ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ກອງປະຊຸມທາບທາມການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ພາຍຫລັງດໍາເນີນມາເປັນເວລາ 2 ວັນ ໃນວັນທີ 18 ທັນວາ 2021 ໄດ້ອັດລົງດ້ວຍຜົນສຳເລັດອັນຈົບງາມ ທີ່ແຂວງບໍລິຄຳໄຊ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ, ເຂົ້າຮ່ວມມີທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ຊີ້ນຳວຽກງານກຳມາທິການຍຸຕິທຳ ທັງເປັນປະທານກຳມາທິການກົດໝາຍ; ມີຮອງປະທານກຳມາທິການຍຸຕິທຳ, ຮອງປະທານສະພາປະຊາຊົນແຂວງ, ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງ, ຕາງໜ້າຈາກອົງການໄອຍະການປະຊາຊົນແຂວງ, ສານປະຊາຊົນແຂວງ, ກອງບັນຊາການ ປກສ ແຂວງ, ພະແນກຍຸຕິທຳແຂວງ ແລະ ອົງການກວດກາລັດແຂວງ ລວມທັງໝົດ 53 ທ່ານ ຍິງ 18 ທ່ານ.

ຜູ້ເຂົ້າຮ່ວມ ໄດ້ຮັບຟັງການສະເໜີແລກປ່ຽນບົດຮຽນ ການຮັບ ແລະ ພິຈາລະນາ ຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດ ແລະ ຄະນະປະຈຳສະພາປະຊາຊົນແຂວງ; ບົດເນື້ອໃນການປັບປຸງກົດໝາຍ ວ່າດ້ວຍການແກ້ໄຂຄຳຮ້ອງທຸກ (ພາກທີ I, II, III, IV, V, VI, VII ແລະ ພາກທີ VIII).  ຜ່ານການປະກອບຄຳເຫັນຂອງບັນດາຜູ້ເຂົ້າຮ່ວມກອງປະຊຸມ ໂດຍລວມແລ້ວ ແມ່ນມີຄວາມເຫັນດີ ແລະ ສະໜັບສະໜູນ ຕໍ່ການຄົ້ນຄວ້າປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປີ 2016 ທັງນີ້, ກໍເພື່ອເຮັດໃຫ້ເນື້ອໃນຂອງຮ່າງກົດໝາຍສະບັບປັບປຸງໃໝ່ມີຄວາມຮັດກຸມ, ຄົບຖ້ວນ, ຮັບປະກັນຄວາມສອດຄ່ອງກັບລັດຖະທໍາມະນູນ ແລະ ກົດໝາຍ. ສາມາດກາຍເປັນເຄື່ອງມືທີ່ສັກສິດ ແລະ ແຫລມຄົມ ໃຫ້ແກ່ອົງການລັດທີ່ກ່ຽວຂ້ອງ ໃນການນໍາໃຊ້ເຂົ້າໃນການພິຈາລະນາ ແກ້ໄຂຄໍາຮ້ອງທຸກ ໃຫ້ມີຄວາມເຂັ້ມງວດ ແລະ ເດັດຂາດ.

ໃນກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ຈະເລີນ ເຍຍປາວເຮີ ເຊິ່ງທ່ານໄດ້ກ່າວສະແດງຄວາມຊົມເຊີຍ ແລະ ຕີລາຄາສູງ ຕໍ່ຜູ້ເຂົ້າຮ່ວມກອງປະຊຸມ ທີ່ໄດ້ເອົາໃຈໃສ່ໃນການຄົ້ນຄວ້າປະກອບຄໍາເຫັນຕໍ່ຮ່າງກົດໝາຍດັ່ງກ່າວຢ່າງມີເຫດມີຜົນ, ສຸມໃສ່ບັນດາບັນຫາທີ່ເປັນພື້ນຖານ ແລະ ມີຄວາມຈໍາເປັນອັນຮີບດ່ວນຕໍ່ການປັບປຸງ ທີ່ຄະນະຮັບຜິດຊອບປັບປຸງກົດໝາຍ ໄດ້ຕັ້ງບັນຫາເຈາະຈີ້ມ ຕໍ່ບັນດາທ່ານ. ກອງປະຊຸມໄດ້ມີການຄົ້ນຄວ້າ, ວິເຄາະ, ວິໄຈ ຢ່າງເລິກເຊິ່ງ ປະກອບຄວາມເຫັນດ້ວຍເຫດດ້ວຍຜົນ, ລວມທັງບົດຮຽນ ແລະ ປະສົບການຕົວຈິງ ຂອງແຕ່ລະພາກສ່ວນ, ເຊິ່ງເຮັດໃຫ້ສາມາດສັງລວມໄດ້ ເນື້ອໃນທີ່ສໍາຄັນອັນຈໍາເປັນ ເພື່ອໄປປັບປຸງເຂົ້າໃສ່ກົນໄກການເຮັດທົດລອງ ໃຫ້ມີຄວາມສອດຄ່ອງ ແລະ ປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ແນໃສ່ເຮັດໃຫ້ແນວທາງຂອງພັກ, ນະໂຍບາຍຂອງລັດ ໄດ້ຮັບການຈັດຕັ້ງຜັນຂະຫຍາຍເຂົ້າສູ່ລວງເລິກໃຫ້ຫລາຍຂຶ້ນ. ທ່ານຍັງໄດ້ເນັ້ນຕື່ມວ່າ: ຂໍໃຫ້ສະພາປະຊາຊົນແຂວງ ແລະ ບັນດາຜູ້ເຂົ້າຮ່ວມ ເປັນຂົວຕໍ່ນຳເອົາເນື້ອໃນກົດໝາຍສະບັບນີ້ ລົງໄປທາບທາມຕື່ມໃຫ້ປະຊາຊົນມີຄຳຄິດຄຳເຫັນ ເພື່ອຮັບປະກັນໃນການປົກປ້ອງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ໄດ້ເປັນຢ່າງດີ.

(ກົງທະນູຄຳ ພິພັດເສລີ)