ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

​(ສພຊ) ເພື່ອເປັນການຍົກສູງພາລະບົດບາດ, ສິດ ແລະ ໜ້າທີ່ຂອງກົມເສນາທິການຂອງກຳມາທິການວຽກງານສະມາຊິກສະພາແຫ່ງຊາດ ໃຫ້ມີຄວາມໜັກແໜ້ນເຂັ້ມແຂງ ແລະ ມີປະສິດທິພາບສູງຂຶ້ນ; ເພີ່ມທະວີການປະສານງານ ຂອງກົມເສນາທິການ ຂອງກຳມາທິການວຽກງານສະມາຊິກສະພາແຫ່ງຊາດ ກັບກົງຈັກເສນາທິການສະພາປະຊາຊົນຂັ້ນແຂວງ ໃຫ້ມີປະສິດທິພາບ ເພື່ອຮັບປະກັນການປະຕິບັດສິດ ແລະ ໜ້າທີ່ ຕາມພາລະບົດບາດຂອງຕົນ.ລະຫວ່າງວັນທີ 7-8 ຕຸລາ 2022  ກໍາມາທິການວຽກງານສະມາຊິກສະພາແຫ່ງຊາດ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງ ໃຫ້ແກ່ກົງຈັກເສນາທິການຂອງກຳມາທິການວຽກງານສະມາຊິກສະພາແຫ່ງຊາດ ແລະ ກົງຈັກເສນາທິການ ຂອງສະພາປະຊາຊົນຂັ້ນແຂວງ ທີ່ເມືອງເຟືອງ ແຂວງວຽງຈັນ ໂດຍການເປັນປະທານຂອງທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ, ເຂົ້າຮ່ວມມີຮອງປະທານກຳມາທິການວຽກງານສະມາຊິກສະພາແຫ່ງຊາດ, ຮອງເລຂາທິການສະພາແຫ່ງຊາດ, ຮອງປະທານສະພາປະຊາຊົນຂັ້ນແຂວງ ຈາກ 3 ແຂວງຄື: ຊຽງຂວາງ, ວຽງຈັນ, ບໍລິຄຳໄຊ, ບັນດາແຂກຖືກເຊີນ, ວິຊາການທີ່ກ່ຽວຂ້ອງ.​
​ ໂອກາດດັ່ງກ່າວ ທ່ານ ສຸບັນ ສະວະບຸດ ໄດ້ມີຄໍາເຫັນກ່າວເປີດກອງປະຊຸມວ່າ: ການຈັດກອງປະຊຸມເ​ຝິກ​ອົບ ຮົມ​ຄັ້ງນີ້ ມີຄວາມໝາຍສຳຄັນຫຼາຍ ເຊິ່ງຜູ້ເຂົ້າຮ່ວມຈະໄດ້ຮັບຮູ້ເຂົ້າໃຈເນື້ອໃນຈິດໃຈກ່ຽວກັບ ​ມະຕິ ຂອງຄະນະປະຈໍາສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ຄະນະປະຈໍາສະພາແຫ່ງຊາດ; ມະຕິຂອງຄະນະປະຈໍາສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກໍາມາທິການວຽກງານສະມາຊິກສະພາແຫ່ງຊາດ; ຂໍ້ຕົກລົງຂອງເລຂາທິການສະພາແຫ່ງຊາດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມຄຸ້ມຄອງສະມາຊິກສະພາແຫ່ງຊາດ ແລະ ກົມພັດທະນາວຽກງານສະພາ ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງໜ້າ​ທີ່​ວຽກງານໃນໄລຍະໃໝ່, ຄືດັ່ງບັນດາທ່ານຮູ້ແລ້ວວ່າ ຊຸດເຝິກອົບຮົມເປັນການຝຶກສະເພາະໃຫ້ຜູ້ທີ່ເປັນເສນາທິການທີ່ປະຕິບັດວຽກງານຢູ່ປະຈໍາເຂດເລືອກຕັ້ງ, ພະນັກງານ-ລັດຖະກອນ ທັງສອງກົມຂອງກໍາມາທິການວຽກງານສະມາຊິກສະພາແຫ່ງຊາດ ແລະ ໜ່ວຍງານຊ່ວຍວຽກສະມາຊິກສະພາປະຊາຊົນຂັ້ນແຂວງໃນ 3 ແຂວງ. ດັ່ງນັ້ນ, ​ເພື່ອ​​ເຮັດ​ໃຫ້​ຊຸດເ​ຝິກ​ອົບຮົມ​ບັນລຸ​ຕາມ​ຈຸດປະສົງຄາດໝາຍ​ທີ່​ວາງ​ໄວ້, ຕາງໜ້າ​​ປະທານກອງປະ ຊຸມ ຂໍ​ຮຽກຮ້ອງ​ມາ​ຍັງ​ບັນດາທ່ານ ທີ່​ເຂົ້າຮ່ວມເ​ຝິກ​ອົບຮົມ​ຄັ້ງນີ້ ຈົ່ງ​ພ້ອມ​ກັນຍົກສູງຄວາມຮັບຜິດຊອບຂອງຕົນເຂົ້າໃນ ການສຶກສາອົບຮົມ ແລະ ເພື່ອນໍາມາແລກປ່ຽນບົດຮຽນປະສົບການຮ່ວມກັນ.
​ເນື້ອໃນຂອງກອງປະຊຸມຄັ້ງນີ້ ມີ 4 ຫົວຂໍ້ຄື: 1 ຄວາມຮຸ້ພາລະບົດບາດ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ; 2 ພາລະບົດບາດ ຂອງກຳມາທິການວຽກງານສະມາຊິກສະພາແຫ່ງຊາດ; 3 ພາລະບົດບາດການເປັນເສນາທິການ ຂອງກົມຄຸ້ມຄອງສະມາຊິກສະພາແຫ່ງຊາດ; 4 ພາລະບົດບາດ ການເປັນເສນາທິການ ຂອງກົມພັດທະນາວຽກງານສະພາ, ຈາກນັ້ນ ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄໍາເຫັນຕໍ່ກອງປະຊຸມ ເພື່ອໃຫ້ມີເນື້ອໃນຄົບຖ້ວນສົມບູນ ແລະ ສາມາດນຳໄປໝູນໃຊ້ເຂົ້າໃນວຽກງານຕົວຈິງ.
​ ຊຸດເຝິກອົບຮົມຄັ້ງນີ້ ໄດ້ຮັບການສະໜັບສະໜູນຈາກອົງການ ເຮວວີຕັດສ (Hevetaslaos) ແລະ ເງິນສົມທົບຈາກຄະນະເລຂາທິການສະພາແຫ່ງຊາດ.
(ພາບ ແລະ ຂ່າວ: ອານຸສອນ ພູມມີທອນ)