ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ໃນວັນທີ 19 ກັນຍາ 2022 ນີ້,​ທີ່ສະໂມສອນເມືອງພູວົງ ແຂວງ​ອັດຕະປື,​ ສະພາປະຊາຊົນແຂວງ​(ສພຂ)​ ອັດຕະປື​ ໄດ້ເປີດກອງປະຊຸມຝຶກອົບຮົມ ສ້າງຄວາມເຂັ້ມແຂງກ່ຽວກັບການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ​ ແລະ​ ແຜນງົບປະມານແຫ່ງລັດ,​ການສ້າງນິຕິກຳ ແລະການຄົ້ນຄວ້າຄໍາຮ້ອງຂໍຄວາມເປັນທໍາ.​ ໂດຍການເປັນປະທານຂອງ ທ່ານ ນາງ​ ພອນມະນີ​ ຂຽນໄຊຍະວົງ, ຄະນະປະຈໍາ​ ສພຂ,​ຮອງປະທານ​ ສພຂ.​ ມີ​: ທ່ານ​ ອໍາໄພ ຈິດມານົນ ຮອງປະທານ​ກຳມາທິການ​ກົດໝາຍ​ ສະພາແຫ່ງຊາດ, ບັນດາທ່ານ​ຄະນະປະຈໍາ​ ສພຂ,​ ທ່ານເຈົ້າ​ເມືອງ,​ ຜູ້ຕາງໜ້າແຜນງານເຊກາ,​ ນັກວິທະຍາກອນ ທີ່ມາຈາກສູນກາງ ແລະ​ ທ້ອງຖີ່ນ,​ ນັກສໍາມະນາກອນ ທີ່ເປັນສະມາຊິກສະພາປະຊາຊົນແຂວງ ແລະ​ ພະນັກງານ-ລັດຖະກອນ​ ທີ່ເປັນເສນາທິການໃຫ້ແກ່ ສພຂ​ ພ້ອມດ້ວຍແຂກທີ່ຖືກເຊີນເຂົ້າຮ່ວມ,​ ເຊິ່ງກອງປະຊຸມຝືກອົບຮົມຄັ້ງນີ້ໄດ້ຮັບການສະໜັບສະໜູນຈາກ:ແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ​ ການສ້າງລັດທີ່ປົກຄອງດ້ວຍກົດໝາຍ(ແຜນງານເຊກາ​ CEGGA).

ທ່ານ​ ນາງ​ ພອນມະນີ​ ຂຽນໄຊຍະວົງ​ ໄດ້ກ່າວເປີດຝືກອົບຮົມຄັ້ງນີ້ວ່າ: ກອງປະຊຸມຝືກອົບຮົມຈະດຳເນີນເປັນເວລາ 2​ ວັນ,​ຈະໄດ້ພ້ອມກັນໄດ້ຮຽນຮູ້ກ່ຽວກັບຫົວຂໍ້ບົດຮຽນສຳຄັນ ດັ່ງນີ້:​ ​ການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂັ້ນແຂວງ;​ຂັ້ນຕອນ. ກົນໄກ, ວິທີການຕ່າງໆ ໃນການສ້າງນິຕິກໍາໃຕ້ກົດໝາຍ ແລະ ການຄົ້ນຄວ້າຮ່າງນິຕິກໍາໃຕ້ກົດໝາຍ;​ ການກະກຽມ ແລະ ການດໍາເນີນກອງປະຊຸມສະໄໝສາມັນ ຂອງສະພາປະຊາຊົນແຂວງ;​ການຕົກລົງບັນຫາພື້ນຖານຂອງທ້ອງຖິ່ນ ແລະ ການສ້າງຄໍາຖາມເຈາະຈີ້ມ;​ ການຕິດຕາມກວດກາ, ການຄົ້ນຄວ້າຄໍາຮ້ອງທຸກ ແລະ ການແກ້ໄຂຄຳຮ້ອງທຸກ ຂອງປະຊາຊົນ.​ ເພື່ອຍົກລະດົບຄວາມຮັບຮູ້ ຂອງສະມາຊິກສະພາປະຊາຊົນແຂວງ ກໍ່ຄືພະນັກງານ-ລັດຖະກອນ ທີ່ເປັນເສນາທິການ ໃຫ້ແກ່ສະພາປະຊາຊົນແຂວງອັດຕະປື, ໃຫ້ມີຄວາມຮັບຮູ້ເຂົ້າໃຈ ແລະ ເປັນເອກະພາບການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນຂັ້ນແຂວງ ເວົ້າລວມ, ເວົ້າສະເພາະ ກໍ່ເປັນການສ້າງຄວາມຮັບຮູ້ເຂົ້າໃຈ ກ່ຽວກັບຂັ້ນຕອນ ແລະ ວິທີການໃນການຕິດຕາມກວດກາ ແຜນງົບປະມານແຫ່ງລັດຂັ້ນແຂວງ ແລະ ແຜນພັດທະນາເສດຖະກິດ-ສັງຄົມ; ຂັ້ນຕອນ, ວິທີການສ້າງນິຕິກໍາໃຕ້ກົດໝາຍ, ການຄົ້ນຄວ້າຄໍາຮ້ອງ, ຄໍາສະເໜີ ແລະ ອື່ນໆ ໃຫ້ມີຄວາມຖືກຕ້ອງສອດຄ່ອງ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ. ເພື່ອຮັບປະກັນໄດ້ໃນການນໍາເຂົ້າໄປຄົ້ນຄວ້າພິຈາລະ ນາໃນກອງປະຊຸມສະໄໝສາມັນ ຂອງສະພາປະຊາຊົນແຂວງ ໃນແຕ່ລະຄັ້ງ ໃຫ້ມີຄວາມຖືກຕ້ອງ ແລະ ຊັດເຈນ. ນອກນັ້ນ, ກໍ່ເພື່ອແລກປຽນສົນທະນາບາງບົດຮຽນ, ບາງປະສົບການ ຮ່ວມກັບບັນດາທ່ານນັກວິທະຍາກອນທີ່ມາຈາກສູນກາງ ແລະ ທ້ອງຖີ່ນ, ເພື່ອແນ່ໃສ່ຍົກສູງຄວາມຮັບຮູ້ເຂົ້າໃຈ ແລະ ຄວາມສາ ມາດຕ່າງໆ ໃນການປະຕິບັດໜ້າທີ່ການເມືອງຂອງຕົນ ໄປຕາມແຕ່ລະເງື່ອນໄຂ ຢ່າງມີປະສິດທິພາບ ແລະ ປະສິດທິຜົນສູງ.

ພ້ອມກັນນີ້,​ທ່ານ​ ນາງ​ ພອນມະນີ​ ຂຽນໄຊຍະວົງ​ ຍັງໄດ້ຮຽກຮ້ອງຈົ່ງພ້ອມກັນທຸ້ມ​ເທ​ຄວາມ​ພະຍາຍາມ ແລະ ເອົາ​ໃຈ​ໃສ່ໃຊ້​ເວລາ​ທີ່​ຈຳກັດ ແລະ ມີຄຸນຄ່າ​ນີ້ໃຫ້​ເປັນ​ປະ​ໂຫຍ​ດສຸງສຸດ. ​ເພື່ອຍາດແຍ່ງເກັບ​ກຳ, ຄົ້ນຄວ້າຮຽນ​ຮູ້, ແລກປ່ຽນສົນທະນາບາງ​ບົດຮຽນຮ່ວມ​ກັນ ແລະ ປະກອບຄວາມ​ຄິດ​ຄໍາ​ເຫັນຊັກ​ຖາມ​​ໃນ​ບັນຫາ​ຕ່າງໆ ​ທີ່​ນັກວິທະຍາກ​ອນ​ ໄດ້ກະກຽມ​ນຳ​ມາສະ​ເໜີ ​​ໃຫ້​ມີ​ຄວາມ​ເຂົ້າ​ໃຈຢ່າງ​ເລິກ​​ເຊິ​ງ ​ແລະ ສາມາດ​​ເຮັດ​ໃຫ້​ກອງ​ປະຊຸມຝຶກອົບຮົມໃນຄັ້ງນີ້ ໄດ້​ຮັບ​ຜົນສຳ​ເລັດ​ຕາມ​ຈຸດປະສົງ​ ແລະ ລະດັບ​ຄາດໝາຍທີ່ວາງໄວ້, ​ສາມາດ​ນຳ​ເອົາ​ຄວາມ​ຮູ້ ​ແລະ ບົດຮຽນທີ່ໄດ້ຮຽນຮູ້ໃນຄັ້ງ​ນີ້ ​ໄປ​ປະຕິບັດໝູນ​ໃຊ້ເຂົ້າໃນ​ວຽກງານຕົວຈິງ ໃຫ້​ເກີດດອກ​ອອກ​ຜົນ​ຫຼາຍຂື້ນ.​
(ວິນັດ)