(ສພຊ) ເພື່ອເປັນການສ້າງຄວາມເຂົ້າໃຈໃຫ້ເລິກເຊິ່ງ ກ່ຽວກັບການດໍາເນີນທຸລະກິດຂອງລັດວິສາຫະກິດໄຟຟ້າລາວ. ໃນວັນທີ 10 ມີນາ 2023 ທ່ານ ເກດແກ້ວ ສີຫາລາດ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ເຂົ້້າຮ່ວມກອງປະຊຸມສ້າງຄວາມເຂົ້າໃຈກ່ຽວກັບການດໍາເນີນທຸລະກິດລັດວິສາຫະກິດໄຟຟ້າລາວ ທີ່ຫ້ອງປະຊຸມໃຫຍ່ຂອງລັດວິສາຫະກິດໄຟຟ້າລາວ ໂດຍການເປັນປະທານຮ່ວມຂອງທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ ແລະ ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ມີບັນດາພາກສ່ວນທີ່ກ່ຽວຂ້ອງ ທັງພາກລັດ ແລະ ເອກະຊົນເຂົ້າຮ່ວມ.

ກອງປະຊຸມຄັ້ງນີ້ ໄດ້ຮັບຟັງການນໍາສະເໜີກ່ຽວກັບການດໍາເນີນທຸລະກິດຂອງລັດວິສາຫະກິດໄຟຟ້າລາວ ຈາກນັ້ນ, ຜູ້ແທນກອງປະຊຸມ ໄດ້ມີຄຳຖາມເຈາະຈີ້ມ ໃສ່ຫົວຂໍ້ດັ່ງກ່າວ ແລະ ມີການປະກອບຄໍາຄິດຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ.
(ພາບ ແລະ ຂ່າວ: ສອນສັກ ວັນວິໄຊ)