ໃນມື້ທີສອງຂອງກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX, ທ່ານ ປອ. ສົມໄຊ ສີຫາຈັກ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15 ແຂວງຈໍາປາສັກ ໄດ້ປະກອບຄໍາເຫັນຕໍ່ວຽກງານຂອງລັດຖະ ບານ ເຊິ່ງມີບາງຂໍ້ສະເໜີດັ່ງນີ້:

1. ສະໜອງທຶນໃຫ້ແກ່ຫົວໜ່ວຍການຜະລິດ ໂດຍສະເພາະຫົວໜ່ວຍການຜະລິດຍ່ອຍທີ່ກະແຈກກະຈາຍ ບໍ່ທັນສາມາດເຕົ້າໂຮມເປັນກຸ່ມໄດ້ ແຕ່ມີຄວາມຈຳເປັນຕ້ອງການທຶນ, ກົງກັນຂ້າມ ຫົວໜ່ວຍການຜະລິດຈຳນວນນີ້ ຍັງບໍ່ທັນເຂົ້າເຖິງແຫຼ່ງທຶນໄດ້; ດັ່ງນັ້ນ, ຈຶ່ງຄວນສ້າງເງື່ອນໄຂໃຫ້ຫົວໜ່ວຍການຜະລິດດັ່ງກ່າວນີ້ ເຂົ້າເຖິງແຫຼ່ງທຶນ.

2. ມີນະໂຍບາຍຫຼຸດຜ່ອນການເກັບພາສີອາກອນການນຳເຂົ້າປະເພດປຸ໋ຍ, ຝຸ່ນ, ຫົວອາຫານສັດ ແລະ ອື່ນໆ ທີ່ມີຄວາມຈຳເປັນຕໍ່ການປູກການລ້ຽງ; ພ້ອມດຽວກັນນັ້ນ, ກໍຊຸກຍູ້ສົ່ງເສີມໃຫ້ພາກສ່ວນທຸລະກິດ ຜະລິດຝຸ່ນ, ຫົວອາ ຫານ ເພື່ອຊົມໃຊ້ພາຍໃນ, ຫຼຸດຜ່ອນການນຳເຂົ້າ.

3. ການສົ່ງເສີມຜະລິດສິນຄ້າເພື່ອສົ່ງອອກ ຕ້ອງນຳໃຊ້ເຕັກນິກວິຊາການ, ເຮົາຜະລິດໄດ້ ແຕ່ຍັງບໍ່ສາມາດຮັບ ປະກັນທາງດ້ານຄຸນນະພາບ; ດັ່ງນັ້ນ, ສິນຄ້າທີ່ພວກເຮົາສົ່ງອອກຈຶ່ງບໍ່ສາມາດແຂ່ງຂັນກັບຕະຫຼາດຕ່າງປະເທດໄດ້.