ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ,  ປະທານສະພາແຫ່ງຊາດ ກ່າວສູນທອນພົດປິດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ຢ່າງເປັນທາງການ ທີ່ຫໍສະພາແຫ່ງຊາດ ນະຄອນຫຼວງວຽງຈັນ, ໃນວັນທີ 8 ກໍລະກົດ 2022 ນີ້ ວ່າ: ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ດໍາເນີນມາແຕ່ວັນທີ 13 ມິຖຸນາ ຫາວັນທີ 8 ກໍລະກົດ 2022 ເຊິ່ງລວມເປັນເວລາ 20 ວັນ ໃນທ່າມກາງບັນຍາກາດ ທີ່ປະເທດເຮົາພວມປະເຊີນກັບຄວາມຫຍຸ້ງຍາກດ້ານເສດຖະກິດ-ການເງິນ ທີ່ສະສົມມາຫຼາຍປີ ແລະ ໃນບັນຍາກາດທີ່ທົ່ວພັກ-ລັດ ແລະ ປວງຊົນລາວທັງຊາດ ສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ຄື: ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢ່າງເປັນຂະບວນຟົດຟື້ນ ທັງເປັນໄລຍະທີ່ລັດຖະບານໄດ້ມີມາດຕະການແກ້ໄຂບັນຫາການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກອື່ນໆ ໃຫ້ມີຄວາມຜ່ອນຄາຍລົງ, ສ່ອງແສງໃຫ້ເຫັນເຖິງຄວາມຕັດສິນໃຈ ແລະ ຄວາມຮັບຜິດຊອບສູງ ຂອງບັນດາອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ຫຍຸ້ງຍາກຂອງປະເທດ. ມາຮອດມື້ນີ້, ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ບັນລຸຜົນສໍາເລັດ ຕາມຈຸດປະສົງລະດັບຄາດໝາຍທີ່ວາງໄວ້.

ກອງປະຊຸຸຸມສະໄໝສາມັນເທື່ອທີ 3 ໄດ້ພິຈາລະນາ ແລະ ຮັບຮອງເອົາເອກະສານດັ່ງນີ້:

1). ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022 ເຊິ່ງໄດ້ຕີລາຄາສູງຕໍ່ຄວາມພະຍາຍາມຂອງລັດຖະບານ ໃນການສູ້ຊົນເຮັດໃຫ້ອັດຕາການເຕີບໂຕທາງດ້ານເສດຖະກິດສາມາດບັນລຸໄດ້ 4,3%, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສາມາດປະຄັບປະຄອງເສດຖະກິດບໍ່ໃຫ້ເຂົ້າສູ່ວິກິດການທີ່ໜັກໜ່ວງໄປກວ່ານີ້, ມີການແຕ່ງຕັ້ງຄະນະຮັບຜິດຊອບເພື່ອແກ້ໄຂບັນການເໜັງຕີງແຮງຂອງລາຄາສິນຄ້າ, ອັດຕາແລກປ່ຽນ, ຄວາມຫຍຸ້ງຍາກທາງດ້ານນໍ້າມັນເຊື້ອໄຟ. ພ້ອມກັນນັ້ນ, ໄດ້ມີການໂຄສະນາເຜີຍແຜ່, ປຸກລະດົມໃຫ້ປະຊາຊົນລາວບັນດາເຜົ່າ ເພີ່ມທະວີນໍ້າໃຈປະຢັດມັດທະຍັດ, ມີຄວາມສາມັກຄີເປັນຈິດໜຶ່ງໃຈດຽວ ພ້ອມກັນແກ້ໄຂບັນຫາໃນເວລາທີ່ປະເທດຊາດປະສົບກັບຄວາມຫຍຸ້ງຍາກ. ກອງປະຊຸມມອບໃຫ້ລັດຖະບານ ນໍາເອົາຄວາມຄິດເຫັນຂອງກອງປະຊຸມ ໄປພິຈາລະນາເພື່ອສືບຕໍ່ປັບປຸງ, ແກ້ໄຂບັນດາບັນຫາທີ່ຫຍຸ້ງຍາກທາງດ້ານເສດຖະກິດ-ການເງິນ ໃຫ້ກັບສູ່ສະພາບປົກກະຕິໂດຍໄວ.

2). ກອງປະຊຸມໄດ້ຮັບຟັງການລາຍງານຂອງລັດຖະບານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ. ຕະຫຼອດໄລຍະເກືອບໜຶ່ງປີທີ່ຜ່ານມາ ລັດຖະບານ ໄດ້ສົມທົບກັບສະພາແຫ່ງຊາດ ຊີ້ນໍາ-ບັນຊາການຈັດຕັ້ງຜັນຂະຫຍາຍມະຕິຂອງສູນກາງພັກ ເປັນອັນລະອຽດເຂົ້າໃນນິຕິກໍາຂອງລັດ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານດັ່ງກ່າວ ຢ່າງເປັນຂະບວນການກວ້າງຂວາງ ທັງຢູ່ສູນກາງ ແລະ ທ້ອງຖິ່ນ ເຊິ່ງໄດ້ຮັບຜົນສໍາເລັດຫຼາຍດ້ານ. ຄຽງຄູ່ກັນນັ້ນ, ກອງປະຊຸມສະ

ເໜີໃຫ້ລັດຖະບານເພີ່ມທະວີການໂຄສະນາເຜີຍແຜ່ ປຸກລະດົມໃຫ້ພໍ່ແມ່ປະຊາຊົນລາວບັນດາເຜົ່າ ໄດ້ຮັບຮູ້ເຂົ້າໃຈ ແລະ ເຫັນໄດ້ຄວາມຈໍາເປັນຂອງການຈັດຕັ້ງປະຕິບັດວາລະແຫ່ງຊາດ, ມີການເຂົ້າຮ່ວມຢ່າງຕັ້ງໜ້າ ສູ້ຊົນຜ່ານຜ່າເຮັດໃຫ້ປະເທດຊາດຫຼຸດພົ້ນອອກຈາກສະພາວະຫຍຸ້ງຍາກທາງດ້ານເສດຖະກິດ-ການເງິນ ກໍຄືບັນຫາຢາເສບຕິດໃຫ້ລຸດໜ້ອຍຖອຍລົງເລື້ອຍໆ; ມອບໃຫ້ລັດຖະບານ ຮີບຮ້ອນສືບຕໍ່ຊີ້ນໍາບັນດາກະຊວງ, ອົງການ ແລະ ອົງການປົກຄອງທ້ອງຖິ່ນຈົ່ງຍົກສູງຄວາມຮັບຜິດຊອບຂອງຕົນ ຕັ້ງໜ້າເຂົ້າຮ່ວມໃນການຈັດຕັ້ງປະຕິບັດວາລະແຫ່ງຊາດ ໃຫ້ມີປະສິດທິພາບ, ປະສິດທິຜົນ ແລະ ເປັນຮູບປະທໍາຕົວຈິງ.

3). ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການປະເມີນຜົນການຈັດຕັ້ງປະຕິບັດກົດໝາຍ 4 ສະບັບ ຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ ເຊິ່ງເປັນຄັ້ງທໍາອິດທີ່ໄດ້ມີການປະເມີນການຈັດຕັ້ງປະຕິບັດກົດໝາຍ ແລະ ນໍາເຂົ້າມາພິຈາລະນາໃນກອງປະຊຸມສະພາແຫ່ງຊາດ ນັບແຕ່ໄດ້ປະກາດໃຊ້ລັດຖະທໍາມະນູນ ແລະ ກົດໝາຍ ເປັນຕົ້ນມາ. ກອງປະຊຸມສະແດງຄວາມເປັນຫວ່ງ ຕໍ່ການປະຕິບັດ 4 ກົົດໝາຍ ດັ່ງກ່າວ ເປັນຕົ້ນ ການຄຸ້ມຄອງ, ການໃຫ້ເຊົ່າ, ການສຳປະທານທີ່ດິນ, ການຈັບຈອງ ແລະ ຊື້-ຂາຍສິດນໍາໃຊ້ທີ່ດິນ, ການຫັນທີ່ດິນເປັນກຳມະສິດອື່ນທີ່ບໍ່ສອດຄ່ອງກັບກົດໝາຍມີທ່າອ່ຽງນັບມື້ເພີ່ມຂຶ້ນ; ການຫັນແຜນແມ່ບົດພັດທະນາທີ່ດິນແຫ່ງຊາດ ເປັນແຜນຈັດສັນທີ່ດິນຂັ້ນທ້ອງຖິ່ນ, ການຂຶ້ນທະບຽນ-ອອກໃບຕາດິນ ແລະ ການວາງແຜນຍຸດທະສາດພັດທະນາທີ່ດິນຕາມຂະແໜງການຍັງຊັກຊ້າ ແລະ ເຮັດໄດ້ໜ້ອຍ; ສະເໜີເພີ່ມທະວີການຄຸ້ມຄອງບັນດາໂຄງການລົງທຶນດ້ານແຮ່ທາດໃຫ້ເຂັ້ມງວດ, ແກ້ໄຂຢ່າງທັນການຕໍ່ບັນດາໂຄງການ ແລະ ກິດຈະການລົງທຶນແຮ່ທາດ ທີ່ບໍ່ມີປະສິດທິພາບ ບໍ່ມີມືອາຊີບ ຫຼື ບໍ່ປະຕິບັດຕາມກົດໝາຍ, ບໍ່ປະຕິບັດຕາມສັນຍາ, ມີຜົນກະທົບຕໍ່ສິ່ງແວດລ້ອມທຳມະຊາດ ແລະ ສັງຄົມ; ໃຫ້ເອົາໃຈໃສ່ຄຸ້ມຄອງໂຄງການລົງທຶນໃຫ້ປະຕິບັດຕາມກົດໝາຍ ແລະ ສັນຍາ, ການແບ່ງຂັ້ນຄຸ້ມຄອງການສົ່ງເສີມການລົງທຶນລະຫວ່າງຂະແໜງການສູນກາງ ແລະ ທ້ອງຖິ່ນ ໃຫ້ມີຄວາມລະອຽດ ຈະແຈ້ງຕື່ມ; ສະເໜີໃຫ້ມີກົນໄກການພິຈາລະນາອະນຸມັດການລົງທຶນ ໃຫ້ໄປຕາມກໍານົດເວລາຂອງກົດໝາຍ ແລະ ມີທິດທາງຫັນເປັນດີຈີຕອນໃນການຄຸ້ມຄອງ ແລະ ສ້າງຄວາມສະດວກໃຫ້ແກ່ການລົງທຶນ ທັງຕອບສະໜອງຂໍ້ມູນທີ່ຈໍາເປັນໃຫ້ແກ່ນັກລົງທຶນ, ເອົາໃຈໃສ່ກວດກາ ແລະ ຄຸ້ມຄອງບັນດາໂຄງການສໍາຫຼວດ, ຂຸດຄົ້ນແຮ່ທາດໃຫ້ຖືກຕ້ອງຕາມກົດໝາຍ, ເດັດດ່ຽວແກ້ໄຂໂຄງການທີ່ບໍ່ມີປະສິດທິພາບທີ່ລະເມີດກົດໝາຍ ແລະ ສັນຍາ; ເພີ່ມທະວີການຄຸ້ມຄອງຊັບສິນຂອງລັດໃຫ້ຮັດກຸມ, ຈະແຈ້ງ ແລະ ຄົບຖ້ວນ.

4). ກອງປະຊຸມໄດ້ພິຈາລະນາ ແລະ ຮັບຮອງເອົາ ບົດລາຍງານຂອງລັດຖະບານ ກ່ຽວກັບທິດທາງການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດ  ເຊິ່ງກອງປະຊຸມເຫັນວ່າລັດຖະບານໄດ້ມີຄວາມພະຍາມຍາມ ປັບປຸງການເຄື່ອນໄຫວຂອງລັດວິສາຫະກິດ ໃຫ້ມີປະສິດທິຜົນ, ບໍ່ສ້າງໜີ້ສິນເພີ່ມແກ່ລັດຖະບານ. ກອງປະຊຸມໄດ້ສະເໜີໃຫ້ລັດຖະບານ ມີການຄົ້ນຄວ້າກໍານົດກົນໄກ, ຂັ້ນຕອນ ການພິຈາລະນາຕົກລົງຢ່າງລະອຽດ, ເລິກເຊິ່ງ ເພື່ອຮັບປະກັນຜົນປະໂຫຍດລວມຂອງປະເທດຊາດ ກໍຄືປະຊາຊົນລາວບັນດາເຜົ່າ.

5). ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ເຊິ່ງກອງປະຊຸມ ເຫັນໄດ້ຄວາມຈໍາເປັນ ແລະ ຄວາມສໍາຄັນຂອງການສົ່ງເສີມການທ່ອງທ່ຽວສີຂຽວຂອງປະເທດເຮົາ ເພື່ອແນໃສ່ກະຕຸກຊຸກຍູ້ການຜະລິດ, ການຄ້າ ແລະ ການບໍລິການ ຂອງຂະແໜງການປິ່ນອອ້ມ ໃຫ້ສາມາດດຶງດູດນັກທ່ອງທ່ຽວພາຍໃນ ແລະ ຕ່າງປະເທດ, ສາມາດສ້າງລາຍຮັບເງິນຕາຕ່າງປະເທດ ເຂົ້າສູ່ງົບປະມານ, ປະກອບສ່ວນຕອບສະໜອງເງິນຕາໃຫ້ແກ່ປະເທດ. ກອງປະຊຸມ ໄດ້ສະເໜີໃຫ້ລັດຖະບານ ມີມາດຕະການແກ້ໄຂ ໃນການພັດທະນາໂຄງລ່າງພື້ນຖານ, ການໂຄສະນາ, ການຄຸ້ມຄອງ ແລະ ສ້າງຄວາມເຂັ້ມແຂງບຸກຄະລາກອນ, ການເອື້ອອໍານວຍການທ່ອງທ່ຽວ ເພື່ອໃຫ້ການທ່ອງທ່ຽວສີຂຽວສາມາດປະກອບສ່ວນສ້າງຄວາມເຂັ້ມແຂງໃຫ້ແກ່ເສດຖະກິດຂອງຊາດ.

6). ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດບັນດາຄາດໝາຍໃນຂົງເຂດສຶກສາທິການ ແລະ ກິລາ ໂດຍສະເພາະການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍະກໍາ ເຊິ່ງກອງປະຊຸມໄດ້ຕີລາຄາສູງຕໍ່ຄວາມພະຍາຍາມ ຂອງຂະແໜງການທີ່ກ່ຽວຂ້ອງ ທີ່ໄດ້ສຸມສະຕິປັນຍາ ເຂົ້າໃນການຈັດຕັ້ງປະຕິບັດບັນດາຄາດໝາຍຂົງເຂດສຶກສາທິການ-ກິລາ ໂດຍສະເພາະ ຟື້ນຟູການຮຽນ-ການສອນທຸກຊັ້ນ-ທຸກສາຍ ຫຼັງຈາກການແຜ່ລະບາດຂອງພະຍາດໂຄວິດ-19 ດ້ວຍລະບົບທາງໄກ (Online) ໃຫ້ສາມາດກັບຄືນເຂົ້າມາສູ່ການຮຽນໃນຫ້ອງຮຽນ ໃນສະພາບປົກກະຕິ ແລະ ເອົາໃຈໃສ່ປັບປຸງຄຸນນະພາບລະບົບການຮຽນ-ການສອນໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍະກໍາ ຮັບປະກັນເງື່ອນໄຂໃຫ້ນັກກິລາໄດ້ເຂົ້າຮ່ວມການແຂ່ງຂັນກິລາໃນລະດັບຕ່າງໆ ທັງພາຍໃນ ແລະ ຕ່າງປະເທດ. ກອງປະຊຸມສະເໜີໃຫ້ລັດຖະບານ ສືບຕໍ່ຊີ້ນໍາການຈັດຕັ້ງປະຕິບັດ 8 ຄາດໝາຍທີ່ບໍ່ທັນບັນລຸ ເປັນຕົ້ນ ອັດຕາປະລະການຮຽນ, ຄຸນນະພາບຂອງຄູສອນ, ການສົ່ງເສີມລູກຫຼານເຂົ້າຮຽນຂອງຜູ້ປົກຄອງ, ເອົາໃຈໃສ່ຍົກສູງຄຸນນະພາບການສຶກສາໃນເຂດຊົນນະບົດຫ່າງໄກສອກຫຼີກ ໃຫ້ໄດ້ຕາມມາດຕະຖານການສຶກສາແຫ່ງຊາດ; ພ້ອມກັນນັ້ນ, ກໍຕ້ອງເພີ່ມທະວີໃນການສ້າງຄວາມເຂັ້ມແຂງໃຫ້ແກ່ວຽກງານກິລາ-ກາຍະກໍາໃນທຸກດ້ານ ໂດຍຕິດພັນກັບຫຼັກສູດການຮຽນ-ການສອນໃນບັນດາສະຖາບັນການສຶກສາ, ຍູ້ແຮງຂະບວນການກິລາມະຫາຊົນ, ກິລາອາຊີບປະເພດຕ່າງໆ ທັງປັບປຸງການຈັດຕັ້ງສະມາຄົມ, ສະຫະພັນໃຫ້ມີຄຸນນະພາບ ເພື່ອຕອບສະໜອງກັບຄວາມຕ້ອງການກັບການພັດທະນາໃນຂົງເຂດດັ່ງກ່າວໃຫ້ມີການຫັນປ່ຽນດີຂຶ້ນ.

7). ກອງປະຊຸມໄດ້ຮັບຟັງການລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມມະຕິກອງປະຊຸມສະພາແຫ່ງຊາດ ສະບັບເລກທີ 04/ສພຊ, ລົງວັນທີ 10 ສິງຫາ 2021 ແລະ ການຕິດຕາມກວດກາການນໍາໃຊ້ 7 ມາດຕະການສະກັດກັ້ນ ຂອງອົງການສືບສວນ-ສອບສວນ ຕາມທີ່ກໍານົດໄວ້ໃນມາດຕາ 136 ຂອງກົດໝາຍວ່າດ້ວຍການດໍາເນີນຄະດີອາຍາ ໂດຍສະເພາະການແກ້ໄຂການລະເມີດກົດໝາຍ ໃນການພາຕົວ, ກັກຕົວ, ຈັບຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ.  ກອງປະຊຸມເຫັນດີຕໍ່ເນື້ອໃນຂອງບົດລາຍງານ ຂອງອົງການໄອຍະການປະຊາຊົນສູງສຸດ ແລະ ສະແດງຄວາມຊົມເຊີຍຕໍ່ອົງການໄອຍະການປະຊາຊົນສູງສຸດ ທີ່ໄດ້ມີຄວາມພະຍາຍາມຈັດຕັ້ງປະຕິບັດວາລະແຫ່ງຊາດ ເປັນແຜນງານ, ໂຄງການລະອຽດຂອງຕົນ ແລະ ຕິດຕາມ, ຊຸກຍູ້ການຈັດຕັ້ງປະຕິບັດ ໂດຍສົມທົບກັບກະຊວງປ້ອງກັນຄວາມສະຫງົບ ຢ່າງແໜ້ນແຟ້ນກົມກຽວ; ເອົາໃຈໃສ່ການຄົ້ນຄວ້າສ້າງ ແລະ ປັບປຸງກົດໝາຍ, ນິຕິກໍາໃຕ້ກົດໝາຍ ກ່ຽວກັບວຽກງານດັ່ງກ່າວໃຫ້ລະອຽດຕື່ມ;​ ເພີ່ມທະວີການຕິດຕາມກວດກາ ສະຖານທີ່ກັກຂັງ, ສະຖານທີ່ບໍາບັດ-ປິ່ນປົວ, ການເຝິກສີມືແຮງງານ ໃຫ້ແກ່ຜູ້ຢູ່ໃນສະຖານທີ່ກັກຂັງ, ເພີ່ມທະວີການປະສານສົມທົບ ລະຫວ່າງອົງການໄອຍະການປະຊາຊົນ ກັບອົງການສືບສວນ, ສອບສວນ ໃນການດໍາເນີນຄະດີໃຫ້ມີຄວາມເປັນເອກະພາບ ແລະ ສອດຄ່ອງຕາມກົດໝາຍ.

8). ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງ ຄະນະປະຈໍາສະພາແຫ່ງຊາດ ກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX  ແລະ ບົດລາຍງານຂອງຄະນະປະຈໍາສະພາແຫ່ງຊາດ ກ່ຽວກັບຜົນການຕິດຕາມກວດກາວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາ ຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດໃນຕໍ່ໜ້າ. ກອງປະຊຸມເຫັນວ່າ ຕະຫຼອດໄລຍະ 6 ເດືອນທີ່ຜ່ານມາ ສະພາແຫ່ງຊາດ ຊຸດທີ IX ໄດ້ມີຄວາມເປັນເຈົ້າການ, ຫ້າວຫັນ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ເຮັດໃຫ້ບົດບາດຂອງສະພາແຫ່ງຊາດ ໄດ້ຮັບການເຊີດຊູນັບມື້ສູງຂຶ້ນ, ໄດ້ຮັບຄວາມເຊື່ອໝັ້ນຈາກອົງການຈັດຕັ້ງລັດຂັ້ນຕ່າງໆນັບມື້ກວ້າງຂວາງ ແລະ ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນຜູ້ມີສິດເລືອກຕັ້ງ. ກອງປະຊຸມສະເໜີໃຫ້ເອົາໃຈໃສ່ປັບປຸງກົນໄກ, ວິທີການທາບທາມຮ່າງກົດໝາຍ, ການປະເມີນການປະຕິບັດກົດໝາຍ ໃຫ້ສອດຄ່ອງຕາມຄວາມຮຽກຮ້ອງຕ້ອງການໃນແຕ່ລະໄລຍະ ແລະ ທັນເວລາຂຶ້ນຕື່ມ ແລະ ສະເໜີໃຫ້ເອົາໃຈໃສ່ປະຕິບັດກົນໄກການຕິດຕາມກວດກາຢ່າງມີຈຸດສຸມ, ມີລັກສະນະລວມສູນ, ຮ່ວມກັບລັດຖະບານແກ້ໄຂບັນຫາຕ່າງໆຢ່າງທັນການ.

9). ກອງປະຊຸມ ໄດ້ພິຈາລະນາ ແລະ ຮັບຮອງເອົາກົດໝາຍໃໝ່ ແລະ ປັບປຸງທັງໝົດ 9 ສະບັບ​; ໃນນັ້ນ, ກົດໝາຍສ້າງໃໝ່ 3 ສະບັບ ຄື: ກົດໝາຍວ່າດ້ວຍວິຈິດສິນ; ກົດໝາຍວ່າດ້ວຍຄວາມປອດໄພຂອງເຂື່ອນ; ກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ ແລະ ກົດໝາຍປັບປຸງ 6 ສະບັບ ຄື: ກົດໝາຍວ່າດ້ວຍຊັບສິນຂອງລັດ; ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ; ກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ; ກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສານປະຊາຊົນ; ກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ ເຊິ່ງເປັນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍໄລຍະ 5 ປີຂອງສະພາແຫ່ງຊາດ ຊຸດທີ IX ທັງເປັນການປະກອບສ່ວນສຳຄັນ ໃນການປັບປຸງ ແລະ ເພີ່ມທະວີພາຫະນະ, ເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງປະເທດເຮົາ ໃຫ້ເປັນລະບົບຄົບຊຸດ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງຊາດ,​ ຂອງລັດ, ລວມໝູ່, ​ນິຕິບຸກຄົນ ແລະ ປະຊາຊົນລາວບັນດາເຜົ່າ, ຮັບປະກັນໃຫ້ແກ່ການສ້າງລັດ ປະຊາທິປະໄຕ ປະຊາຊົນ ຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ ເທື່ອລະກ້າວ.

10). ກອງປະຊຸມຍັງໄດ້ຮັບຟັງການລາຍງານຂອງຄະນະປະຈໍາສະພາແຫ່ງຊາດ ກ່ຽວກັບການຍົກຍ້າຍ, ແຕ່ງຕັ້ງຮອງປະທານກໍາມາທິການຈໍານວນໜຶ່ງຂອງສະພາແຫ່ງຊາດ ແລະ ການເລືອກຕັ້ງແທນສະມາຊິກສະພາແຫ່ງຊາດທີ່ວ່າງລົງ. ກອງປະຊຸມໄດ້ຄົ້ນຄວ້າພິຈາລະນາ ແລະ ເລືອກຕັ້ງເອົາທ່ານ ວຽງທະວີສອນ ເທບພະຈັນ ເປັນປະທານອົງການກວດສອບແຫ່ງລັດຄົນໃໝ່ ຕາມຄໍາສະເໜີຂອງທ່ານປະທານປະເທດ; ພິຈາລະນາຮັບຮອງເອົາການແຕ່ງຕັ້ງຮອງນາຍົກລັດຖະມົນຕີຄື: ທ່ານ ພົນເອກ ວິໄລ ຫຼ້າຄໍາຟອງ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນຄວາມສະຫງົບ, ທ່ານ ສະເຫຼີມໄຊ ກົມມະສິດ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງການຕ່າງປະເທດ; ຮັບຮອງເອົາການຍົກຍ້າຍ ແລະ ແຕ່ງຕັ້ງ ທ່ານ ປອ. ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄປຮັບໜ້າທີ່ໃໝ່ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ, ທ່ານ ສອນໄຊ ສິດພະໄຊ ຜູ້ວ່າການທະນາຄານ ແຫ່ງ ສປປລາວ ໄປຮັບໜ້າທີ່ໃໝ່ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ, ແຕ່ງຕັ້ງທ່ານ ມະໄລທອງ ກົມມະສິດ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ, ຍົກຍ້າຍ ແລະ ແຕ່ງຕັ້ງ ທ່ານ ປອ. ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໄປຮັບໜ້າທີ່ໃໝ່ເປັນຜູ້ວ່າການທະນາຄານ ແຫ່ງ ສປປລາວ ຕາມຄຳສະເໜີຂອງທ່ານນາຍົກ ລັດຖະມົນຕີ.

ກອງປະຊຸມໄດ້ຮັບຟັງການຊີ້ແຈງ ຕໍ່ຄໍາຊັກຖາມທີ່ສະມາຊິກສະພາແຫ່ງຊາດ ກໍຄືປະຊາຊົນບັນດາເຜົ່າ ທີ່ມີຄວາມສົນໃຈຫຼາຍ ຈາກທ່ານນາຍົກລັດຖະມົນຕີ, ບັນດາຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ລັດຖະມົນຕີກະຊວງແຜນການ ແລະ ການລົງທຶນ, ລັດຖະມົນຕີກະຊວງການເງິນ, ລັດຖະມົນຕີກະຊວງກະສິກໍາ ແລະ ປ່າໄມ້, ລັດຖະມົນຕີກະຊວງສຶກສາທິການ ແລະ ກິລາ, ລັດຖະມົນຕີກະຊວງພະລັງງານ ແລະ ບໍ່ແຮ່, ລັດຖະມົນຕີກະຊວງພາຍໃນ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ລັດຖະມົນຕີກະຊວງຍຸຕິທໍາ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ຮອງລັດຖະມົນຕີກະຊວງສາທາລະນະສຸກ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຜູ້ວ່າການທະນາຄານ ແຫ່ງ ສປປລາວ,  ຫົວໜ້າອົງການໄອຍະການປະຊາຊົນສູງສຸດ. ກອງປະຊຸມມີຄວາມເຊື່ອໝັ້ນວ່າ ແຕ່ລະພາກສ່ວນຈະສືບຕໍ່ເສີມຂະຫຍາຍຜົນສໍາເລັດທີ່ຍາດມາໄດ້ໃນປີຜ່ານມາ, ສູ້ຊົນຈໍາກັດ ແລະ ປັບປຸງແກ້ໄຂບັນດາອຸປະສັກ, ສິ່ງກີດຂວາງ ໃນຂົງເຂດວຽກງານທີ່ຕົນຮັບຜິດຊອບ ຕິດພັນກັບການຍູ້ແຮງຂະບວນການແຂ່ງຂັນຮັກຊາດພັດທະນາ ເພື່ອສ້າງໃຫ້ມີການຫັນປ່ຽນທີ່ດີຂຶ້ນຢ່າງຈະແຈ້ງ, ສືບຕໍ່ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍສະເພາະຢ່າງຍິ່ງ 2 ວາລະແຫ່ງຊາດ ໃຫ້ເປັນຮູບປະທໍາ ແລະ ມີໝາກຜົນຕົວຈິງຫຼາຍຂຶ້ນ.

ພ້ອມກັນນັ້ນ, ປະທານສະພາແຫ່ງຊາດ ໃນນາມປະທານຄະນະສະຫະພັນລັດຖະສະພາສາກົນ (IPU) ຂອງສະພາແຫ່ງຊາດ ແຫ່ງ ສປປລາວ ໄດ້ກ່າວຄໍາເຫັນສະແດງຄວາມຊົມເຊີຍ ແລະ ອວຍພອນວັນສ້າງຕັ້ງລັດຖະສະພາສາກົນ ທີ່ມີອາຍຸ ຄົບຮອບ 133 ປີ ໃນວັນທີ 30 ມິຖຸນາ 2022 ຜ່ານມາ.

ຜົນສໍາເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ຄັ້ງນີ້  ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ, ຄວາມຕັດສິນໃຈຂອງລັດຖະບານ, ກະຊວງ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາປະເທດຊາດ ໃນສະພາບມີຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ບັນລຸຕາມຄາດໝາຍທີ່ວາງໄວ້, ນໍາເອົາປະເທດຊາດກ້າວຂຶ້ນຢ່າງໜັກແໜ້ນ.

ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄັ້ງນີ້, ກອງປະຊຸມຮຽກຮ້ອງມາຍັງຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາແຫ່ງຊາດ, ລັດຖະບານ, ອົງການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນສໍາເລັດເປັນຢ່າງດີ.

ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດຈາກກົມການເມືອງສູນກາງພັກ ແລະ ຄະນະເລຂາທິການສູນກາງພັກ, ຍ້ອນຄວາມຮັບຜິດຊອບສູງຂອງລັດຖະບານ, ກະຊວງ, ບັນດາອົງການທີ່ກ່ຽວຂ້ອງ ແລະ ຂະແໜງການກ່ຽວຂ້ອງ.

ຕາງໜ້າຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຂໍສະແດງຄວາມຂອບໃຈເປັນຢ່າງສູງ ມາຍັງກົມການເມືອງ ແລະ ຄະນະເລຂາທິການສູນກາງພັກ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາແຫ່ງຊາດໂດຍຕະຫຼອດມາ, ຂໍສະແດງຄວາມຂອບໃຈ ເປັນຢ່າງຍິ່ງມາຍັງບັນດາທ່ານການນໍາພັກ-ລັດ, ສູນກາງແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ທີ່ໄດ້ໃຫ້ກຽດເຂົ້າຮ່ວມກອງປະຊຸມ ແລະ ປະຊາຊົນລາວບັນດາເຜົ່າ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ ຢ່າງຈົດຈໍ່ ແລະ ສົ່ງຄໍາຄິດເຫັນຜ່ານໂທລະສັບສາຍດ່ວນ ມາຍັງກອງປະຊຸມຢ່າງຫຼວງຫຼາຍ.

ຂໍສະແດງຄວາມຂອບໃຈ ຕໍ່ທຸກພາກສ່ວນກ່ຽວຂ້ອງ ທີ່ໄດ້ປະກອບສ່ວນເຂົ້າໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ກອງເລຂາກອງປະຊຸມທີ່ເຮັດວຽກຢ່າງບໍ່ຮູ້ອິດເມື່ອຍ, ທີມແພດສະເພາະກິດປ້ອງກັນພະຍາດໂຄວິດ-19 ທີ່ຮັບໃຊ້ກອງປະຊຸມສະໄໝສາມັນເທື່ອນີ້ຢ່າງຫ້າວຫັນ,  ຂໍສະແດງຄວາມຂອບໃຈຕໍ່ສື່ມວນຊົນທີ່ໄດ້ນໍາສະເໜີຂ່າວສານ ໂດຍການຖ່າຍທອດສົດຂ່າວຜ່ານວິທະຍຸ, ໂທລະພາບ ແລະ ສື່ເອເລັກໂຕນິກ ເຊິ່ງອໍານວຍຄວາມສະດວກໃນການຕິດຕາມ ການດໍາເນີນກອງປະຊຸມໄດ້ທັນສະພາບການ ແທດຕົວຈິງ ແລະ ຕໍ່ເນື່ອງ.

ທ້າຍນີ້, ຕາງໜ້າໃຫ້ກອງປະຊຸມສະພາແຫ່ງຊາດ ຂໍອວຍພອນໄຊອັນປະເສີດມາຍັງທ່ານເລຂາທິການໃຫຍ່, ປະທານປະເທດ ຈົ່ງມີພາລານາໄມສົມບູນ, ມີຄວາມຜາສຸກໃນຊີວິດຄອບຄົວ, ມີຜົນສໍາເລັດໃໝ່ໃຫຍ່ຫຼວງກວ່າເກົ່າໃນພາລະກິດແຫ່ງການຊີ້ນໍາ-ນໍາພາປະເທດຊາດ ໃຫ້ຈະເລີນກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາທ່ານການນໍາຂັ້ນສູງພັກ-ລັດ, ພະນັກງານ, ທະຫານ-ຕຳຫຼວດ ແລະ ປະຊາຊົນລາວບັນດາເຜົ່າໃນທົ່ວປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງຕົນ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດປິດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ຢ່າງເປັນທາງການນັບແຕ່ເວລານີ້ເປັນຕົ້ນໄປ.