1. ການຜະລິດເປັນສິນຄ້າ: ເອົາໃຈໃສ່ຜັນຂະຫຍາຍນະໂຍບາຍແຫ່ງຊາດວ່າດ້ວຍການລ້ຽງ, ການປູກ ແລະ ມາດຕະການສົ່ງເສີມການຜະລິດພາຍໃນ ກັບ ມາດຕະການຄວບຄຸມການນຳເຂົ້າ ໃຫ້ເປັນຮູບປະທຳລົງສູ່ທ້ອງຖິ່ນຮາກຖານໃຫ້ຫຼາຍຂຶ້ນຕື່ມ; ພ້ອມນີ້ ກໍສົ່ງເສີມການສ້າງກຸ່ມຜະລິດໃຫ້ຫຼາຍຂຶ້ນ ເພື່ອຊຸກຍູ້ປະຊາຊົນທຳການຜະລິດຄ້ຳປະກັນສະ ບຽງອາຫານທົດແທນການນຳເຂົ້າ ແລະ ເປັນສິນຄ້າ ເພື່ອສົ່ງເຂົ້າໂຮງງານປຸງແຕ່ງຢູ່ພາຍໃນ ຫຼືວ່າສົ່ງອອກໄປຕ່າງປະເທດ, ສະເພາະແຂວງສະຫວັນນະເຂດ ໃນໄລຍະຜ່ານມາກໍໄດ້ສົ່ງເສີມການຈັດຕັ້ງກຸ່ມການຜະລິດ ເຊິ່ງມີທັງໝົດ 856 ກຸ່ມ, ກຸ່ມປູກ 717 ກຸ່ມ ແລະ ກຸ່ມລ້ຽງ 138 ກຸ່ມ ແຕ່ຜ່ານການຕິດຕາມຊຸກຍູ້ຂອງສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ເຫັນວ່າບັນຫາທີ່ຈະຕ້ອງເອົາໃຈໃສ່ແກ້ໄຂຄື:

1) ການຜະລິດກະສິກຳເພື່ອທົດແທນ ແລະ ການຜະລິດສິນຄ້າສົ່ງອອກ ຍັງມີຫົວໜ່ວຍທີ່ເປັນລັກສະນະແບບຄອບຄົວກະແຈກກະຈາຍ, ການເຕົ້າໂຮມການຜະລິດເພື່ອປ້ອນຕະຫຼາດກໍຍັງບໍ່ທັນໄດ້ຫຼາຍ;

2) ການຜະລິດພືດເປັນສິນຄ້າເພື່ອສົ່ງອອກເປັນວັດຖຸດິບ ຜູ້ຜະລິດກໍຍັງຢູ່ກະແຈກກະຈາຍ, ເຮັດໃຫ້ຖືກເອົາລັດເອົາປຽບຈາກຜູ້ປະກອບການ ຫຼືວ່າພໍ່ຄ້າຄົນກາງ;

3) ແນວພັນພືດ, ແນວພັນສັດ, ຫົວອາຫານ ແລະ ປັດໄຈການຜະລິດ ສ່ວນຫຼາຍກໍຍັງນຳເຂົ້າຈາກຕ່າງປະເທດ;

4) ການສະໜອງສິນເຊື່ອດອກເບ້ຍຕໍ່າ ສຳລັບກຸ່ມ ແລະ ສະຫະກອນ ຍັງຈຳກັດ ບາງເງື່ອນໄຂກໍສູງ, ຄວາມສາ ມາດໃນການວາງແຜນການຜະລິດທຸລະກິດກໍຍັງຈຳກັດ, ການສະໜອງທຶນທີ່ຈຳເປັນໃຫ້ຜູ້ປະກອບການເພື່ອເກັບຊື້ຜົນຜະລິດຈາກປະຊາຊົນ ຍັງບໍ່ທັນກັບເວລາ.

2. ດ້ານອຸດສາຫະກຳ ແລະ ການຄ້າ: ກົນໄກການອະນຸຍາດສ້າງຕັ້ງໂຮງງານ, ການອະນຸມັດລະຫວ່າງກະຊວງກັບແຂວງ ຄວນປະສານສົມທົບກັນຕື່ມອີກ, ປະເມີນປະສິດທິພາບ ແລະ ປະສິດທິຜົນ ເຊິ່ງມີບາງໂຮງງານຢູ່ນະຄອນ ໄກ ສອນ ພົມວິຫານ ເຫັນວ່າພາກສ່ວນກ່ຽວຂ້ອງຍັງຖືເບົາໃນຂັ້ນຕອນການກວດກາເອກະສານບົດວິພາກການອອກໃບທະ ບຽນ ແລະ ທີ່ຕັ້ງກໍຍັງບໍ່ຖືກຕາມເຂດກຳນົດ ເຮັດໃຫ້ມີກິ່ນເໝັນ, ມີຜົນກະທົບ ແລະ ຜົນສະທ້ອນຕໍ່ສຸຂະພາບ ແລະ ຊີ ວິດການເປັນຢູ່ຂອງປະຊາຊົນ; ຜ່ານມາຍັງເຫັນວ່າກົນໄກການປະສານງານລະຫວ່າງກົມຂອງບັນດາກະຊວງກັບແຂວງ ຍັງບໍ່ທັນໂລ່ງລ່ຽນເທື່ອ.

ດ້ານການບໍລິການການນຳເຂົ້າສິນຄ້າ ເປັນຕົ້ນໝວດສະບຽງອາຫານ, ນ້ຳມັນເຊື້ອໄຟ ແລະ ອື່ນໆ ກໍຍັງກວມອັດ ຕາສ່ວນສູງ ລັດຖະບານຄວນຕິດຕາມກວດກາຄືນເຊັ່ນ: ໝວດສະບຽງອາຫານປະເພດໃດເຮົາຄວນສົ່ງເສີມ ແລະ ມີມາດຕະການສະກັດກັ້ນ ເພື່ອປົກປ້ອງການຜະລິດພາຍໃນໃຫ້ມີຄວາມເຂັ້ມແຂງ.

3. ດ້ານການລົງທຶນພັດທະນາພື້ນຖານໂຄງລ່າງ: ຄວນສຸມໃສ່ຕື່ມ ເປັນຕົ້ນໂຄງການບຸລິມະສິດຂອງລັດຖະບານທີ່ຈັດຕັ້ງຢູ່ທ້ອງຖິ່ນ ເພື່ອສ້າງພື້ນຖານແກ່ການຜະລິດເປັນສິນຄ້າໃຫ້ຫຼາຍຂຶ້ນ.

4. ຕໍ່ກັບການຈັດຕັ້ງປະຕິບັດແຜນງົບປະມານແຫ່ງລັດ: ຄວນສຸມໃສ່ຖານລາຍຮັບໃໝ່ ເປັນຕົ້ນແມ່ນອາກອນທີ່ດິນ ເຊິ່ງເປັນຖານລາຍຮັບທີ່ຍືນຍົງ, ພ້ອມກັນນີ້ ກໍທົບທວນຄືນການຍົກເວັ້ນພາສີອາກອນການນຳເຂົ້າສານເຄມີ ແລະ ພາຫະນະ ທີ່ນຳເຂົ້າມາຮັບໃຊ້ໃນໂຄງການຜະລິດປຸງແຕ່ງອຸດສາຫະກຳບໍ່ແຮ່ ແລະ ອື່ນໆ.