(ສພຊ) ພາຍຫຼັງດຳເນີນມາເປັນເວລາ 4 ວັນ ແຕ່ວັນທີ 1-4 ຕຸລາ 2023 ກອງປະຊຸມເຝິກອົບຮົມວຽກງານວິເຄາະ, ພັດທະນາການຈັດຕັ້ງ ແລະ ການຄຸ້ມຄອງບຸກຄະລາກອນ ໃຫ້ແກ່ພະນັກງານ-ລັດຖະກອນ ຂອງກົມຈັດຕັ້ງ-ພະນັກງານ ຄະນະເລຂາທິການສະພາແຫ່ງຊາດ ແລະ ສະພາປະຊາຊົນ 9 ແຂວງພາກເໜືອ ຢູ່ທີ່ເມືອງວັງວຽງ ແຂວງວຽງຈັນ ໄດ້ອັດລົງດ້ວຍຜົນສຳເລັດຕາມລະດັບຄາດໝາຍທີ່ວາງໄວ້ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ເຂົ້າຮ່ວມມີບັນດາທ່ານຄະນະກົມຕ່າງໆ ພາຍໃນສະພາແຫ່ງຊາດ, ຄະນະພະແນກ, ວິຊາການ ຂອງກົມຈັດຕັ້ງ-ພະນັກງານ ຄະນະເລຂາທິການສະພາແຫ່ງຊາດ ພ້ອມດ້ວຍບັນດາທ່ານຄະນະເລຂາທິການສະພາປະຊາຊົນແຂວງ 9 ແຂວງພາກເໜືອ, ວິທະຍາກອນຈາກກະຊວງພາຍໃນ ແລະ ພາກສ່ວນກ່ຽວຂ້ອງ.

ຕະຫຼອດໄລຍະດຳເນີນກອງປະຊຸມ, ວິທະຍາກອນ ແລະ ສຳມະນາກອນ ໄດ້ສົນທະນາແລກປ່ຽນຄຳຄິດຄຳເຫັນຫຼາຍບັນຫາ ທີ່ຕິດພັນກັບການປະຕິບັດວຽກງານຕົວຈິງ ຢ່າງກົງໄປກົງມາ ຕໍ່ຫົວຂໍ້ທີ່ນຳມາເຝິກອົບຮົມໃນຄັ້ງນີ້ ເຊິ່ງປະກອບມີ 2 ພາກໃຫຍ່ຄື: 1. ການພັດທະນາການວິເຄາະການຈັດຕັ້ງ ປະກອບມີ 5 ຫົວຂໍ້ຄື: ຄວາມເຂົ້າໃຈກ່ຽວກັບການພັດທະນາອົງການຈັດຕັ້ງ, ຄວາມເຂົ້າໃຈກ່ຽວກັບຂະບວນການວິເຄາະການຈັດຕັ້ງ, ຄວາມເຂົ້າໃຈກ່ຽວກັບການນໍາໃຊ້ເຄື່ອງມື ແລະ ວິທີການວິເຄາະການຈັດຕັ້ງ, ຄວາມເຂົ້າໃຈກ່ຽວກັບການວາງແຜນ ແລະ ການຈັດຕັ້ງປະຕິບັດການພັດທະນາອົງການຈັດຕັ້ງ, ຄວາມເຂົ້າໃຈກ່ຽວກັບການຕິດຕາມ ແລະ ການປະເມີນຜົນກິດຈະກໍາການພັດທະນາອົງການຈັດຕັ້ງ; 2. ຄຸ້ມຄອງພະນັກງານ-ລັດຖະກອນ ເປັນຕົ້ນແມ່ນຄວາມຮູ້ພື້ນຖານກ່ຽວກັບການປັບປຸງກົງຈັກການຈັດຕັ້ງ, ຄວາມຮູ້ພື້ນຖານກ່ຽວກັບການກໍານົດຕໍາແໜ່ງງານ, ການຄຸ້ມຄອງ-ພະນັກງານລັດຖະກອນ, ກົດໝາຍວ່າດ້ວຍພະນັກງານ-ລັດຖະກອນ ແລະ ການເລື່ອນຊັ້ນ ແລະ ຂັ້ນ ຂອງພະນັກງານ-ລັດຖະກອນ. ພ້ອມດຽວກັນນີ້, ສຳມະນາກອນ ຍັງໄດ້ເຮັດບົດເຝິກຫັດຕົວຈິງ ໂດຍການໃຊ້ເຄື່ອງມືການວິເຄາະຕາມທີ່ວິທະຍາກອນໄດ້ມານຳສະເໜີໃນກອງປະຊຸມຄັ້ງນີ້ ເພື່ອເຮັດໃຫ້ຜູ້ເຂົ້າຮ່ວມມີຄວາມເຂົ້າໃຈ ແລະ ສາມາດນຳໃຊ້ເຄື່ອງມືດັ່ງກ່າວ ເຂົ້າໃນວຽກງານການປະຕິບັດໜ້າທີ່ຕົວຈິງໃນຕໍ່ໜ້າ.

ໃນຕອນທ້າຍ, ປະທານກອງປະຊຸມ ໄດ້ມີຄໍາເຫັນເນັ້ນຕໍ່ກອງປະຊຸມວ່າ: ພາຍຫຼັງສຳເລັດກອງປະຊຸມແລ້ວ, ຮຽກຮ້ອງໃຫ້ຄະນະຮັບຜິດຊອບນຳເອົາຜົນສຳເລັດຂອງກອງປະຊຸມໄປໝູນໃຊ້ ແລະ ປະຕິບັດເຂົ້າໃນວຽກງານຕົວຈິງໃຫ້ບັນລຸຜົນສຳເລັດຕາມລະດັບຄາດໝາຍ.

(ພາບ ແລະ ຂ່າວ: ນາງ ປາກາລັກ ພົມມີໄຊ)