ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສະພາປະຊາຊົນ ນະຄອນຫຼວງວຽງຈັນ ໄດ້ດຳເນີນກອງປະຊຸມຝຶກອົບຮົມວຽກງານສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ຊຸດທີ II ຂຶ້ນ ໃນລະຫວ່າງວັນທີ 27-29 ເມສາ 2022 ໂດຍການເປັນປະທານຂອງທ່ານ ອານຸພາບ ຕຸນາລົມ ປະທານຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1, ປະທານສະພາປະຊາຊົນ ນະຄອນຫຼວງວຽງຈັນ ຊຸດທີ II ມີບັນດາທ່ານຮອງປະທານ, ກຳມະການຄະນະປະຈຳ ສະພາປະຊາຊົນ ນະຄອນຫຼວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງ ເຂົ້າຮ່ວມຢ່າງພ້ອມພຽງ.

       

ທ່ານ ອານຸພາບ ຕຸນາລົມ ໄດ້ກ່າວວ່າ: ຈຸດປະສົງຂອງການດຳເນີນກອງປະຊຸມຄັ້ງນີ້ ເພື່ອເປັນການຍົກລະດັບທັກສະຄວາມຮູ້, ຄວາມສາມາດ ຂອງບັນດາທ່ານຜູ້ແທນປະຊາຊົນ ໃນຂົງເຂດວຽກງານນິຕິບັນຍັດ ໃຫ້​ມີ​ປະສິດທິພາບດີ​ຍິ່ງຂຶ້ນ ໂດຍສະເພາະການຈັດຕັ້ງປະຕິບັດພາລະບົດບາດຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງ ເປັນຕົ້ນ: ການຄົ້ນຄວ້າຮ່າງນິຕິກໍາ, ການຕົກລົງບັນຫາສໍາຄັນ ແລະ ການຕິດຕາມກວດກາໃນໄລຍະຜ່ານມາ ກໍມີ​ຫຼາຍ​ດ້ານ​ທີ່​ມີ​ການ​ຫັນປ່ຽນຢ່າງ​ຕັ້ງໜ້າ ແລະ ​ໄດ້​ຮັບ​ປະສິດທິ​ຜົນ​ເປັນ​ກ້າວໆ.​ ແຕ່​ຄຽງຄູ່​ກັບ​ຜົນ​ສໍາ​ເລັດ​ທີ່​ກ່າວ​ມາ​ນັ້ນ, ກໍຍັງມີບາງດ້ານທີ່ຕ້ອງເອົາໃຈໃສ່ປັບປຸງໃຫ້ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ເນື່ອງຈາກຢູ່ໃນໄລຍະຕົ້ນສະໄໝຂອງສະພາ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງ ຈໍານວນໜຶ່ງ ໄດ້ຮັບການເລືອກຕັ້ງໃໝ່, ປະສົບການ​ໃນການຈັດຕັ້ງປະຕິບັດວຽກງານຂອງສະພາແຫ່ງຊາດ ປະຈຳເຂດເລືອກຕັ້ງທີ 1 ແລະ ສະພາປະຊາຊົນ ນະຄອນຫຼວງ ຍັງມີໜ້ອຍ ເຮັດໃຫ້ການເຄື່ອນໄຫວວຽກງານຍັງບໍ່ເຕັມເມັດເຕັມໜ່ວຍ. ດັ່ງນັ້ນ, ເພື່ອ​ຍົກ​ສູງ​ປະສິດທິພາບ​ໃນການປະຕິບັດພາລະບົດບາດການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ​ໃຫ້​ນັບ​ມື້​ມີ​ຄຸນ​ະພາ​ບສູງ​ຂຶ້ນ ພ້ອມທັງ​ຍົກສູງບົດບາດຂອງສະພາແຫ່ງຊາດ ແລະ ສະພາປະຊາຊົນ ນະຄອນຫຼວງ ໃຫ້ສູງຂຶ້ນ ​ຈຶ່ງ​ໄດ້​ຈັດ​ກອງ​ປະຊຸມ​ຝຶກ​ອົບຮົມ​ນີ້ຂື້ນ ເຊິ່ງ​ຈະ​ໄດ້ຮັບຟັງບົດຮຽນ ແລະ ​​ແລກປ່ຽນຄໍາ​ຄິດ​ຄໍາ​ເຫັນ ​ຕໍ່​ຫົວຂໍ້ດັ່ງ​ນີ້:

  1. ບົດ​ຮຽນ​ໃນ​ການ​ຄົ້ນ​ຄວ້າ​ຄຳ​ຮ້ອງ​ຂໍ​ຄວາມ​ເປັນ​ທຳແລະຄຳ​ສະ​ເໜີ​ຂອງ​ປະ​ຊາ​ຊົນ.
  2. ທັກ​ສະ​ກາ​ນ​ລົງ​ພົບ​ປະ​ປະ​ຊາ​ຊົນ ແລະ ເຜີຍ​ແຜ່​ຜົນ​ສຳ​ເລັດກອງ​ປະ​ຊຸມ​ຂອງ​ສະ​ພາ​ແຫ່ງ​ຊາດ ແລະ ສະ​ພາ​ປະ​ຊາ​ຊົນ ນະ​ຄອນ​ຫຼວງວຽງ​ຈັນ.
  3. ບົດ​ຮຽນ​ການ​ພິ​ຈາ​ລະ​ນາ​ຮັບ​ຮອງ​ເອົາແຜນ​ພັດ​ທະ​ນາ​ເສດ​ຖະກິດ-ສັງ​ຄົມ ແລະ ແຜນ​ງົບ​ປະ​ມານ ແລະ ບົດ​ສະ​ຫຼຸບຂາດຕົວ​ຂອງ​ອົງການກວດ​ສອບ.
  4. ບົດ​ຮຽນ​ການ​ຕິດ​ຕາມກວດ​ກາການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ​-ສັງ​ຄົມ ແລະ ແຜນ​ງົບ​ປະ​ມານ​ແຫ່ງ​ລັດ.
  5. ບົດຮຽນ ຂັ້ນ​ຕອນການ​ພິ​ຈາ​ລະ​ນາ​ສ້າງ​ນິ​ຕິ​ກຳ​ລຸ່ມ​ກົດໝາຍ.
  6. ບົດ​ຮຽນ​ການ​ຕິດ​ຕາມກວດ​ກາການ​ຈັດ​ຕັ້ງ​ປະ​ຕິ​ບັດ​ລັດ​ຖະ​ທຳ​ມະ​ນູນ ແລະ ນິ​ຕິ​ກຳ​ລຸ່ມກົດ​ໝາຍ.

       

(ນາງ ພອນທິບ ອິນທິລາດ)