ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 26 ກຸມພາ 2022 ກອງປະຊຸມສໍາມະນາສ້າງຄວາມເຂັ້ມແຂງດ້ານການຕິດຕາມກວດກາການປະຕິບັດແຜນງົບປະມານ ແລະ ແຜນໂຄງການລົງທຶນຂອງລັດ ທີ່ຕິດພັນກັບການສ້າງຄວາມເຂັ້ມແຂງດ້ານບົດບາດຍິງ-ຊາຍ ໃຫ້ແກ່ພະນັກງານ-ລັດຖະກອນຂອງກຳມາທິການແຜນການ ການເງິນ ແລະ ການກວດສອບ (ກຜງສ) ສະພາແຫ່ງຊາດ ແລະ ສະພາປະຊາຊົນແຂວງ ໄດ້ອັດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນມາເປັນເວລາ 3 ວັນ (24-26 ກຸມພາ 2022) ໂດຍການເປັນປະທານຂອງທ່ານ ທັນຕາ ກອງຜາລີ ຮອງປະທານ ຜງ; ມີບັນດາຮອງປະທານກຳມາທິການ, ຄະນະກົມ, ຄະນະພະແນກ ແລະ ວິຊາການທີ່ສັງກັດໃນ ກຜງສ ແລະ ຄະນະກຳມະການເສດຖະກິດ ແຜນການ ແລະ ການເງິນຂອງສະພາປະຊາຊົນແຂວງ 6 ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ ເຊິ່ງກອງປະຊຸມໄດ້ຮັບການສະໜັບສະໜູນຈາກມູນນິທິ ເວສມິນສເຕີ ເພື່ອປະຊາທິປະໄຕ (WFD).

ກອງປະຊຸມ ໄດ້ຮັບຟັງການສະເໜີບົດຈາກຊ່ຽວຊານຂອງປະເທດການາດາ ຜ່ານວິດີໂອທາງໄກ ກ່ຽວກັບບົດຮຽນສາກົນໃນການຕິດຕາມກວດກາການສ້າງແຜນ ແລະ ການຈັດຕັ້ງປະຕິບັດແຜນງົບປະມານ ແລະ ແຜນການລົງທຶນຂອງລັດທີ່ຕິດພັນກັບບົດບາດຍິງ-ຊາຍ; ການສະເໜີບົດຈາກວິທະຍາກອນຈາກສະພາແຫ່ງຊາດ ກ່ຽວກັບການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕໍ່ແຜນການລົງທຶນຂອງລັດ ຕິດພັນກັບບົດບາດຍິງ-ຊາຍ ແລະ ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຕໍ່ແຜນງົບປະມານແຫ່ງລັດ ຕິດພັນກັບບົດບາດຍິງ-ຊາຍ ພ້ອມທັງເຮັດບົດເຝິກຫັດ ແລກປ່ຽນບົດຮຽນເຊິ່ງກັນແລະກັນຕື່ມອີກ.

(ພາບ ແລະ ຂ່າວ: ປາກາລັກ ພົມມີໄຊ)