(ສພຊ) – ໜ່ວຍຊາວໜຸ່ມຮາກຖານກົມເລຂານຸການ ດຳເນີນກອງປະຊຸມໃຫຍ່ຄັ້ງທີ II ໃນວັນທີ 11 ເມສາ 2024 ທີ່ສະພາແຫ່ງຊາດ (ສພຊ) ໂດຍການເປັນປະທານຮ່ວມຂອງສະຫາຍ ສິງຄຳ ວົງພະຈັນ ຮອງເລຂາຄະນະພັກຮາກຖານຄະນະເລຂາທິການສະພາແຫ່ງຊາດ, ສະຫາຍ ເປຄຳ ລໍຄຳສອນ ຮອງເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ສຸລະສັກ ສຸວັນນະວົງ ເລຂາໜ່ວຍຊາວໜຸ່ມຮາກຖານກົມເລຂານຸການ; ມີບັນດາສະຫາຍຕາງໜ້າໜ່ວຍຊາວໜຸ່ມຮາກຖານພາຍໃນ ສພຊ ພ້ອມດ້ວຍສະມາຊິກຊາວໜຸ່ມພາຍໃນໜ່ວຍຮາກຖານດັ່ງກ່າວ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການລາຍງານບົດສຳຫຼວດການນຳພາ ແລະ ພ້ອມກັນສະຫຼຸບຕີລາຄາ, ພິຈາລະນາ ແລະ ຮັບຮອງເອົາບົດລາຍງານການເມືອງຂອງໜ່ວຍຊາວໜຸ່ມຮາກຖານກົມເລຂານຸການ ເຊິ່ງໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ເປັນວຽກງານໜຶ່ງທີ່ສຳຄັນ ໂດຍໄດ້ນໍາພາຈັດຕັ້ງເຜີຍແຜ່ເຊື່ອມຊຶມ, ຊຸກຍູ້ສະມາຊິກຊາວໜຸ່ມ ເຂົ້າຮ່ວມຮັບຟັງການເຜີຍແຜ່ເຊື່ອມຊຶມແນວທາງນະໂຍບາຍຂອງພັກ, ມະຕິ, ຄໍາສັ່ງ, ລະບຽບກົດໝາຍຂອງລັດ ແລະ ວັນສໍາຄັນຕ່າງໆຂອງພັກ-ຂອງຊາດ ໃນແຕ່ລະໄລຍະຢ່າງເປັນປົກກະຕິ; ເອົາໃຈໃສ່ຢ່າງຕັ້ງໜ້າໃນການກໍ່ສ້າງສະມາຊິກຊາວໜຸ່ມທາງດ້ານການເມືອງ-ແນວຄິດ ແລະ ການຈັດຕັ້ງ, ປັບປຸງແບບແຜນວິທີເຮັດວຽກ ຕິດພັນກັບວຽກງານຕົວຈິງ, ຮ່ວມຊີວິດການເມືອງເປັນປະຈຳ ແລະ ເຂົ້າຮ່ວມວຽກງານຂະບວນການເພື່ອຂ່ຳນັບຮັບຕ້ອນສະເຫຼີມສະຫຼອງວັນສຳຄັນຕ່າງໆຂອງພັກ-ຂອງຊາດ ແລະ ວຽກງານອື່ນໆຢ່າງມີຜົນສໍາເລັດ.
ກອງປະຊຸມໄດ້ເສີມຂະຫຍາຍປະຊາທິປະໄຕ ເລືອກຕັ້ງເອົາຄະນະໜ່ວຍຊາວໜຸ່ມຮາກຖານກົມເລຂານຸການ ຊຸດໃໝ່ ເຊິ່ງມີຜູ້ສະໝັກ 7 ສະຫາຍ ຍິງ 4 ສະຫາຍ, ເລືອກໄດ້ 5 ສະຫາຍ ຍິງ 3 ສະຫາຍ ຄື: ສະຫາຍ ນາງ ໂຄຕະມີ ສະຫວັດດີ, ສະຫາຍ ວັນຊະນະ ສີພາໄຊ, ສະຫາຍ ນາງ ບໍ່ແກ້ວ ບຸດໄຊສານ, ສະຫາຍ ບົວສະຫວັນ ໄຊຊະນະ ແລະ ສະຫາຍ ຈິດຕະກອນ ວັນທະວີໄຊ; ກອງປະຊຸມຄັ້ງປະຖົມມະລືກໄດ້ເຫັນດີເລືອກເອົາສະຫາຍ ນາງ ໂຄຕະມີ ສະຫວັດ ດີ ເປັນເລຂາ, ສະຫາຍ ນາງ ບໍ່ແກ້ວ ບຸດໄຊສານ ເປັນຮອງເລຂາ ແລະ ສະເໜີໃຫ້ມີການປຶກສາຫາລືແບ່ງວຽກແບ່ງຄວາມຮັບຜິດຊອບຕາມຫຼັງຕື່ມອີກ.
ໃນໂອກາດນີ້, ສະຫາຍ ສິງຄຳ ວົງພະຈັນ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ຜົນງານທີ່ຄະນະໜ່ວຍ​ຊາວ​ໜຸ່ມຮາກຖານກົມເລຂານຸການ ແລະ ສະມາຊິກຊາວໜຸ່ມພາຍໃນໜ່ວຍ ທີ່ຍາດມາໄດ້ໃນໄລ ຍະຜ່ານມາ. ພ້ອມດຽວກັນນັ້ນ, ກໍໄດ້ເນັ້ນໜັກໃຫ້ຄະນະ​ໜ່ວຍຊາວໜຸ່ມຮາກຖານຊຸດໃໝ່ ກໍ​ຄືສະມາຊິກຊາວໜຸ່ມໃນກົມເລຂານຸການ ສືບຕໍ່ເພີ່ມຄວາມເອົາໃຈໃສ່ບາງບັນຫາ ເປັນຕົ້ນແມ່ນເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມພາຍໃນໜ່ວຍ ໂດຍຈັດຕັ້ງການເຊື່ອມຊຶມນິຕິກຳຂອງພັກ-ລັດ ແລະ ວຽກງານຊາວໜຸ່ມ ໃຫ້ເປັນປົກກະຕິ, ມີເນື້ອໃນເລິກເຊິ່ງ, ຕິດແທດກັບຕົວຈິງ; ເປັນເຈົ້າການຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ນິຕິກຳທີ່ກ່ຽວຂ້ອງ ໂດຍສະເພາະແມ່ນມະຕິກອງປະຊຸມໃຫຍ່ຄັ້ງນີ້ ເປັນແຜນການ, ແຜນງານ, ໂຄງການ ພ້ອມທັງຕິດຕາມ, ກວດກາ, ກະຕຸກຊຸກຍູ້, ປະເມີນຜົນການຈັດຕັ້ງປະຕິບັດ​ ແລະ ຂໍ​ທິ​ດຊີ້​ນຳຈາກຄະນະໜ່ວຍພັກ, ຄະນະນຳຂັ້ນເທິງ ໃຫ້ເປັນ​ປົກ​ກະ​ຕິ; ຕ້ອງເອົາໃຈໃສ່ບຸກບືນ, ຈັດຕັ້ງປະຕິບັດໜ້າທີ່ການເມືອງ ເປັນຕົ້ນ: ເຕົ້າໂຮມຄວາມສາມັກຄີ, ເປັນເຈົ້າການເຂົ້າຮ່ວມຂະບວນການຂອງອົງການຈັດຕັ້ງ ຢ່າງເປັນປົກກະຕິ, ສ້າງຂະບວນການແຂ່ງຂັນປະຕິບັດວຽກງານວິຊາສະ ເພາະ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ ແລະ ຂໍ້ແຂ່ງຂັນ 4 ບຸກ ໂດຍການເຜີຍແຜ່ເຊື່ອມຊຶມ, ຈັດສຳມະນາເວທີແລກປ່ຽນ ແລະ ອື່ນໆ ເປັນຂະບວນການຟົດຟື້ນ ແລະ ຕໍ່ເນື່ອງ ພ້ອມທັງສະ​ຫຼຸບ​ຖອດ​ຖອນ​ບົດ​ຮຽນ​ເປັນ​ປະ​ຈຳ ; ເຝິກຝົນຫຼໍ່ຫຼອມຕົນເອງ ດ້ວຍການຄົ້ນຄວ້າເຊື່ອມຊຶມ ແລະ ຮໍ່າຮຽນເອົາຄຸນສົມບັດ, ສິນທຳປະຕິວັດ, ​ຄວາມເປັນແບບຢ່າງຂອງການນຳຊາວໜຸ່ມຮຸ່ນກ່ອນ ພ້ອມທັງເຝິກຝົນຈາກພຶດຕິກຳຕົວຈິງ ແລະ ຮຽນກັບທີ່; ເພີ່ມທະວີການຕິດ ຕາມກວດກາເປັນປົກກະຕິ, ເອົາໃຈໃສ່ປະຕິບັດກົດໝາຍ, ລະບຽບການຕ່າງໆຂອງຊາວໜຸ່ມວາງອອກ ໂດຍສະເພາະການປະຕິບັດຂໍ້ຫ້າມຕ່າງໆ. ນອກຈາກນັ້ນແລ້ວ ບັນດາສະຫາຍສະມາຊິກຊາວໜຸ່ມຂອງກົມເລຂານຸການ ຈຸດພິເສດແມ່ນຕິດພັນກັບການນຳ; ສະນັ້ນ, ຕ້ອງໄດ້ເອົາໃຈໃສ່ກ່ຽວກັບການຮັກສາຄວາມລັບ, ການຮັກສາເອກະສານສຳຄັນຕ່າງໆ ເພື່ອບໍ່ໃຫ້ຕົກເຮ່ຍເສຍຫາຍ ແລະ ສົ່ງຜົນກະທົບຕໍ່ບົດບາດຂອງການນຳ ກໍຄືສະພາແຫ່ງຊາດ; ເອົາໃຈໃສ່ຕອບຕ້ານຫາງສຽງປາກົດການຫຍໍ້ທໍ້ທີ່ເກີດຂຶ້ນໃນຖັນແຖວຊາວໜຸ່ມ ເພື່ອແກ້ໄຂໃຫ້ທັນເວລາ ລວມທັງການປະຕິບັດນະໂຍບາຍດ້ານຕ່າງໆ ແລະ ປົກປ້ອງຜົນປະໂຫຍດອັນຊອບທຳຂອງຕົນ.
(ພາບ-ຂ່າວ: ນາງ ປາກາລັກ ພົມມີໄຊ)