(ສພຊ) ພາຍຫຼັງດຳເນີນມາເປັນເວລາ 2 ວັນ ທີ່ສະພາປະຊາຊົນແຂວງຊຽງຂວາງ, ກອງປະຊຸມທາບທາມຮ່າງກົດໝາຍ 3 ສະບັບ ປະກອບມີ: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ສຳເລັດໃນວັນທີ 22 ມີ ນາ 2024 ໂດຍການເປັນປະທານຮ່ວມຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ແລະ ທ່ານ ບຸນໂຮມ ເທດທານີ ປະທານຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 9 ແຂວງຊຽງຂວາງ; ມີທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ, ບັນດາທ່ານ ສສຊ ປະຈໍາເຂດເລືອກຕັ້ງທີ 9, ສະມາຊິກສະພາປະຊາຊົນແຂວງ (ສສຂ) ແລະ ຫົວໜ້າ-ຮອງຫົວໜ້າພະແນກການ, ອົງການອ້ອມຂ້າງແຂວງຊຽງຂວາງ ເຂົ້າຮ່ວມລວມທັງໝົດ 69 ທ່ານ, ຍິງ 20 ທ່ານ.
ທ່ານ ສົມມາດ ພົລເສນາ ໄດ້ມີຄຳເຫັນວ່າ: ຕະຫຼອດໄລຍະເວລາຂອງການດຳເນີນກອງປະຊຸມ, ບັນດາທ່ານທີ່ເຂົ້າຮ່ວມໄດ້ເປັນເຈົ້າການໃນການຄົ້ນຄວ້າ, ປຶກສາຫາລື ແລະ ແລກປ່ຽນຄໍາຄິດຄໍາເຫັນຢ່າງກົງໄປກົງມາດ້ວຍເຫດ ແລະ ຜົນ ເຊິ່ງບັນດາຄໍາເຫັນເຫຼົ່ານັ້ນ ລ້ວນແລ້ວແຕ່ຜ່ານຈາກການຈັດຕັ້ງປະຕິບັດຕົວຈິງໃນໄລຍະຜ່ານມາ ແລະ ຄວາມເປັນຫ່ວງເປັນໄຍຂອງຜູ້ແທນກອງປະຊຸມ ສະແດງອອກຜ່ານການປະກອບຄໍາເຫັນຂອງຜູ້ແທນກອງປະຊຸມ ຈໍານວນ 37 ເທື່ອຄົນ, ຍິງ 11 ເທື່ອຄົນ ເຊິ່ງບັນດາຄໍາເຫັນຂອງບັນດາທ່ານລ້ວນແລ້ວແຕ່ມີຈຸດສຸມ, ມີເຫດມີຜົນ ແລະ ເປັນປະ ໂຫຍດທີ່ສຸດ ຕໍ່ຄະນະຮັບຜິດຊອບປັບປຸງບັນດາກົດໝາຍແຕ່ລະສະບັບ ເພື່ອເປັນບ່ອນອີງ, ເປັນຂໍ້ມູນໃນການຄົ້ນຄວ້າ, ວິເຄາະວິໄຈ ແຕ່ລະເນື້ອໃນຂອງກົດໝາຍໃຫ້ມີຄວາມຄົບຖ້ວນ, ຮັດກຸມ, ສອດຄ່ອງກັບສະພາບການຂອງປະເທດ ແລະ ສາກົນໃນແຕ່ລະໄລຍະ.
ທ່ານຮອງປະທານສະພາແຫ່ງຊາດ ຍັງສະເໜີໃຫ້ກອງເລຂາກອງປະຊຸມ ຮີບຮ້ອນສະຫຼຸບການທາບທາມຮ່າງກົດໝາຍ, ສັງລວມຄໍາເຫັນບັນດາທ່ານຜູ້ແທນຕໍ່ກອງປະຊຸມຄັ້ງນີ້ ເພື່ອລາຍງານຕໍ່ຄະນະຊີ້ນຳປັບປຸງກົດໝາຍແຕ່ລະສະ ບັບ ເພື່ອສືບຕໍ່ຄົ້ນຄວ້າ, ວິເຄາະວິໄຈ ແລະ ປັບປຸງບັນດາຮ່າງກົດໝາຍເຫຼົ່ານັ້ນ ໃຫ້ທັນຕາມກຳນົດເວລາ; ຖ້າຍັງມີຄຳເຫັນຕໍ່ບັນດາຮ່າງກົດໝາຍຕື່ມ, ກໍຂຽນເປັນລາຍລັກອັກສອນ ຜ່ານຄະນະເລຂາທິການສະພາປະຊາຊົນແຂວງ ໄປຍັງຄະ ນະຮັບຜິດຊອບປັບປຸງກົດໝາຍດັ່ງກ່າວ; ບັນດາທ່ານ ສສຊ, ສສຂ ຈົ່ງສືບຕໍ່ຄົ້ນຄວ້າເກັບກຳຄຳເຫັນຂອງພະນັກງານ-ລັດຖະກອນ ແລະ ປະຊາຊົນບັນດາເຜົ່າ ຕໍ່ບັນດາຮ່າງກົດໝາຍເຫຼົ່ານັ້ນຕື່ມ ແລະ ສືບຕໍ່ຄົ້ນຄວ້າປະກອບຄຳເຫັນພາຍຫຼັງໄດ້ມີການປັບປຸງ ກ່ອນຈະສະເໜີຜ່ານກອງປະຊຸມສະພາແຫ່ງຊາດໃນຕໍ່ໜ້ານີ້.
(ພາບ ແລະ ຂ່າວ: ນາງ ກຸກກິກ ບຸດດາໄຊ)