ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍຂອງວັນພຸດ, ວັນທີ 10 ສິງຫາ 2022, ຢູ່ທີ່ສະໂມສອນແຂວງ(ບ້ານເຈງ) ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ອັດລົງ, ໂດຍພາຍໃຕ້ການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ອຸດົມໄຊ ຊຸດທີ II, ເປັນກຽດເຂົ້າຮ່ວມກອງປະຊຸມຄັ້ງນີ້ມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງອຸດົມໄຊ, ມີຮອງເຈົ້າແຂວງ, ບັນດາທ່ານຄະນະປະຈຳພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແຂວງອຸດົມໄຊ, ສະມາຊິກສະ ພາປະຊາຊົນແຂວງ ຊຸດທີ II, ຫົວໜ້າ-ຮອງຫົວໜ້າພະແນກ, ບັນດາທ່ານອາດີດການນໍາຂັ້ນແຂວງ, ອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ບັນດາທ່ານຕາງໜ້າອົງການຈັດຕັ້ງພັກ-ລັດ, ອົງການແນວລາວສ້າງຊາດແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, 2 ກຳລັງ ປກຊ-ປກສ, ບັນດາທະນາຄານທຸລະກິດ ແລະ ແຂກເຊີນ ເຂົ້າຮ່ວມຢ່າງພ້ອມພຽງ.
ປະທານກອງປະຊຸມໄດ້ມີຄໍາເຫັນກ່າວອັດວ່າ: ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ດໍາເນີນມາເປັນເວລາ 2 ວັນ, ດ້ວຍບັນຍາກາດແຫ່ງການເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາປະຊາຊົນແຂວງໃນການພິຈາລະນາ ແລະ ຮັບຮອງເອົາບັນດາເນື້ອໃນສໍາຄັນພື້ນຖານຂອງແຂວງ ທີ່ນໍາມາພິຈາລະນາໃນກອງປະຊຸມຄັ້ງນີ້ໂດຍສະເພາະແມ່ນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ບັນຫາພົ້ນເດັ່ນອື່ນໆອີກຈໍານວນໜຶ່ງ ທີ່ສັງຄົມໃຫ້ຄວາມສົນໃຈທີ່ຕິດພັນໂດຍກົງກັບການຈັດຕັ້ງປະຕິບັດ 02 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະແມ່ນ: ການຄຸ້ມຄອງຮ້ານແລກປ່ຽນເງິນຕາ, ການຄຸ້ມຄອງລາຄາສິນຄ້າ, ບັນຫາເງິນເຟີ້, ບັນຫານໍ້າມັນເຊື້ອໄຟແພງ ທີ່ເປັນປະເດັນເຄັງຮ້ອນ ແລະ ຝົດເດືອດໃນປັດຈຸບັນ ແລະ ການແກ້ໄຂບັນຫາຢາເສບຕິດຕາມວາລະແຫ່ງຊາດ ແຕ່ປີ 2021 ຫາ ປີ 2023 ໂດຍຕິດພັນກັບການແກ້ໄຂປະກົດການຫຍໍ້ທໍ້ທາງສັງຄົມພາຍຂອງແຂວງ ໃນ 06 ເດືອນຕົ້ນປີ 2022 ແລະ ກອງປະຊຸມຄັ້ງນີ້ໄດ້ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງສະພາປະຊາຊົນແຂວງ ແລະ ພິຈາລະນາ, ຮັບຮອງເອົາຂໍ້ຕົກລົງຂອງທ່ານເຈົ້າແຂວງຈໍານວນ 02 ສະບັບ, ໃນນີ້ສ້າງໃໝ່ 01 ສະບັບຄື: ຂໍ້ຕົກລົງ ວ່າດ້ວຍການຄຸ້ມຄອງການຈັດງານປະເພນີຕ່າງໆ. ປັບປຸງ 01 ສະບັບຄື: ຂໍ້ຕົກລົງ ວ່າດ້ວຍ ການປະເມີນລາຄາທີ່ດິນໃນທົ່ວແຂວງອຸດົມໄຊ(ປັບປຸງ), ພ້ອມກັນນັ້ນ, ກອງປະຊຸມຍັງໄດ້ຮັບຟັງການປະກອບຄຳເຫັນຂອງທ່ານເຈົ້າແຂວງ ຊຶ່ງໄດ້ສັງລວມຄືນບັນດາຄຳຊັກຖາມຂອງສະມາຊິກສະພາປະຊາຊົນແຂວງ, ການຕອບຄຳຊັກຖາມຂອງບັນດາອົງການທີ່ກ່ຽວຂ້ອງເພື່ອເປັນທິດໃນການຈັດຕັ້ງປະຕິບັດວຽກງານຂອງອົງການປົກຄອງແຂວງໃນຕໍ່ໜ້າ ແລະ ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄັ້ງນີ້.
 
ໃນຕອນທ້າຍທ່ານຍັງໄດ້ຮຽກຮ້ອງມາຍັງຄະນະປະຈໍາສະພາປະຊາຊົນແຂວງ, ບັນດາຄະນະກໍາມະການການ, ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງ, ອົງການປົກຄອງແຂວງ ແລະ ທຸກພາກ ສ່ວນທີ່ກ່ຽວຂ້ອງ ຈົ່ງນຳເອົາເນື້ອໃນມະຕິກອງປະຊຸມຄັ້ງນີ້ໄປຜັນຂະຫຍາຍ ເຂົ້າໃນຂົງເຂດວຽກງານທີ່ຕົນດ້ວຍຄວາມຮັບຜິດຊອບສູງເພື່ອໃຫ້ປະສົບກັບຜົນສໍາເລັດຕາມຄາດໝາຍທີ່ໄດ້ວາງໄວ້.
ໂອກາດດັ່ງກ່າວ, ກອງປະຊຸມຍັງໄດ້ມອບໃບຍ້ອງຍໍໃຫ້ພາກສ່ວນທີ່ອຸປະຖໍາ ແລະ ຊ່ວຍເຫຼືອການເຄື່ອນໄຫວ ວຽກງານຂອງສະພາປະຊາຊົນແຂວງ ແລະ ກອງປະຊຸມໃນຄັ້ງນີ້ອີກດ້ວຍ.
ພາບ/ຂ່າວ: ແສງພອນ ອິນນະລົງ.