(ສພຊ) – ໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດ (ຫຄຊ) ໄດ້ຈັດກອງປະຊຸມໃຫຍ່ຄັ້ງທີ II ໃນຕອນບ່າຍວັນທີ 05 ກໍລະກົດຜ່ານມາ ທີ່ຫ້ອງປະຊຸມຖະແຫຼງຂ່າວຂອງສະພາແຫ່ງຊາດ (ສພຊ) ໂດຍການເປັນປະທານຮ່ວມຂອງສະຫາຍ ປອ. ເພັດພອນໃຈ ສິນລະປະກິດ ຄະນະພັກຮາກຖານຄະນະເລຂາທິການ, ເລຂາໜ່ວຍພັກຫ້ອງການຄຸ້ມຄອງຫໍສະພາແຫ່ງຊາດ, ສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ຄອນສີ ທຳມະວົງສາ ເລຂາໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດ; ມີບັນດາສະຫາຍຕາງໜ້າອົງການຈັດຕັ້ງມະຫາຊົນໜ່ວຍຮາກຖານ ຫຄຊ ແລະ ໜ່ວຍຊາວໜຸ່ມຮາກຖານພາຍໃນ ສພຊ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍຮາກຖານດັ່ງກ່າວ ເຂົ້າຮ່ວມທັງໝົດ 32 ສະຫາຍ, ຍິງ 10 ສະຫາຍ.
ກອງປະຊຸມໃຫຍ່ໄດ້ເປັນເອກະສັນຮັບຮອງເອົາບົດລາຍງານການເມືອງຂອງໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດ ທີ່ໄດ້ຕີລາຄາສະພາບການເຄື່ອນໄຫວໄລຍະຜ່ານມາ ໃນນັ້ນ, ໄດ້ຍົກໃຫ້ເຫັນດ້ານດີຜົນງານທີ່ຍາດມາໄດ້ ພ້ອມທັງດ້ານອ່ອນຂໍ້ຄົງຄ້າງ ແລະ ບັນດາສາເຫດທີ່ຕ້ອງປັບປຸງແກ້ໄຂ ເພື່ອຮັບປະກັນໃຫ້ການເຄື່ອນໄຫວດີຂຶ້ນກວ່າເກົ່າ; ທັງກຳນົດທິດທາງການເຄື່ອນໄຫວວຽກງານຂອງຄະນະໜ່ວຍຊາວໜຸ່ມຮາກຖານ ຫຄຊ ໄລ ຍະ 5 ປີຕໍ່ໜ້າ (2024-2028) ໃນນັ້ນ, ຕົ້ນຕໍແມ່ນເພີ່ມທະວີການສຶກສາອົບຮົມການເມືອງແນວຄິດ, ພັດທະນາວຽກງານຊາວໜຸ່ມ ຕິດພັນກັບການເປັນເສນາທິການໃຫ້ແກ່ໜ່ວຍພັກຮາກຖານ ໄປພ້ອມກັບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ແຜນການທີ່ວາງໄວ້ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ. ພ້ອມນັ້ນ, ຍັງໄດ້ຮັບຟັງການລາຍງານ ແລະ ຮັບຮອງເອົາບົດສໍາຫຼວດການນໍາພາຂອງຄະນະໜ່ວຍຊາວໜຸ່ມຮາກຖານ ກ່ຽວກັບການຊີ້ນຳ-ນຳພາຕໍ່ວຽກງານຊາວໜຸ່ມຕະຫຼອດໄລຍະຜ່ານມາ ເຊິ່ງຍົກໃຫ້ເຫັນດ້ານດີ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈຳນວນໜຶ່ງ ທີ່ຄະນະຊາວໜຸ່ມຮາກຖານຊຸດໃໝ່ ຕ້ອງນຳໄປເປັນບົດຮຽນໃນການສືບຕໍ່ປັບປຸງແກ້ໄຂ ເພື່ອຮັບປະກັນໃຫ້ແກ່ການເຄື່ອນໄຫວວຽກງານ ກໍຄືການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດ ໃຫ້ບັນລຸຕາມຄາດໝາຍທີ່ວາງໄວ້.
ຜູ້ແທນກອງປະຊຸມໄດ້ໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດຊຸດໃໝ່ ບົນພື້ນຖານຕາມຫຼັກການລວມສູນປະຊາທິປະໄຕ, ຖືກຕ້ອງຕາມມາດຕະຖານເງື່ອນໄຂທີ່ໄດ້ກໍານົດໄວ້ ເຊິ່ງມີຜູ້ອອກສະໝັກ 7 ສະຫາຍ ຍິງ 2 ສະຫາຍ, ເລືອກເອົາ 5 ສະຫາຍ; ກອງປະຊຸມຄັ້ງປະ ຖົມມະລືກຂອງຄະນະໜ່ວຍຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດ ຊຸດທີ II ໄດ້ເປັນເອກະພາບເລືອກເອົາສະຫາຍ ນາງ ວິນາວັນ ສິປະໄພ ເປັນເລຂາ, ສະຫາຍ ສິລິຂວັນ ວົງສາສຸວັນທອງ ເປັນຮອງເລຂາ ແລະ ປະ ທານກວດກາ, ສະຫາຍ ລີຕູ້ ລີ ເປັນຮອງເລຂາ, ສະຫາຍ ນາງ ຈັນທະສອນ ຊາຕາຮັກ ແລະ ສະຫາຍ ອ້ວນ ວິປັດສາ ເປັນກຳມະການ.
ສະຫາຍ ປອ. ເພັດພອນໃຈ ສິນລະປະກິດ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ຊາວໜຸ່ມຮາກຖານຫ້ອງການຄຸ້ມຄອງຫໍສະພາແຫ່ງຊາດຍາດມາໄດ້ໃນໄລຍະຜ່ານມາ. ພ້ອມນັ້ນ, ກໍໄດ້ເນັ້ນໜັກໃຫ້ຄະນະໜ່ວຍຊາວໜຸ່ມຮາກຖານຊຸດໃໝ່ ເອົາໃຈໃສ່ສຶກສາອົບຮົມສະມາຊິກຊາວໜຸ່ມໃຫ້ມີຄວາມໜັກແໜ້ນ, ເຂັ້ມແຂງທາງດ້ານການເມືອງ-ແນວຄິດ, ມີຄຸນສົມບັດສິນທຳປະຕິວັດ, ຮັກຊາດ, ຮັກລະບອບປະ ຊາທິປະໄຕ ເປັນແບບຢ່າງໃນການເຄື່ອນໄຫວປະຕິບັດໜ້າທີ່ວຽກງານ ແລະ ການດຳລົງຊີວິດ; ສືບຕໍ່ປັບປຸງກົງຈັກ ແລະ ສະມາຊິກຊາວໜຸ່ມໃຫ້ເຂັ້ມແຂງຮອບດ້ານ ແລະ ປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ ສາມາດຮັບ ປະກັນໄດ້ທາງດ້ານປະລິມານ ແລະ ຄຸນນະພາບ; ສືບຕໍ່ຮັກສາມູນເຊື້ອຄວາມສາມັກຄີ, ມີທັດສະນະມະຫາຊົນ, ມີຄວາມດຸໝັ່ນອົດທົນ, ຄົ້ນຄວ້າສຶກສາຮ່ຳຮຽນ ຍົກລະດັບຄວາມຮູ້-ຄວາມສາມາດ ໃນການປະຕິບັດວຽກງານໃຫ້ສູງຂຶ້ນເລື້ອຍໆ; ສ້າງ ແລະ ເຂົ້າຮ່ວມຂະບວນການເຄື່ອນໄຫວວຽກງານຊາວໜຸ່ມໃຫ້ຫຼາຍ, ມີບັນຍາກາດຟົດຟື້ນ, ຫ້າວຫັນ ໂດຍມີເນື້ອໃນຕິດພັນກັບການສຶກສາອົບຮົມໄປພ້ອມໆກັນ.
ກອງປະຊຸມຮຽກຮ້ອງໃຫ້ສະມາຊິກຊາວໜຸ່ມຫ້ອງການຄຸ້ມຄອງຫໍສະພາແຫ່ງຊາດ ຈົ່ງເຊີດຊູນ້ຳໃຈສາມັກຄີເປັນປຶກແຜ່ນ, ຍົກສູງຄວາມເປັນເຈົ້າຕົນເອງ, ເພີ່ມທະວີຄວາມຮັບຜິດຊອບ, ເສີມຂະຫຍາຍຫົວຄິດປະດິດສ້າງ ຜັນຂະ ຫຍາຍມະຕິກອງປະຊຸມໃຫຍ່ຄັ້ງທີ II ໃນຄັ້ງນີ້ ໃຫ້ປາກົດຜົນເປັນຈິງ ແລະ ມີຜົນສຳເລັດຈົບງາມ.
(ນາງ ອາລິນ ສຸພິມມະປະດິດ)