(ສພຊ) – ກອງປະຊຸມສຳມະນາວິທະຍາສາດກ່ຽວກັບບົດຮຽນການຄົ້ນຄວ້ານິຕິບັນຍັດ ລະຫວ່າງສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ.ຫວຽດນາມ ໄດ້ຈັດຂຶ້ນໃນຕອນເຊົ້າຂອງວັນທີ 05 ກໍລະກົດ 2024 ທີ່ສະພາແຫ່ງຊາດ ໂດຍການເປັນປະທານຮ່ວມຂອງສະຫາຍ ສຈ. ປອ. ຈະເລີນ ເຍຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ ແລະ ສະຫາຍ ຫງວຽນ ຄັກ ດິ້ງ (Nguyễn Khắc Định) ກຳມະການສູນກາງພັກກອມມູນິດຫວຽດນາມ, ຮອງປະທານສະພາແຫ່ງຊາດ; ເຂົ້າຮ່ວມມີບັນດາປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າສະຖາບັນຄົ້ນຄວ້ານິຕິກຳ, ຄະນະກົມ, ຄະນະພະແນກ ແລະ ພາກສ່ວນທີ່ກ່ຽວຂ້ອງຂອງສະພາແຫ່ງຊາດ ລາວ-ຫວຽດນາມ.
ສະຫາຍ ສຈ. ປອ. ຈະເລີນ ເຍຍປາວເຮີ ຕີລາຄາສູງຕໍ່ບັນດາບົດຮຽນທີ່ສະຖາບັນຄົ້ນຄວ້ານິຕິບັນຍັດຂອງສະ ພາແຫ່ງຊາດຫວຽດນາມ ໄດ້ນໍາມາສະເໜີໃນຄັ້ງນີ້ ແລະ ມີຄວາມເຊື່ອໝັ້ນວ່າຈະເປັນບົດຮຽນທີ່ມີຄວາມໝາຍສໍາຄັນທີ່ສຸດໃຫ້ແກ່ສະພາແຫ່ງຊາດລາວ ໃນການປັບປຸງຍົກລະດັບການຄົ້ນຄວ້າວິທະຍາສາດດ້ານນິຕິບັນຍັດສູ່ບາດກ້າວໃໝ່; ຈຶ່ງສະເໜີມາຍັງບັນດາຜູ້ເຂົ້າຮ່ວມ ຈົ່ງພ້ອມກັນຕັ້ງໃຈຮັບຟັງ ແລະ ແລກປ່ຽນຄໍາເຫັນນໍາກັນຢ່າງກົງໄປກົງມາ ເພື່ອຍາດແຍ່ງເອົາບົດຮຽນ ແລະ ປະສົບການທີ່ລ້ຳຄ່າຈາກສະພາແຫ່ງຊາດຫວຽດນາມ.
​ ກອງປະຊຸມໄດ້ຮັບຟັງບົດຮຽນຄົ້ນຄວ້າດ້ານນິຕິບັນຍັດຂອງ ສສ.ຫວຽດນາມ ແລະ ຂອງ ສປປລາວ ຈາກສະ ຫາຍ ຫງວຽນ ວັນ ຫ້ຽນ (Nguyễn Văn Hiển) ຫົວໜ້າສະຖາບັນຄົ້ນຄວ້ານິຕິບັນຍັດສະພາແຫ່ງຊາດຫວຽດນາມ ແລະ ສະຫາຍ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດລາວ ຕາມລຳດັບ.
(ຂ່າວ: ກົງທະນູຄຳ ພິພັດເສລີ, ພາບ: ສອນສັກ ວັນວິໄຊ)