(ສພຊ) ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຊ່ວຍເຫຼືອ ລະຫວ່າງ ສອງສະພາແຫ່ງຊາດ ກໍຄືສອງຫ້ອງວ່າການສະພາແຫ່ງຊາດ ຂອງສອງປະເທດລາວ ແລະ ຫວຽດນາມ ເວົ້າລວມ, ເວົ້າສະເພາະແມ່ນການຮ່ວມມື ລະຫວ່າງ ກົມສື່ມວນຊົນ ຄະນະເລຂາທິການສະພາແຫ່ງຊາດລາວ ແລະ ໂທລະພາບສະພາແຫ່ງຊາດ ສສ.ຫວຽດນາມ ໃຫ້ເປັນຮູບປະທຳຫຼາຍຂຶ້ນ; ປຶກສາຫາລືແລກປ່ຽນບົດຮຽນ ແລະ ປະສົບການດ້ານໂທລະພາບ ແລະ ສື່ອອນລາຍ ແລະ ເພື່ອປຶກສາຫາລື ແລະ ການຈັດຊຸດເຝິກອົບຮົມຍົກລະດັບຄວາມສາມາດດ້ານໂທລະພາບ, ສື່ອອນລາຍ ໃຫ້ແກ່ນັກຂ່າວ, ນັກເຕັກນິກ ຂອງວຽກງານສື່ມວນຊົນລາວ. ໃນຕອນບ່າຍວັນທີ 24 ກໍລະກົດ 2023 ທີ່ສະພາແຫ່ງຊາດລາວ ໄດ້ມີການພົບປະສອງຝ່າຍ ລະຫວ່າງ ກົມສື່ມວນຊົນ ຄະນະເລຂາທິການ ສະພາແຫ່ງຊາດ ແຫ່ງ ສປປລາວ ແລະ ໂທລະພາບສະພາແຫ່ງຊາດ ແຫ່ງ ສສ.ຫວຽດນາມ ເຊິ່ງຝ່າຍລາວນໍາໂດຍສະຫາຍ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ, ຜູ້ຊີ້ນໍາວຽກງານກົມສື່ມວນຊົນ ແລະ ຝ່າຍຫວຽດນາມ ນໍາໂດຍສະຫາຍ ເລ ກວ່າງ ມິ່ງ ຫົວໜ້າອຳນວຍການໂທລະພາບສະພາແຫ່ງຊາດ ແຫ່ງ ສສ.ຫວຽດນາມ ໂດຍມີຄະນະຜູ້ແທນຕາງໜ້າຈາກສອງຝ່າຍເຂົ້າຮ່ວມ.

ໂອກາດດັ່ງກ່າວ ສະຫາຍ ສິງຄໍາ ວົງພະຈັນ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ພາກພູມໃຈເປັນຢ່າງຍິ່ງ ທີ່ໄດ້ນໍາພາຄະນະຜູ້ແທນກົມສື່ມວນຊົນສະພາແຫ່ງຊາດລາວ ຕ້ອນຮັບສະຫາຍ ເລ ກວ່າງ ມິ່ງ ຫົວໜ້າອໍານວຍການໂທລະພາບສະພາແຫ່ງຊາດຫວຽດນາມ ພ້ອມດ້ວຍຄະນະ, ຕີລາຄາສູງຕໍ່ການເດີນທາງມາຢ້ຽມຢາມໃນຄັ້ງນີ້ ເຊິ່ງເປັນການຈັດຕັ້ງຜັນຂະຫຍາຍບົດບັນທຶກການຮ່ວມມື ລະຫວ່າງ ສອງຫ້ອງວ່າການສະພາແຫ່ງຊາດ ລາວ-ຫວຽດນາມ, ຫວຽດນາມ-ລາວ ທັງເປັນການສືບຕໍ່ເສີມສ້າງສາຍພົວພັນອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງ ສອງພັກ, ສອງລັດ ກໍຄືປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ທີ່ມີມາແຕ່ດົນນານ ແລະ ຕົກທອດມາສູ່ຍຸກສະໄໝຂອງພວກເຮົາ ຈະຕ້ອງໄດ້ພ້ອມກັນສືບຕໍ່ປົກປັກຮັກສາໄວ້ໃຫ້ຍືນຍົງຍາວນານຕະຫຼອດໄປ ພ້ອມທັງແຈ້ງໃຫ້ຮູ້ສະພາບພົ້ນເດັ່ນຂອງສະພາແຫ່ງຊາດ; ສະພາບລວມຂອງກົມສື່ມວນຊົນ ຄະນະເລຂາທິການສະພາແຫ່ງຊາດ ເປັນຕົ້ນ ດ້ານການຈັດຕັ້ງ, ບຸກຄະລາກອນ; ວຽກງານວິຊາສະເພາະ; ລາຍການໂທລະພາບ “ຜູ້ແທນປະຊາຊົນ” ແລະ ລາຍການໂທລະພາບ “ກົດໝາຍເພື່ອປະຊາຊົນ”; ວຽກງານສື່ອອນລາຍ; ວຽກງານໜັງສືພິມ “ຜູ້ແທນປະຊາຊົນ”; ລາຍການວິທະຍຸ “ຜູ້ແທນປະຊາຊົນ”; ວຽກງານຄຸ້ມຄອງ-ບໍລິຫານ; ວຽກງານທີ່ເປັນບຸລິມະສິດໃນການພັດທະນາໃນຕໍ່ໜ້າ ໂດຍສະເພາະແມ່ນ ວຽກງານສື່ມວນຊົນ ທີ່ຈະໄດ້ສຸມໃສ່ໃນຕໍ່ໜ້າ ແມ່ນການສ້າງຫ້ອງສະຕູດີໂອ, ການປັບປຸງເຕັກນິກ, ວັດຖຸອຸປະກອນຕ່າງໆ ໃຫ້ສອດຄ່ອງກັບວຽກງານ ໃນໄລຍະໃໝ່ ແລະ ການສ້າງຄວາມເຂັ້ມແຂງໃຫ້ແກ່ ພະນັກງານຂອງກົມສື່ມວນຊົນ ໂດຍສະເພາະການຈັດລາຍການ ໂທລະພາບ ແລະ ວຽກງານສື່ອອນລາຍ.

ຈາກນັ້ນ, ສະຫາຍ ເລ ກວ່າງ ມິ່ງ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ແຈ້ງໃຫ້ຮູ້ກ່ຽວກັບປະຫວັດ ແລະ ປະສົບການການສ້າງຕັ້ງສະຖານີໂທລະພາບສະພາແຫ່ງຊາດ ແຫ່ງ ສສ.ຫວຽດນາມ ຕັ້ງແຕ່ການເລີ່ມຕົ້ນຈົນເຖິງປັດຈຸບັນ ເປັນຕົ້ນແມ່ນການບໍລິຫານ, ການຈັດຕັ້ງ ແລະ ບຸກຄະລາກອນ, ທິດທາງໃນຕໍ່ໜ້າ ແລະ ເປົ້າໝາຍ ຈາກນັ້ນ, ບັນດາສະຫາຍຜູ້ເຂົ້າຮ່ວມທັງສອງຝ່າຍ ກໍໄດ້ຜັດປ່ຽນສົນທະນາກັນ ເພື່ອແລກປ່ຽນຖອດຖອນບົດຮຽນ ແລະ ບັນຫາທີ່ມີຄວາມສົນໃຈ.

(ພາບ ແລະ ຂ່າວ: ສອນສັກ ວັນວິໄຊ)