(ສພຊ) ໃນວັນທີ 28-29 ສິງຫາ 2023 ກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດ ໄດ້ດຳເນີນທີ່ແຂວງອັດຕະປື ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໂດຍການເຂົ້າຮ່ວມຂອງທ່ານ ເລັດ ໄຊຍະພອນ ກຳມະການສູນກາງພັກ, ເລຂາຄະນະພັກແຂວງ, ເຈົ້າແຂວງອັດຕະປື, ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງອັດຕະປື, ບັນດາທ່ານການນຳພັກ-ລັດຂັ້ນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ອົງການຈັດຕັ້ງມະຫາຊົນ ແລະ ອະດີດສະມາຊິກສະພາແຫ່ງຊາດ, ອະດີດການນຳຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

ພາຍຫຼັງທີ່ທ່ານປະທານກອງປະຊຸມໄດ້ກ່າວເປີດພິທີ ໂດຍຍົກໃຫ້ເຫັນຄວາມສຳຄັນ, ຄວາມໝາຍ ແລະ ຄວາມຈຳເປັນໃນການປັບປຸງກົດໝາຍແລ້ວ, ຄະນະຮັບຜິດຊອບໄດ້ຂຶ້ນຜ່ານບົດປະເມີນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດສະພາແຫ່ງຊາດ ປະກອບມີ: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

ຕະຫຼອດໄລຍະ 2 ວັນ, ຜູ້ເຂົ້າຮ່ວມຈຳນວນ 146 ທ່ານ ໄດ້ສຸມສະຕິປັນຍາດ້ວຍຄວາມຮັບຜິດຊອບສູງ ປະກອບຄຳຄິດເຫັນຢ່າງເລິກເຊິ່ງ, ຫຼາກຫຼາຍ ເຊິ່ງເປັນພື້ນຖານໃຫ້ແກ່ການປັບປຸງບັນດາກົດໝາຍໃນຕໍ່ໜ້າ ຕໍ່ບັນດາມາດຕາຕາມຂໍ້ເຈາະຈີ້ມຂອງປະທານກອງປະຊຸມ ແລະ ບັນດາມາດຕາທີ່ເຫັນວ່າບໍ່ທັນຮັດກຸມ ໂດຍໄດ້ມີຜູ້ປະກອບຄຳເຫັນເກືອບ 40 ທ່ານ ຕໍ່ກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ ມີ 11 ທ່ານ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ມີ 15 ທ່ານ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງມີ 13 ທ່ານ.

(ພາບ ແລະ ຂ່າວ: ນາງ ປາກາລັກ ພົມມີໄຊ)