(ສພຊ) ກອງປະຊຸມສໍາມະນາແລກປ່ຽນບົດຮຽນ ຄັ້ງທີ XI ລະຫວ່າງເລຂາທິການສະພາແຫ່ງຊາດລາວ ແລະ ຫົວໜ້າຫ້ອງວ່າການສະພາແຫ່ງຊາດຫວຽດນາມ ໄດ້ມີຂຶ້ນໃນວັນທີ 20 ສິງຫາ 2022 ໂດຍການເປັນປະທານຮ່ວມຂອງສະຫາຍ ເຈີ່ນ ແທັງ ເມີ້ນ ກໍາມະການກົມການເມືອງສູນກາງພັກ, ຮອງປະທານສະພາແຫ່ງຊາດ ສສ.ຫວຽດນາມ, ສະຫາຍ ນາງ ປິ່ງຄຳ ລາຊະສິມມາ ກຳມະການສູນກາງພັກ, ເລຂາທິການສະພາແຫ່ງຊາດລາວ, ສະຫາຍ ບຸ່ຍ ວັນ ເກື່ອງ ກໍາມະການສູນກາງພັກ, ຫົວໜ້າຫ້ອງວ່າການສະພາແຫ່ງຊາດຫວຽດນາມ ແລະ ສະຫາຍ ຫວູ ຫາຍ ຮ່າ ກໍາມະການສູນກາງພັກ, ປະທານກຳມາທິການການຕ່າງປະເທດຫວຽດນາມ ແລະ ສະຫາຍ ຫວູ ດ້າຍ ຖັງ ກໍາມະການສູນກາງພັກ, ເລຂາພັກແຂວງ, ຫົວໜ້າຄະນະສະມາຊິກສະພາແຫ່ງຊາດ ປະຈຳແຂວງກວາງບິງ ເຊິ່ງມີຮອງເລຂາທິການສະພາແຫ່ງຊາດລາວ, ຮອງຫົວໜ້າຫ້ອງວ່າການສະພາແຫ່ງຊາດຫວຽດນາມ ພ້ອມດ້ວຍຄະນະຂອງຝ່າຍລາວ ແລະ ຝ່າຍຫວຽດນາມ ເຂົ້າຮ່ວມ.
ກອງປະຊຸມຄັ້ງນີ້ ໄດ້ສຸມໃສ່ແລກປ່ຽນບົດຮຽນ ກ່ຽວກັບການຍົກສູງການເປັນເສນາທິການຮັບໃຊ້ໃຫ້ແກ່ກອງປະຊຸມສະພາແຫ່ງຊາດ ໂດຍການຫັນເປັນທັນສະໄໝ, ການຍົກສູງວຽກງານຂໍ້ມູນ-ຂ່າວສານ ແລະ ສື່ມວນຊົນ, ການເພີ່ມທະວີການປະສານສົມທົບ ລະຫວ່າງຫ້ອງວ່າການສະພາແຫ່ງຊາດ ຫລື ຄະນະເລຂາທິການສະພາແຫ່ງຊາດ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ເຊິ່ງເປັນຫົວຂໍ້ທີ່ເຕັມໄປດ້ວຍເນື້ອໃນສຳຄັນ ທີ່ມີຜົນປະໂຫຍດຫລາຍ, ແທດເໝາະຕົວຈິງ ແລະ ສາມາດນໍາໄປຈັດຕັ້ງປະຕິບັດຕົວຈິງ​ໄດ້.
ໃນວັນດຽວກັນ, ສະມາຊິກອົງການຈັດຕັ້ງມະຫາຊົນຂອງສະພາແຫ່ງຊາດ ລາວ ແລະ ຫວຽດນາມ ຍັງໄດ້ແຂ່ງຂັນກິລາມິດຕະພາບຮ່ວມກັນຄື: ບານເຕະຊາຍ ເຊິ່ງຜົນການແຂ່ງຂັນແມ່ນຝ່າຍຫວຽດນາມເປັນຝ່າຍຊະນະ ແລະ ຫລິ້ນກິລາມວນຊົນ ດຶງເຊືອກ ແລະ ແລ່ນໄຖ່ ໂດຍແມ່ນຝ່າຍລາວເປັນຝ່າຍຊະນະ ທັງສອງປະເພດ.
(ພາບ ແລະ ຂ່າວ: ນາງ ປາກາລັກ ພົມມີໄຊ)