ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອລະດົມຄຳຄິດຄຳເຫັນຕໍ່ການດຳເນີນທຸລະກິດຂອງລັດວິສາຫະກິດໄຟຟ້າລາວ, ທິດທາງການປັບປຸງໂຄງສ້າງລາຄາໄຟຟ້າ ຂອງລັດວິສາຫະກິດໄຟຟ້າລາວ ແລະ ການພັດທະນາລະບົບສາຍສົ່ງໄຟຟ້າແຫ່ງຊາດ; ເພື່ອຍົກລະດັບຄວາມຮູ້ ແລະ ຄວາມເຂົ້າໃຈ ກ່ຽວກັບການພັດທະນາທ່າບົກ ໃນຂອບເຂດທົ່ວປະເທດ ຕາມທີ່ຄະນະກຳມາທິການອົງການສະຫະປະຊາຊາດ ດ້ານເສດຖະກິດ ແລະ ສັງຄົມ ປະຈຳພາກພື້ນອາຊີ-ປາຊີຟິກໃຫ້ສັດຕະຍາບັນ ເປັນຕົ້ນການກຳນົດທີ່ຕັ້ງ, ສິດ ແລະ ພາລະບົດບາດຂອງແຕ່ລະທ່າບົກ ແລະ ບັນຫາອື່ນທີ່ກ່ຽວຂ້ອງ; ຮັບຟັງການລາຍງານກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານຢູ່ທ່າບົກ 3 ແຫ່ງ ທີ່ໄດ້ດຳເນີນທຸລະກິດ ແລະ ເປີດບໍລິການແລ້ວ; ເພື່ອລະດົມແນວຄຳຄິດຄຳເຫັນຕໍ່ທິດທາງການພັດທະນາທ່າບົກ ໃຫ້ມີຄວາມແທດເໝາະກັບສະພາບຈຸດພິເສດທີ່ຕັ້ງຂອງແຕ່ລະທ່າບົກ ທັງເພື່ອເປັນຂໍ້ມູນພື້ນຖານລາຍງານໃຫ້ແກ່ຄະນະປະຈຳສະພາແຫ່ງຊາດ ພິຈາລະນາ ແລະ ມີທິດຊີ້ນຳ. ລະຫວ່າງວັນທີ 12-13 ກັນຍາ 2022 ທີ່ນະຄອນປາກເຊ ແຂວງຈໍາປາສັກ, ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ຈັດກອງປະຊຸມສຳມະນາກ່ຽວກັບການດຳເນີນທຸລະກິດຂອງລັດວິສາຫະກິດໄຟຟ້າລາວ, ທິດທາງການປັບປຸງໂຄງສ້າງລາຄາໄຟຟ້າ, ການພັດທະນາລະບົບສາຍສົ່ງໄຟຟ້າແຫ່ງຊາດ ແລະ ການພັດທະນາທ່າບົກ ໂດຍການເປັນປະທານກອງປະຊຸມຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ; ມີທ່ານ ຮສ. ປອ. ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ບັນດາຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່; ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ; ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ຄະນະກົມ, ຄະນະພະແນກ ແລະ ພະນັກງານວິຊາການທີ່ກ່ຽວຂ້ອງ ພ້ອມດ້ວຍແຂກຖືກເຊີນເຂົ້າຮ່ວມ.
ກອງປະຊຸມ ໄດ້ຮັບຟັງການລາຍງານການພັດທະນາທ່າບົກ ຂອງ ສປປລາວ ແລະ ການຈັດຕັ້ງປະຕິບັດວຽກງານທ່າບົກ 3 ແຫ່ງ ທີ່ເປີດບໍລິການແລ້ວ ຈາກທ່ານ ປອ. ບຸນຕາ ອ່ອນນາວົງ ຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ; ຜົນການຕິດຕາມກວດກາການຈັດຕັ້ງປະຕິບັດວຽກງານທ່າບົກ ຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໂດຍທ່ານ ປອ. ເກດແກ້ວ ສີຫາລາດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ການຄຸ້ມຄອງດ່ານກວດກາຄົນເຂົ້າ-ອອກເມືອງ ທີ່ຕິດພັນກັບວຽກງານທ່າບົກ ໂດຍທ່ານ ພັອ. ສາຍສະໝິງ ສິວີໄລ ຫົວໜ້າກົມຕຳຫຼວດກວດກາຄົນເຂົ້າ-ອອກເມືອງ, ທິດທາງການປັບປຸງໂຄງສ້າງລາຄາໄຟຟ້າ ແລະ ການພັດທະນາລະບົບສາຍສົ່ງໄຟຟ້າແຫ່ງຊາດ ໂດຍທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ການດຳເນີນທຸລະກິດຂອງລັດວິສາຫະກິດໄຟຟ້າລາວ ໂດຍທ່ານ ຈັນທະບູນ ສຸກອາລຸນ ຜູ້ອຳນວຍການລັດວິສາຫະກິດໄຟຟ້າລາວ, ການປະຕິຮູບລັດວິສາຫະກິດໄຟຟ້າລາວ ຈາກທ່ານ ສຸລິວັດ ສຸວັນນະຈູມຄຳ ຫົວຫນ້າກົມ ຄຸ້ມຄອງໜີ້ສິນສາທາລະນະ ກະຊວງການເງິນ ແລະ ໄດ້ຮັບຟັງຄຳເຫັນຂອງກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ກ່ຽວກັບວຽກງານໄຟຟ້າ ໂດຍທ່ານ ຄຳມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ.
ໂອກາດດັ່ງກ່າວ, ທ່ານ ສົມມາດ ພົລເສນາ ໄດ້ມີຄໍາເຫັນຕໍ່ກອງປະຊຸມວ່າ: ສະເໜີໃຫ້ລັດຖະບານ ກໍຄືຂະແໜງການທີ່ກ່ຽວຂ້ອງ ຕ້ອງໄດ້ຮີບຮ້ອນສ້າງ, ປັບປຸງນິຕິກໍາທີ່ກ່ຽວຂ້ອງໃຫ້ຈະແຈ້ງ ແລະ ມີກົນໄກການປະສານງານທີ່ກົມກຽວ ລະຫວ່າງຂະແໜງການກ່ຽວຂ້ອງໃຫ້ເປັນລະບົບ, ປະເມີນກວດກາຄືນການພັດທະນາ ແລະ ກຳນົດຈຸດທີ່ຕັ້ງຂອງທ່າບົກ ໂດຍໃຫ້ສອດຄ່ອງກັບສະພາບພື້ນທີ່ຕົວຈິງຂອງແຕ່ລະຈຸດທ່າບົກທີ່ຈະພັດທະນາໃນຕໍ່ໜ້າ ພ້ອມທັງມີນະໂຍບາຍສົ່ງເສີມເພື່ອເປັນການດຶງດູດການລົງທຶນ ແລະ ຊຸກຍູ້ໃຫ້ຜູ້ປະກອບການທຸລະກິດຂົນສົ່ງເຂົ້ານໍາໃຊ້ບໍລິການທ່າບົກໃຫ້ຫຼາຍຂຶ້ນ ເພື່ອເປັນການຈັດເກັບລາຍຮັບເຂົ້າປະຕູດຽວ ແລະ ຕໍ່ກັບບົດລາຍງານຂອງກະຊວງພະລັງງານ ແລະ ບໍ່ແຮ່ ແລະ ລັດວິສາຫະກິດໄຟຟ້າລາວ ກ່ຽວກັບທິດທາງການປັບປຸງໂຄງສ້າງລາຄາໄຟຟ້າ, ການພັດທະນາລະບົບສາຍສົ່ງໄຟຟ້າແຫ່ງຊາດ, ການດໍາເນີນທຸລະກິດຂອງລັດວິສາຫະກິດໄຟຟ້າລາວ ແລະ ການປະຕິຮູບລັດວິສາຫະກິດໄຟຟ້າລາວ ສະເໜີໃຫ້ຄົ້ນຄວ້າ, ວິເຄາະ-ວິໄຈ ຢ່າງລົງເລິກ; ປັບປຸງໂຄງສ້າງລາຄາໄຟຟ້າ ໃນກຸ່ມທີ່ລັດຖະບານມີນະໂຍບາຍສົ່ງເສີມ ເປັນຕົ້ນຊົນລະປະທານ, ປູກຝັງ, ລ້ຽງສັດ-ປະມົງ, ໂຮງງານປຸງແຕ່ງກະສິກໍາ ທີ່ຕິດພັນກັບການຄໍ້າປະກັນສະບຽງອາຫານ ເຊິ່ງຕິດພັນກັບການດຳລົງຊີວິດ ແລະ ການແຂ່ງຂັນ ຂອງທຸລະກິດຂະໜາດນ້ອຍ ແລະ ຂະໜາດກາງ ຂອງປະເທດເຮົາ; ໃຫ້ກະຊວງພະລັງງານ ແລະ ບໍ່ແຮ່ ສືບຕໍ່ພັດທະນາລະບົບສາຍສົ່ງໄຟຟ້າແຫ່ງຊາດ, ເອົາໃຈໃສ່ປະຕິບັດແຜນການຊົດເຊີຍຜົນກະທົບດ້ານສິ່ງແວດລ້ອມ, ສັງຄົມ-ທໍາມະຊາດ ໃນການສ້າງແລວສາຍສົ່ງໄຟຟ້າ; ພ້ອມນັ້ນ, ທ່ານຍັງໄດ້ສະເໜີໃຫ້ກະຊວງກ່ຽວຂ້ອງ ນໍາໄປພິຈາລະນາປັບປຸງແກ້ໄຂໃຫ້ແທດເໝາະກັບສະພາບເສດຖະກິດ-ສັງຄົມໃນປັດຈຸບັນ.
ຈາກນັ້ນ, ທ່ານ ສົມມາດ ພົລເສນາ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ບໍລິສັດ ທ່າບົກ-ວັງເຕົ່າ ຕື່ມອີກ.
(ພາບ ແລະ ຂ່າວ: ອານຸສອນ ພູມມີທອນ)