາງບັນຍາກາດ ທີ່ປະເທດເຮົາ ກໍຄືແຂວງເຊ ກອງພວກເຮົາພວມປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ໃນບັນຍາກາດທີ່ທົ່ວ ພັກ-ທົ່ວລັດ, ປະຊາຊົນຊາວແຂວງເຊກອງ ສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ຢ່າງເປັນຂະບວນ ຟົດຟື້ນ ທັງເປັນໄລຍະທີ່ ອົງການປົກຄອງແຂວງ ໄດ້ມີມາດຕະການແກ້ໄຂບັນຫາການເໜັງຕີງ ຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກອື່ນໆຢ່າງຕໍ່ເນື່ອງ ໃຫ້ມີຄວາມຜ່ອນຄາຍລົງ, ສ່ອງແສງໃຫ້ເຫັນເຖິງຄວາມຕັດສິນໃຈ ແລະ ຄວາມຮັບຜິດຊອບສູງ ຂອງອົງການຈັດຕັ້ງພັກ-ລັດ ໃນ ການຮ່ວມກັນແກ້ໄຂບັນຫາທີ່ຫຍຸ້ງຍາກຂອງແຂວງ.
         ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ເອົາໃຈໃສ່ຄົ້ນຄວ້າ ແລະ ພິຈາລະນາ, ຮັບຮອງເອົາ ເອກະສານສໍາຄັນດັ່ງນີ້: ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ ແລະ ທິດທາງແຜນການ 06 ເດືອນ ທ້າຍປີ 2022; ພິຈາລະນາ ແລະ ຮັບຮອງເອົາ ບົດລາຍງານ ຂອງອົງການປົກຄອງແຂວງ ກ່ຽວກັບການ ຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022; ພິຈາລະນາ ແລະ ຮັບຮອງເອົາ ຂໍ້ຕົກລົງ ວ່າດ້ວຍການປະເມີນລາຄາທີ່ດິນຂອບເຂດ ຢູ່ 4 ຕົວເມືອງ ຂອງແຂວງເຊກອງ; ພິຈາລະນາ ແລະ ຮັບຮອງເອົາ ບົດລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງ ຊຸດທີ II.
            ນອກຈາກນັ້ນ, ກອງປະຊຸມຍັງໄດ້ຮັບຟັງການຊີ້ແຈງ ຕໍ່ຄຳຊັກຖາມທີ່ສະມາຊິກສະພາປະຊາຊົນແຂວງ ກໍຄືປະຊາຊົນ ບັນດາເຜົ່າຊາວແຂວງເຊກອງ ທີ່ມີຄວາມສົນໃຈຫຼາຍ ຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ ສັງຄົມ, ແຜນງົບປະມານແຫ່ງລັດຂອງແຂວງ ແລະ 2 ວາລະແຫ່ງຊາດ ຈາກທ່ານເຈົ້າແຂວງ ແລະ ຈາກ 16 ພາກສ່ວນ ຄື: ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ, ອົງການກວດກາລັດ ແຂວງ, ພະແນກໂຍທາທິການ ແລະ ຂົນສົ່ງແຂວງ, ພະແນກອຸດສາຫະກຳ ແລະ ການຄ້າແຂວງ, ພະແນກກະສິ ກຳ ແລະ ປ່າໄມ້ແຂວງ, ພະແນກພະລັງງານບໍ່ແຮ່-ແຂວງ, ພະແນກສາທາລະນະສຸກແຂວງ, ພະແນກແຮງງານ ສະຫວັດດີການ ແລະ ສັງຄົມແຂວງ, ກອງບັນຊາການ ປກສ ແຂວງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ພະແນກສຶກສາທິການ ແລະ ກິລາແຂວງ, ທະນາຄານພັດທະນາລາວ, ອົງການໄອຍະ ການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທໍາແຂວງ.
          ຜົນສຳເລັດຂອງກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງນີ້ ແມ່ນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງ ຂອງບັນດາທ່ານສະມາຊິກສະພາປະຊາຊົນແຂວງຄວາມຕັດສິນໃຈຂອງອົງການປົກຄອງແຂວງ, ພະແນກການ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາແຂວງເຊກອງ ໃນສະພາບມີຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ບັນລຸຕາມຄາດໝາຍທີ່ວາງໄວ້, ນຳເອົາແຂວງເຊກອງກ້າວຂຶ້ນຢ່າງໜັກແໜ້ນ.
        ທ່ານ ປະທານສະພາປະຊາຊົນແຂວງ ຍັງໄດ້ຮຽກຮ້ອງແຕ່ລະພາກສ່ວນຈົ່ງສືບຕໍ່ເສີມຂະຫຍາຍຜົນສຳເລັດທີ່ຍາດມາໄດ້ໃນ ປີຜ່ານມາ, ສູ້ຊົນ ແລະ ປັບປຸງແກ້ໄຂບັນດາອຸປະສັກ, ສິ່ງກີດຂວາງ ໃນຂົງເຂດວຽກງານທີ່ຕົນຮັບຜິດຊອບ ຕິດພັນກັບການຍູ້ແຮງຂະບວນການແຂ່ງຂັນຮັກຊາດພັດທະນາ ເພື່ອສ້າງໃຫ້ມີການຫັນປ່ຽນທີ່ດີຂຶ້ນຢ່າງ ຈະແຈ້ງ, ສືບຕໍ່ຕັ້ງໜ້າຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ, ໂດຍສະເພາະຢ່າງຍິ່ງ 2 ວາລະແຫ່ງຊາດ ໃຫ້ເປັນຮູບປະທຳ ແລະ ມີໝາກຜົນຕົວຈິງຫຼາຍຂຶ້ນ ແລະ ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄັ້ງນີ້, ຮຽກຮ້ອງມາຍັງຄະນະປະຈຳສະພາປະຊາຊົນແຂວງ, ບັນດາຄະນະກຳມະການ, ສະມາຊິກສະພາປະຊາຊົນແຂວງ, ອົງການປົກຄອງແຂວງ, ອົງການປົກຄອງເມືອງ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນຄວາມຮັບຜິດຊອບຂອງຕົນ ໃຫ້ໄດ້ຮັບຜົນສຳເລັດເປັນຢ່າງດີ.
#ໂດຍ:ນາລີວັນ